ຊາວໜຸ່ມຮາກຖານລັດວິສາຫະກິດໄຟຟ້າລາວ ສາຂາແຂວງບໍລິຄຳໄຊ ຈັດພິທີມອບ-ຮັບໃບຢັ້ງຢືນຊາວໜຸ່ມ 4 ບຸກ

ໂດຍ​ປະຕິບັດ​ຕາມ​ບົດ​ແນະນຳໃນການຈັດ​ຕັ້ງ​ປະຕິບັດ​ຂໍ້​ແຂງ​ຂັນ 4 ບຸກຂອງ​ຊາວ​ໜຸ່ມ​ປະຊາຊົນ​ປະຕິວັດ​ລາວ ສະບັບ​ເລກທີ 421 /ລຂ ລົງ​ວັນ​ທີ 16 ມິຖຸນາ 2016, ປະຕິບັດ​ຕາມ​ມະຕິ​ກອງ​ປະຊຸມ​ຄົບ​ຄະ​ນະ​ບໍລິຫານ​ງານ​ຊາວ​ໜຸ່ມ​ແຂວງ​ບໍລິ​ຄຳ​ໄຊ ຄັ້ງ​ທີ 4 ສະ​​ໄໝ​ທີ V ​ແລະ ຜົນການ​ກວດກາ​ຮັບຮອງ​ໜ່ວຍ​ຊາວ​ໜຸ່ມ 4 ບຸກ.

ໃນຕອນບ່າຍຂອງ​ວັນ​ທີ 14 ມິຖຸນາ 2018 ຢູ່​ທີ່​ຫ້ອງ​ປະຊຸມ​ ລັດ​ວິ​ສາ​ຫະກິດ​ໄຟຟ້າ​ລາວ ສາຂາ​ແຂວງບໍລິ​ຄຳ​ໄຊ ​ໄດ້​ຈັດ​ພິທີມອບ-ຮັບ​ໃບ​ຢັ້ງຢືນຊາວ​ໜຸ່ມ 4 ບຸກ. ​ເປັນ​ກຽດ​ເຂົ້າ​ຮ່ວມ​ພິທີ​ໃນ​ຄັ້ງ​ນີ້​ມີ ສະຫາຍ ທະນູ​ວັນ ວົງ​ມະນີ ຮອງເລຂາຄະນະບໍລິຫານງານຊາວໜຸ່ມແຂວງ, ສະຫາຍ ສຸກ​ວິ​ໄລ ​ສຸວັນນະ​ເມ​ທີ ຮອງຫົວໜ້າລັດ​ວິ​ສາ​ຫະກິດ​ໄຟຟ້າ​ລາວ​ສາຂາ​ບໍລິ​ຄຳ​ໄຊ, ສະຫາຍ ວິ​ໄລ​ພອນ ຈັນທະ​ມີນາ​ວົງ ຄະນະ​ບໍລິຫານ​ງານ​ຊາວໜຸ່ມ​ແຂວງ ​ເລຂາ​ຊາວໜຸ່ມຮາກ​ຖານ ລັດ​ວິ​ສາ​ຫະກິດ​ໄຟຟ້າ​​ແຂວງ​. ມີ​ແຂກ​ຖຶກ​ເຊີນຊາວໜຸ່ມຮຽກສ່ຽວອ້ອມຂ້າງພ້ອມດ້ວຍສະມາຊິກຊາວໜຸ່ມເຂົ້າຮ່ວມ 50 ສະຫາຍ.

ໃນພິທີ ສະຫາຍ ວິ​ໄລ​ພອນ ຈັນທະ​ມີນາ​ວົງ ເລຂາຊາວໜຸ່ມຮາກ​ຖານ ໄດ້ຂຶ້ນຜ່ານບົດສະຫຼຸບໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ. ຂອງຮາກ​ຖານໃນສົກປີ 2017 ແລະ ທິດທາງແຜນການປີ 2018. ຊາວໜຸ່ມຮາກຖານລັດ​ວິ​ສາ​ຫະກິດ​ໄຟຟ້າ​ແຂວງ ປັດຈຸບັນມີສະມາຊິກທັງໜົດ 102 ສະຫາຍ. ພາຍໃຕ້ການຊີ້ນຳ-ນຳພາຂອງຄະນະພັກລັດ​ວິ​ສາ​ຫະກິດ​ໄຟຟ້າ​ແຂວງ​, ຄະນະບໍລິຫານງານຊາວໜຸ່ມແຂວງ​, ຊາວ​ໜຸ່ມຮາກຖານລັດ​ວິ​ສາ​ຫະກິດ​ໄຟຟ້າ​​ແຂວງ ໄດ້ຈັດ​ຕັ້ງ​ປະຕິບັດ​ຂໍ້​ແຂ່ງຂັນ 4 ບຸກ ສາມາດຍາດ​ຜົນງານ​ພົ້ນ​ເດັ່ນ​ໃນ​ຫຼາຍ​ດ້ານ​ເຫັນວ່າຖືກຕ້ອງ​ຕາມ​ເງື່ອນ​ໄຂ, ມາດຖານ​ທີ່​ສູນ​ກາງ​ຊາວ​ໜຸ່ມ​ ປະຊາຊົນ​ ປະຕິວັດ​ລາວ​ວາງ​ອອກ​ເຊິ່ງ​ໄດ້​ສະ​ແດງ​ອອກ​ແຕ່​ລະ​ດ້ານ​ດັ່ງ​ນີ້ : ບຸກດ້ານ​ການ​ເມືອງ​ແນວ​ຄິດປະຕິບັດ​ໄດ້ 90%, ບຸກດ້ານ​ການຈັດ​ຕັ້ງ​ປະຕິບັດ​ໄດ້ 98,83%, ບຸກດ້ານ​ການ​ຝຶກ​ຝົນຫຼໍ່ຫຼອມຮໍ່າຮຽນປະຕິບັດ​ໄດ້ 96,82%, ບຸກດ້ານ​ວິຊາ​ຊີບ ​ແລະ ​ວຽກ​ເຮັດງານ​ທຳປະຕິບັດ​ໄດ້ 90,90%.

​      ໃນ​ພິທີດັ່ງກ່າວ ສະຫາຍ ທະນູ​ວັນ ວົງ​ມະນີ ກໍ່​ເປັນກຽດຂື້ນ​ມອບ​ໃບ​ຢັ້ງຢືນ 4 ບຸກ ແລະ ສະຫາຍ ສຸວິ​ໄລ ສຸວັນນະ​ເມ​ທີ ກໍ່ເປັນກຽດຂຶ້ນມອບໃບ​ຍ້ອງຍໍ​​​ໃຫ້​ແກ່​ສະມາຊິກຊາວ​ໜຸ່ມ​ ​ແລະ ​ຕອນທ້າຍພິທີ​ຍັງ​ໄດ້​ຮັບ​ຟັງ​ການ​ໂອ້​ລົມຈາກ ສະຫາຍ ທະນູ​ວັນ ວົງ​ມະນີ ​ກ່ອນ​ອື່ນທ່ານ​ກໍ​ໄດ້​ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ຕໍ່​ຜົນງານ​ທີ່​ຍາດ​ມາ​ໄດ້​ໃນ​ໄລຍະ​ຜ່ານ​ມາ ​ແລະ ເນັ້ນໜັກ​ໃຫ້​ສະມາຊິກ​ຊາວ​ໜຸ່ມ​ຈົ່ງ​​ໄດ້​ເອົາ​ໃຈ​ໃສ່ຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ກໍຄືແຜນການໃນການຈັດຕັ້ງປະຕິບັດຂໍ້ແຂ່ງຂັນດັ່ງກ່າວ ຂອງຮາກ​ຖານປະຈຳປີ 2018 ໂດຍຕິດພັນກັບໜ້າທີ່ວິຊາສະເພາະ ເປັນເສນາທິການທີ່ຫ້າວຫັນ, ເຂັ້ມແຂງໃຫ້ແກ່ຄະນະພັກ ພ້ອມທັງເພີ່ມທະວີການສ້າງຂະບວນການໃຫ້ຟົດຟື້ນ-ຕໍ່ເນື່ອງ ແລະ ຮັກສາມູນ ເຊື້ອນາມມະຍົດຊາວໜຸ່ມ 4 ບຸກໄວ້ໃຫ້ໝັ້ນຄົງຕະຫລອດໄປ.                              

                                                         ຂ່າວ: ຈັນທະ​ວົງ ພັນ​ຍານຸວົງ 020 2851 6649