ຄະນະບໍລິຫານງານຊາວໜຸ່ມແຂວງບໍລິຄຳໄຊ ລົງຊຸກຍູ້ຊາວໜຸ່ມເມືອງປາກຊັນ

ປະຕິບັດຕາມມະຕິກອງປະຊຸມຄົບຄະນະບໍລິຫານງານຊາວໜຸ່ມແຂວງບໍລິຄຳໄຊ ຄັ້ງທີ 4 ສະໄໝທີ V

ໃນຕອນເຊົ້າຂອງວັນທີ 29 ພະຈິກ 2018 ສະຫາຍ ທອງມະນີ ໂຄດປັນຍາ ກຳມະການສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ ພ້ອມທິມງານ ລົງຊຸກຍູ້ວຽກງານຊາວໜຸ່ມເມືອງປາກຊັນ, ພາຍຫຼັງສະເໜີຈຸດປະສົງ ແລະ ເຂົ້າຂໍທິດຊີ້ນຳຈາກຄະນະພັກຂັ້ນເມືອງ ທິມງານຄະນະຊາວໜຸ່ມແຂວງ ກໍ່ສືບຕໍ່ເຮັດວຽກກັບຄະນະບໍລິຫານງານຊາວໜຸ່ມເມືອງ.  ເຊິ່ງມີຄະນະບໍລິຫານງານຊາວໜຸ່ມເມືອງ, ເລຂາຮາກຖານ, ເລຂາໜ່ວຍຊາວໜຸ່ມອ້ອມຂ້າງເມືອງເຂົ້າຮ່ວມ 33ສະຫາຍ, ຍິງ 14 ສະຫາຍ. ໃນພິທີ ສະຫາຍ ສົມສຸກ ໄຊບຸນມີ ເລຂາຄະນະບໍລິຫານງານຊາວໜຸ່ມເມືອງປາກຊັນ ໄດ້ຂຶ້ນຜ່ານບົດລາຍງານໂດຍຫຍໍ້ ກ່ຽວກັບການກະກຽມເນື້ອໃນ, ການສ້າງຂະບວນການ, ຄອບຄົວຕົວແບບ ແລະ ການກະກຽມບຸກຄະລາກອນໃສ່ ກອງປະຊຸມໃຫຍ່ຂັ້ນເມືອງ.

ໂອກາດທີ່ໄດ້ລົງເຮັດວຽກຢູ່ເມືອງ ສະຫາຍ ເລຂາຊາວໜຸ່ມແຂວງ ກໍ່ໄດ້ເຜີຍແຜ່ຜົນສຳເລັດກອງປະຊຸມກອງປະຊຸມຄົບຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ຄັ້ງທີ 4 ສະໄໝທີ VII  ເຊິ່ງສະຫາຍ ໄດ້ລົງເລິກ 6 ບັນຫາຕົ້ນຕໍຄື: ເອກະສານການສ້າງຕັ້ງສະຫະພັນຊາວໜຸ່ມລາວ, ວຽກງານໜັງສືພິມໜຸ່ມລາວ, ການຜະລິດ ແລະ ຈຳໜ່າຍເຄື່ອງແບບຊາວໜຸ່ມ-ເຍົາວະຊົນ, ແຜນການຜະລິດຮູບຫຼໍ່ສິນໄຊ ແລະ ແຜນສະເຫຼີມສະຫຼອງວັນສ້າງຕັ້ງຊາວໜຸ່ມປະຊາຊົນປະຕິວັດລາວ ຄົບຮອບ 65 ປີ ໃນປີ 2020, ກອງປະຊຸມຮັບຮອງເອົາວຽກງານທີ່ສຳຄັນ 13 ວຽກຕົ້ນຕໍ ພ້ອມທັງແຜນການ 6 ເນື້ອໃນມາສະເໜີ ເພື່ອໃຫ້ຄະນະບໍລິການງານ, ຮາກຖານ, ໜ່ວຍຊາວໜຸ່ມນໍາໄປຈັດຕັ້ງຜັນຂະຫຍາຍໃນຂົງເຂດຄວາມຮັບຜິດ ຊອບຂອງແຕ່ລະສະຫາຍ ໃຫ້ປະກົດຜົນເປັນຈິງ. ພ້ອມທັງເໜັ້ນໜັກ ທຸກສະຫາຍໄດ້ເຄື່ອນໄຫວຕາມໜ້າທີ່, ພາລະບົດບາດ, ຄວາມຮັບຜິດຊອບຢ່າງເຂັ້ມແຂງ ທັງນີ້ກໍ່ເພື່ອເຮັດໃຫ້ກອງປະຊຸມໃຫຍ່ຊາວໜຸ່ມຂັ້ນເມືອງທີ່ຈະດຳເນີນໃນຕໍ່ໜ້າ ມີເນື້ອໃນຄົບຖ້ວນ, ສົມບູນ ແລະ ໃຫ້ໄດ້ບຸກຄະລາກອນໜຸ່ມ ທີ່ເຕັມໄປດ້ວຍຄວາມຮູ້, ຄວາມສາມາດທີ່ແທ້ຈິງ. ໃນເວລາດຽວກັນນີ້ຢູ່ທີ່ຫ້ອງປະຊຸມຄະນະບໍລິຫານງານຊາວໜຸ່ມແຂວງ ສະຫາຍ ແກ້ວອຸດອນ ໄຊປະເສີດ ຮອງເລຂາຄະນະບໍລິຫານງານຊາວໜຸ່ມແຂວງ ກໍ່ໄດ້ເຜີຍແຜ່ເອກະ ສານວັນສ້າງຕັ້ງເມືອງວຽງໄຊເປັນຖານທີ່ໝັ້ນຂອງການປະຕິວັດ ຄົບຮອບ 50 ປີ, ໃຫ້ແກ່ພະນັກງານພາຍໃນຫ້ອງການນຳອີກ.

                                                   ຂ່າວ: ວິໄລພອນ ສີວິໄຊ ;020 55653639