ເປີດຂະບວນການແຂ່ງຂັນກິລາຕີດອກປີກໄກ່ ຊີງຂັນເລຂາ ຄປປລ ແຂວງວຽງຈັນ

ໃນວັນທີ 29 ມີນາ 2018 ນີ້, ຢູ່ທີ່ເດີ່ນກິລາດອກປີກໄກ່ເຂື່ອນໄຟຟ້ານ້ຳງື່ມ1, ຄະນະຊາວໜຸ່ມ ປະຊາຊົນ ປະ ຕິວັດລາວ ແຂວງວຽງຈັນ ໄດ້ຈັດຂະບວນການແຂ່ງຂັນກິລາຕີດອກປີກໄກ່ຊິງຂັນເລຂາຄະນະບໍລິຫານງານຊາວໜຸ່ມຊາວໜຸ່ມ ປປລ  ແຂວງວຽງຈັນ, ໂດຍມີຄະນະໜ່ວຍຊາວໜຸ່ມເມືອງ 4 ເມືອງທົ່ງພຽງ, ພະແນກການ, ໂຮງຮຽນອ້ອມຂ້າງແຂວງ ພ້ອມດ້ວຍນັກກິລາເຂົ້າຮ່ວມຢ່າງເປັນຂະບວນການຟົດຟື້ນ.

ໃນພິທີ ສະຫາຍ ນາງຈັນທະຄອນ ສີອຳພອນ ກໍາມະການພັກແຂວງ ກໍາມະການສູນກາງຊາວ ໜຸ່ມ ເລຂາຄະນະບໍລິຫານງານຊາວໜຸ່ມ ປປລ ແຂວງວຽງຈັນ ກ່າວວ່າ: ການແຂ່ງຂັນຄັ້ງນີ້ເພື່ອເປັນການສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ແລະ ຂ່ຳນັບຮັບຕ້ອນວັນສ້າງຕັ້ງຄະນະ ຊປປລາວ ຄົບຮອບ 63 ປີ ໃຫ້ມີຂະບວນການຟົດຟື້ນແລະ ທັງເປັນການຊຸກຍູ້, ສົ່ງເສີມ ແລະ ເປີດໂອກາດໃຫ້ແກ່ຄະນະຊາວໜຸ່ມ-ເຍົາວະຊົນຜູ້ທີ່ມີພອນສະຫວັນດ້ານກິລາຕີດອກປີກໄກ່ ໄດ້ສະແດງຄວາມກ້າຫານ ແລະ ຄວາມສາມາດເຂົ້າຮ່ວມຂະບວນການດັ່ງກ່າວຢ່າງເຕັມສ່ວນ ແລະ ທັງເປັນການຮັດແໜ້ນຄວາມສາມັກຄີ ແລະ ປູກຈິດສຳນຶກໃຫ້ແກ່ຊາວໜຸ່ມ-ເຍົາວະຊົນ ຫັນມາຫຼິ້ນກິລາເພື່ອຫ່າງໄກຈາກສິ່ງເສບຕິດ ແລະ ຮູ້ນຳໃຊ້ເວລາຫວ່າງໃຫ້ເກີດປະໂຫຍດ. ການແຂ່ງຂັນຄັ້ງນີ້ແບ່ງອອກເປັນ 2 ປະເພດຄື: ດ່ຽວຍິງ-ຊາຍ ໃນຮຸ່ນຊາວໜຸ່ມນັກຮຽນ ມສ, ຄູ່ປະສົມໃນຮຸ່ນຊາວໜຸ່ມນັກຮຽນໃນຂົງເຂດກຳລັງປ້ອງກັນຊາດ-ປ້ອງກັນຄວາມສະຫງົບ ແລະ ໂຮງຮຽນວິຊາຊີບ ລວມທັງໝົດ 12 ຄູ່ດ່ຽວຍິງ-ຊາຍ ແລະ 4 ທີມປະສົມ.

ຜົນການແຂ່ງຂັນປະກົດວ່າ: ປະເພດຄູ່ປະສົມຍິງ-ຊາຍຊະນະເລີດໄດ້ແກ່ນັກກິລາຈາກຄະນະ ຊາວໜຸ່ມ ວິທະຍາໄລເຕັກນິກ ແຂວງວຽງຈັນ ແລະ ປະເພດດ່ຽວຍິງຊະນະເລີດໄດ້ແກ່ນັກກິລາຈາກ ຄະນະຊາວໜຸ່ມ ເມືອງໂພນໂຮງ ແລະ ປະເພດດ່ຽວຊາຍຊະນະເລີດໄດ້ແກ່ນັກກິລາຈາກຄະນະຊາວ ໜຸ່ມໂຮງຮຽນ ມສ ໂພນໝີ.

ຂ່າວໂດຍ: ນັກຂ່າວຊາວໜຸ່ມແຂວງວຽງຈັນ.