ກອງປະຊຸມເປີດກ້ວາງຄົບຄະນະບໍລິຫານງານຊາວໜຸ່ມ ແຂວງບໍລິຄຳໄຊ ຄັ້ງທີ 4 ສະໄໝທີ V

ໃນ​​ວັນ​ທີ 8-9 ກຸມພາ 2018 ຢູ່​ທີ່​ຫ້ອງ​ປະຊຸມຫ້ອງວ່າການ​ປົກຄອງ ​ເມືອງ​ທ່າ​ພະ​ບາດ ​ໄດ້​​ເປີດ​ກອງ​ປະຊຸມ ​​ເປີດ​ກ້ວາງຄົບ​ຄະນະ​ບໍລິຫານ​ງານ​ຊາວ​ໜຸ່ມ​​ແຂວງບໍລິຄຳໄຊ ຄັ້ງທີ 4 ສະໄໝທີ V ຂື້ນຢ່າງເປັນທາງ​ການ ພາຍ​ໃຕ້​ການ​ເປັນ​ປະທານຂອງ​  ທ່ານ ກວນ​ເພັດ ພວງມາລາ ກຳມະການ​ສູນ​ກາງ​ຊາວໜຸ່ມປະຊາຊົນ ​ປະຕິວັດ​ລາວ ເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ,​ ເປັນ​ກຽດ​ເຂົ້າ​ຮ່ວມກອງປະຊຸມໃນ​ຄັ້ງ​ນີ້​ໂດຍ ທ່ານ ອາລຸນໄຊ ສູນນະລາດ ກຳມະການສຳຮອງສູນກາງພັກ, ເລຂາຄະນະບໍລິຫານງານ ສູນ​ກາງຊາວໜຸ່ມ ປະຊາຊົນ ປະຕິວັດລາວ, ທ່ານ ລຳ​ສະ​ໄໝ ວໍລະ​ສານ ກຳມະການ​ສູນ​ກາງ​ແນວ​ລາວ​ສ້າງ​ຊາດ, ຄະນະ​ປະຈຳ​ພັກ​ແຂວງ ປະທານ​ແນວ​ລາວ​ສ້າງ​ຊາ​ດ ​ແຂວງ​ບໍລິ​ຄຳ​ໄຊ ທັງ​ເປັນ​ຜູ້​ຊີ້​ນຳ​ວຽກງານ​ອົງການ​ຈັດ​ຕັ້ງ​ມະຫາຊົນ​ຂັ້ນ​ແຂວງ, ທ່ານ ບຸນ​ສົງ ​ເພັດ​ຈະ​ເລີ​ນ ກຳມະການ​ພັກ​ແຂວງ ຄະນະ​ປະຈຳພັກ​ເມືອງ  ​ເຈົ້າ​ເມືອງ​ທ່າ​ພະ​ບາດ, ມີຄະນະພັກອົງການຈັດຕັ້ງພາຄີ​ຂັ້ນ​ແຂວງ, ຄະນະປະຈໍາຊາວໜຸ່ມ, ຄະນະບໍລິຫານຊາວໜຸ່ມແຂວງ-ເມືອງ, ຕ່າງໜ້າຄະນະຮາກຖານ, ຄະນະໜ່ວຍ ເຂົ້າຮ່ວມ 95 ສະຫາຍ​, ຍິງ  30  ສະຫາຍ, ໂອກາດດຽວກັນນີ້ສະຫາຍ​ ກວນເພັດ ພວງມາລາ ເລຂາ​ຄະນະບໍລິຫານງານຊາວໜຸ່ມແຂວງບໍລິຄຳໄຊ ໄດ້ກ່າວເປີດກອງປະຊຸມຢ່າງເປັນທາງການ.

ກອງປະຊຸມສະຫາຍ ທະນູ​ວັນ ວົງ​ມະນີ ຮອງເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ, ໄດ້​ຂຶ້ນ​ຜ່ານ​ບົດ​ສະ​ຫຼຸບການຈັດ​ຕັ້ງ​ປະຕິບັດໜ້າທີ່​ວຽກ​ງານ​ຊາວ​ໜຸ່ມ​-ເຍົາວະຊົນ ປະຈຳສົກ​ປີ 2017 ​ແລະ ທິດ​ທາງ​ແຜນການປະຈຳປີ​  2018, ໃນໄລຍະ 1 ປີຜ່ານມາຄະນະຊາວໜຸ່ມແຂວງບໍລິຄຳໄຊ ທຸກຂັ້ນສາມາດຍາດຜົນງານພົ້ນເດັ່ນຫຼາຍດ້ານເປັນຕົ້ນ: ແມ່ນໄດ້ຖືເອົາວຽກງານການເມືອງແນວຄິດເປັນກົກ ສອດຫ້ອຍ ເຂົ້າທຸກຂົງເຂດວຽກງານ ໂດຍນຳເອົາແນວທາງນະໂຍບາຍຂອງພັກ, ມະຕິ, ຄຳສັ່ງ, ລະບຽບກົດໝາຍ, ແຜນພັດທະນາເສດຖະກິດ-ສັງຄົມ ລົງເຜີຍແຜ່ເຊື່ອມຊຶມໃຫ້ແກ່ຊາວໜຸ່ມ – ເຍົາວະຊົນຮັບຮູ້ ແລະ ເຂົ້າໃຈ, ວຽກງານການຈັດຕັ້ງໄດ້ສຸມໃສ່ປັບປຸງການຈັດຕັ້ງ: ຊາວໜຸ່ມໃຫ້ໜັກແໜ້ນເຂັ້ມແຂງຂື້ນເລື້ອຍໆ ປະຈຸບັນມີຄະນະບໍລິຫານງານຊາວໜຸ່ມແຂວງ 28 ສະຫາຍ, ຍິງ 5 ສະຫາຍ, ຍົກຍ້າຍໄປຮັບໜ້າທີ່ໃໝ່ 1 ສະຫາຍ, ຍິງ 0, ຊາວໜຸ່ມໃນເກນອາຍຸທັງໝົດ 64,209 ສະຫາຍ, ຍິງ 32,265 ສະຫາຍ, ເປັນສະມາຊິກຊາວໜຸ່ມປະຊາຊົນປະຕິວັດລາວ 25,321 ສະຫາຍ, ຍິງ 13,875 ສະຫາຍ; ໄວເຍົາວະຊົນມີທັງໝົດ 64,197 ນ້ອງ, ຍິງ 22,634 ນ້ອງ, ເປັນສະມາຊິກເຍົາວະຊົນ 26,810 ນ້ອງ, ຍິງ 16,506 ນ້ອງ; ໄວອະນຸຊົນ 14,558 ຫຼານ, ຍິງ 7,115 ຫຼານ, ເປັນສະມາຊິກອະນຸຊົນ 3,889 ຫຼານ, ຍິງ 2,091 ຫຼານ. ວຽກງານຂະບວນການ: ກໍໄດ້ມີຫຼາຍຂະບວນການທີ່ພົ້ນເດັ່ນເປັນຕົ້ນ: ຂະບວນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ມາຮອດປະຈຸບັນສາມາດກວດກາປະເມີນຜົນຮັບຮອງ ທົ່ວແຂວງໄດ້ 37 ພາກສ່ວນ, ປະກອບມີ 1 ພະແນກ, 16 ຄຊປປລ ຮາກຖານ, 14 ໜ່ວຍເອກະລາດ,  ໃນນັ້ນ 7 ເມືອງ ຮັບຮອງເປັນ ຄຊປປລ ເມືອງ 4 ບຸກ ພ້ອມນັ້ນຍັງມີຂະບວນການຕ່າງໆທີ່ຄະນະຊາວໜຸ່ມຈັດຕັ້ງຂຶ້ນເພື່ອ ຂໍ່ານັບຮັບຕ້ອນວັນສຳຄັນຂອງຊາດ, ຂອງພັກ ​ໃນ​ກອງ​ປະຊຸມ​ຄົບ​ຄະນະ​ບໍລິຫາ​ນງານ​ຊາວໜຸ່ມ​ແຂວງ​ຄັ້ງ​ທີ່ 4 ສະ​ໄໝທີ່ V ຍັງ​ໄດ້​ຮັບຮອງ​ເອົາ​ຄະນະ​ບໍລິຫານ​ງານ​ຊາວໜຸ່ມ​ແຂວງ​ເພີ່ມ 2 ສະຫາຍແທ່ນ​ຕໍາ​ແໜ່ງທີ່​ວ່າງ​ຄື: ສະຫາຍ​ ອາລັນ ​ໄຊ​ຍະ​ສານ ຫົວໜ້າຄະນະ​ແໜງ​ເຍົາວະ​ຊົນ ​ເລຂາ​ຊາວໜຸ່ມສຳນັກ​ຄະນະ​ບໍລິຫານ​ງານ​ຊາວໜຸ່ມ​ແຂວງ ​ແລະ ສະຫາຍ ວິ​ໄລ​ພອນ ຈັນທະ​ມີນາ​ວົງ ​ເລຂາ​ຊາວໜຸ່ມຮາກ​ຖານ ລັດ​ວິ​ສາ​ຫະກິດ​ໄຟຟ້າ​ລາວ ສາຂາ ​ແຂວງ​ບໍລິ​ຄໍາ​ໄຊ.

​ໃນ​ຕອນທ້າຍກອງປະຊຸມຍັງໄດ້ຮັບຟັງການໂອ້ລົມ ແລະ ໃຫ້ທິດຊີ້ນຳຈາກທ່ານ ອາ​ລຸນ​ໄຊ ສູນ​ນະລາດ ກຳມະການ​ສຳຮອງ​ສູນ​ກາງ​ພັກ ​ເລຂາຄະນະບໍລິຫານງານສູນ​ກາງ​ຊາວໜຸ່ມ ປະຊາຊົນ ປະຕິວັດ​ລາວ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ໄຊຊະນະທີ່ຍາດມາໄດ້ໃນໄລຍະຜ່ານມາ, ທ່ານຍັງໄດ້ເໜັ້ນໜັກໃຫ້ຄະນະບໍລິຫານງານຊາວໜຸ່ມທຸກສະຫາຍຈົ່ງເອົາໃຈໃສ່ວຽກງານການສຶກສາອົບການເມືອງ-ແນວຄິດໃຫ້ກັບຊາວໜຸ່ມ ແລະ ວຽກງານປ້ອງກັນຄວາມສະຫງົບສຸກ, ເພື່ອສະກັດກັ້ນກັບປະກົດການຍໍ້ທໍ້ທີ່ເກີດຂື້ນຢູ່ໃນສັງຄົມໃຫ້ຫຼຸດໜ້ອຍຖອຍລົງ, ເອົາໃຈໃສ່ປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມ, ພ້ອມກັນຊີ້ນຳ-ນຳພາສະມາຊິກຊາວໜຸ່ມ ພັດທະນາຕົນເອງ ແລະ ຄອບຄົວໃຫ້ຫຼຸດພົ້ນຈາກຄວາມທຸກຍາກ,  ສຸມທຸກຄວາມພະຍາຍາມໃນການປັບປຸງວຽກງານການຈັດຕັ້ງຊາວໜຸ່ມໃຫ້ເຕີບໃຫ່ຍເຂັ້ມແຂງ ​ເອົາ​ໃຈ​ໃສ​ຊີ້​ນຳ​-ນຳພາ​ການຈັດ​ຕັ້ງ​ປະຕິບັດ​ການ​ດຳ​ເນີນ​ກອງ​ປະຊຸມ 3 ຂັ້ນ ​ໃຫ້​ສຳ​ເລັດ​ເປັນ​ບາດກ້າວໆ ​ແລະ ດຳລົງບົດບາດປະຈັນບານເປັນເສນາທິການທີ່ຫ້າວຫັນ-ເຂັ້ມແຂງໃຫ້ແກ່ຄະນະພັກ.

                                                ຂ່າວ: ຈັນທະ​ວົງ ພັນ​ຍານຸວົງ