ຄະນະບໍລິຫານງານຊາວໜຸ່ມແຂວງບໍລິຄຳໄຊ ປຸກເຮືອນໃຫ້ຄອບຄົວອະນາຖາ ບ້ານວັງແປ້ນ

 

 

 

 

 

ປະຕິບັດຕາມ ມະຕິກອງປະຊຸມຄົບຄະນະບໍລິຫານງານຊາວໜຸ່ມແຂວງບໍລິຄຳໄຊ ຄັ້ງທີ 4 ສະໄໝທີ V. ເວົ້າສະເພາະແມ່ນກິດຈະກຳຕອບບຸນແທນຄຸນຂອງຄະນະບໍລິຫານງານຊາວໜຸ່ມແຂວງ ໄດ້ວາງອອກໃຫ້ປະກົດຜົນເປັນຈິງ. ໃນວັນທີ 29 ເມສາ 2018 ທີ່ຜ່ານມານີ້ ຄະນະບໍລິຫານງານຊາວໜຸ່ມແຂວງນຳໂດຍ ທ່ານ ແກ້ວອຸດອນ ໄຊປະເສີດ ຮອງເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ ພ້ອມຄະນະ ໄດ້ສົມທົບກັບຄະນະຊາວໜຸ່ມເມືອງວຽງທອງ, ຊາວໜຸ່ມບ້ານວັງແປ້ນ ແລະ ຊາວໜຸ່ມອາສາສະໝັກ ສຳນັກເຕົ໋າໄດ້ພ້ອມກັນຮ່ວມແຮງຮ່ວມໃຈປຸກເຮືອນໃຫ້ ແມ່ຕູ້ເຄນ ຢູ່ບ້ານວັງແປ້ນ, ເມືອງວຽງທອງເຊິ່ງເປັນຄອບຄົວອະນາຖາ ເປັນເຮືອນຂະໜາດ 4×4 ແມັດ, ພື້ນເທເບຕົງ, ມຸງສັງກະສີ ແລະ ແອ້ມດ້ວຍໄມ້ແປ້ນ ລວມມູນຄ່າ 11,072,000 ກີບ, ການປຸກເຮືອນໃຫ້ຄອບຄົວອະນາຖາໃນຄັ້ງນີ້ແມ່ນໄດ້ຮັບການອຸປະຖຳຊ່ວຍເຫຼືອຈາກຫຼາຍພາກສ່ວນ ເປັນຕົ້ນ ຄະນະຊາວໜຸ່ມແຂວງ, ຄະນະຊາວໜຸ່ມເມືອງ, ຊາວໜຸ່ມບັນດາຮາກຖານ, ຕະຫຼອດຮອດບໍລິສັດຫ້າງຮ້ານ ແລະ ບຸກຄົນທີ່ໄດ້ໃຫ້ການຊ່ວຍເຫຼືອສະໜັບສະໜູນ. ໂອກາດດຽວກັນນີ້ກໍ່ໄດ້ຈັດພິທີມອບ-ຮັບ ເຮືອນຫລັງດັ່ງກ່າວຂຶ້ນ ເປັນກຽດເຂົ້າຮ່ວມໃນພິທີ ໂດຍ ທ່ານ ອາລຸນສັກ ປະທຳມະວົງ ຄະນະປະຈຳພັກເມືອງ, ຮອງເຈົ້າເມືອງວຽງທອງພ້ອມດ້ວຍອຳນາດການປົກຄອງເຂົ້າຮ່ວມ, ໃນພິທີ ທ່ານ ແກ້ວອຸດອນ ໄຊປະເສີດກໍ່ໄດ້ກ່າວມອບເຮືອນພ້ອມດ້ວຍເຄື່ອງໃຊ້ຄົວເຮືອນ, ​ເຄື່ອງບໍລິໂພກຈຳນວນໜຶ່ງໃຫ້ແມ່ຕູ້ເຄນ. ເຊິ່ງແມ່ຕູ້ເຄນກໍ່ມີຄວາມດີອົກດີໃຈ  ແລະ ສະແດງຄວາມຂອບໃຈຕໍ່ຄະນະບໍລິຫານງານຊາວໜຸ່ມແຂວງ, ເມືອງ, ອຳນາດການປົກຄອງທຸກພາກສ່ວນທີ່ໃຫ້ການຊ່ວຍເຫຼືອເບິ່ງແຍງບັນເທົາທຸກຕໍ່ຄອບຄົວທຸກຍາກອະນາຖາ, ດ້ອຍໂອກາດ ເຮັດໃຫ້ຄອບຄົວຜູ້ກ່ຽວມີເຮືອນຢູ່ຄືກັບຊາວບ້ານຄົນອື່ນໆ. ນອກຈາກນັ້ນຄະນະບໍລິຫານງານຊາວໜຸ່ມແຂວງກໍ່ຍັງໄດ້ມອບເຄື່ອງອຸປະກອນການຮຽນລວມມູນຄ່າ 8,500,000 ກີບ, ໃຫ້ນ້ອງນ້ອຍເຍົາວະຊົນ ແລະ ນໍາພານ້ອງນ້ອຍເຍົາວະຊົນເຮັດກິດຈະກຳ ເພື່ອສົ່ງເສີມຜູ້ມີພອນສະຫວັນໄດ້ກ້າສະແດງຄວາມສາມາດຂອງເຂົາເຈົ້າອອກໃນເວທີຕ່າງໆ, ກິດຈະກຳດັ່ງກ່າວນີ້ນອກຈາກປະຕິບັດຕາມມະຕິກອງປະຊຸມຂອງຄະນະຊາວໜຸ່ມແຂວງແລ້ວກໍ່ຍັງເປັນການສ້າງຂະບວນການໜຶ່ງທີ່ເປັນຮູບປະທຳໃນການສະເຫຼີມສະຫຼອງວັນສ້າງຕັ້ງ ຊາວໜຸ່ມປະຊາຊົນປະຕິວັດລາວ ຄົບຮອບ 63 ປີ ອີກດ້ວຍ.

                                                                                              ຂ່າວ: ວິໄລພອນ ສີວິໄຊ; 020 55653639