ຊາວໜຸ່ມເມືອງສະໜາມໄຊ ເປີດກອງປະຊຸມສາມັນຄົບຄະນະບໍລິຫານງານ

ຄະ​ນະ​ບໍ​ລິ​ຫານ​ງານ​ຊາວ​ໜຸ່ມ ເມືອງ​ສະ​ໜາມ​ໄຊ ໄດ້​ເປີດກອງ​ປະ​ຊຸມ​ສາ​ມັນ​ຄົບ​ຄະ​ນະ ຄັ້ງ​ທີ 4 ສະ​ໄໝ​ທີ VII ຂຶ້ນ​ຢ່າງ​ເປັນ​ທາງ​ການ ໃນ​ວັນ​ທີ 1 ມັງ​ກອນ 2018 ນີ້ ຢູ່​ທີ່​ສະ​ໂມ​ສອນ​ໃຫ່​ຍ​ຫ້ອງວ່າ​ການ​ປົກ​ຄ​ອງ​ເມືອງ. ໂດຍ​ພາຍ​ໃຕ້​ການ​ເປັນ​ປະ​ທານ ຂອງ ສ​ະ​ຫາຍ ນາງ ອິນ​ປັນ ດວງ​ພະ​ບາງ ຮອງ​ເລ​ຂາ​ຄະ​ນະ​ບໍ​ລິ​ຫານງານ​ຊາວ​ໜຸ່ມ​ເມືອງ ຜູ້​ປະ​ຈຳ​ການ​ແທນ​ເລ​ຂາ, ໃຫ້​ກຽດ​ເຂົ້າ​ຮ່ວມ​ເປັນ​ປະ​ທານ ຈາກ ສະ​ຫາຍ ຄຳ​ໝັ້ນ ພົມ​ມະ​ແສງ ຄະ​ນະ​ປະ​ຈຳ​ພັກ​ເມືອງ ປະ​ທານ​ແນວ​ລາວ​ສ້າງ​ຊາດ​ເມືອງ ທັງ​ເປັນ​ຜູ້​ຊີ້​ນຳ​ວຽກ​ງານ​ອົງ​ການ​ຈັດ​ຕັ້ງ​ມະ​ຫາ​ຊົນ​ພາຍ​ໃນ​ເມືອງ, ມີສະ​ຫາຍ ຫັດ​ສະ​ໃນ ສີ​ບຸນ​ເຫຼືອງ ກຳ​ມະ​ການ​ສູນ​ກາງ​ຊາວ​ໜຸ່ມ ເລ​ຂາ​ຄະ​ນະ​ບໍ​ລິ​ຫານ​ງານ​ຊາວ​ໜຸ່ມ​ແຂວງ. ມີ​ຄະ​ນະ​ບໍ​ລິ​ຫານ​ງານ​ຊາວ​ໜຸ່ມ​ເມືອງ, ​ຄະ​ນະ​ໜ່ວຍ​ພັກ, ຄະ​ນະ​ໜ່ວຍ​ຊາວ​ໜຸ່ມ​ອ້ອມ​ຂ້າງ​ເມືອງ, ໜ່ວຍ​ຮາກ​ຖານ​ບ້ານ​ເຂົ້າ​ຮ່ວມ 58 ສະ​ຫາຍ; ຍິງ 16 ສະ​ຫາຍ.

ກອງ​ປະ​ຊຸມສາ​ມັນ​ຄົບ​ຄະ​ນະ​ຄັ້ງນີ້ ສ​ະ​ຫາຍ ນາງ ອິນ​ປັນ ດວງ​ພະ​ບາງ ຜູ້​ປະ​ຈຳ​ການ​ແທນ​ເລ​ຂາ ໄດ້ຮັບ​ກຽດ​ຂຶ້ນ​ຜ່ານ​ບົດ​ສະຫຼຸບ​ເພື່ອ​ຕີ​ລາ​ຄາ​ຄືນການ​ຈັດ​ຕັ້ງ​ປະ​ຕິ​ບັດເຄື່ອນ​ໄຫວໃນ​ໄລ​ຍະ 1 ປີ​ຜ່ານ​ມາ ໂດຍ​ສະ​ເພາະ​ແມ່ນ​ປີ 2017 ເປັນ​ຕົ້ນ​ມາ. ເຊິ່ງ​ສະ​ຫາຍ​ໄດ້​ຍົກ​ໃຫ້​ເຫັນ​ຜົນ​ງານ​ດ້ານ​ດີ ຫຼາຍ​ດ້ານ​ທີ່​ຄະ​ນະ​ບໍ​ລິ​ຫານ​ງານ​ຊາວ​ໜຸ່ມ​ເມືອງ​ຍາດ​ມາ​ໄດ້​ເປັນ​ຕົ້ນ ແມ່ນ​ວຽກ​ງານ​ສຶກ​ສາ​ອົບ​ຮົມ​ການ​ເມືອງ​-ແນວ​ຄິດ​ໃຫ້​ຖັນ​ແຖວ​ຊາວ​ໜຸ່ມດ້ວຍຫຼາຍ​ຮູບ​ການ ແລະ ວິ​ທີ​ການ, ເອົາ​ໃຈ​ໃສ່​ວຽກ​ງານ​ປັບ​ປຸງ​ກົງ​ຈັກ​ການ​ຈັດ​ຕັ້ງ​ຊາວ​ໜຸ່ມ-ເຍົາ​ວະ​ຊົນ ສະ​ແດງ​ອອກ ທົ່ວ​ເມືອງ​ມີ​ໜ່ວຍ​ຊາວ​ໜຸ່ມ​ທັງ​ໝົດ 64 ໜ່ວຍ; ມີ​ຄະ​ນະ​ໜ່ວຍ​ທັງ​ໝົດ 206 ສະ​ຫາຍ; ຍິງ 44 ສະ​ຫາຍ ໃນ​ນັ້ນ ທົ່ວ​ເມືອງ​ມີ​ສະ​ມາ​ຊິກ​ຊາວ​ໜຸ່ມ ປະ​ຊາ​ຊົນ ປະ​ຕິ​ວັດ​ລາວ 3.422 ສະ​ຫາຍ; ຍິງ 1.345 ສະ​ຫາຍ ເພີ່ມ​ຂຶ້ນ 47 ສະ​ຫາຍ; ຍິງ 19 ສະ​ຫາຍ ກວມ​ເອົາ 78,38 % ຂອງ​ຈຳ​ນວນ​ຊາວ​ໜຸ່ມ-ໄວ​ໜຸ່ມ ແລະ ສາ​ມາດ​ປັບ​ປຸງ​ກົງ​ຈັກ​ການ​ຈັດ​ຕັ້ງ​ຊາວ​ໜຸ່ມ​ອ້ອມ​ຂ້າງ ແລະ ຮາກ​ຖານ ໃນ​ຂອບ​ເຂດ​ທົ່ວ​ເມືອງ ສຳ​ເລັດ 17 ໜ່ວຍ ທຽບ​ໃສ່​ແຜນ​ປີ​ລື່ນ 9 ໜ່ວຍ ເທົ່າ​ກັບ 52,94 % ນອກນັ້ນ, ຍັງ​ໄດ້​ເອົາ​ໃຈ​ໃສ່​ຊຸກ​ຍູ້​ຂະ​ບວນ​ການ​ແຂ່ງ​ຂັນ 4 ບຸກ ຢ່າງ​ເປັນ​ຂະ​ບວນ​ການ​ທີ່​ຟົດ​ຟື້ນ, ສຳ​ລັບ​ວຽກ​ງານ​ປັບ​ປຸງ​ການ​ຈັດ​ຕັ້ງ​ເຍົາ​ວະ​ຊົນ-ອະ​ນຸ​ຊົນ ທົ່ວ​ເມືອງ​ມີ​ໄວ​ເຍົາ​ວະ​ຊົນ​ທັງ​ໝົດ 8.682 ນ້ອງ; ຍິງ 4.496 ນ້ອງ. ໃນ​ນັ້ນ, ເປັນ​ສະ​ມາ​ຊິກ​ເຍົາ​ວະ​ຊົນ​ທັນ​ວາ 4.271 ນ້ອງ; ຍິງ 1.364 ນ້ອງ ທຽບ​ໃສ່​ປີ​ຜ່ານ​ມາ​ເພີ່ມ​ຂື້ນ 1.148 ນ້ອງ, ຂະ​ຫ​ຍາຍ​ໃໝ່​ໄດ້ 1.138 ນ້ອງ; ຍິງ 589 ນ້ອງ ທຽບ​ໃສ່​ແຜນ​ປີ ລື່ນ 562 ນ້ອງ ເທົ່າ​ກັບ 50,61 %. ນອກນັ້ນ, ຄະ​ນະ​​ບໍ​ລິ​ຫານ​ງານຊາວ​ໜຸ່ມ​ເມືອງຍັງ​ໄດ້​ເອົາ​ໃຈ​ໃສ່​ວຽກ​ງານ​ໂຄ​ສະ​ນາ​ສົ່ງ​ເສີມ​ວິ​ຊາ​ຊີບ​ໃຫ້​ແກ່​ຊາວ​ໜຸ່ມ, ເອົາ​ໃຈ​ໃສ່​ການ​ປະ​ຕິ​ບັດ​ວຽກ​ງານ 3 ສ້າງ ດ້ວຍ​ຮູບ​ການ​ນຳ​ພາ​ຊາວ​ໜຸ່ມ​ເຂົ້າ​ສູ່​ຂະ​ບວນ​ການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ​ຫງົບ, ການ​ນຳ​ພາ​ຊາວ​ໜຸ່ມ​ເຂົ້າ​ສູ່​ຂະ​ບວນ​ການ​ສ້າງ​ເສດ​ຖະ​ກິດ ແລະ ການ​ນຳ​ພາ​ຊາວ​ໜຸ່ມ-ເຍົາ​ວະ​ຊົນ​ເຂົ້າ​ສູ່​ຂະ​ບວນ​ການ​ວັດ​ທະ​ນະ​ທຳ-ສັງ​ຄົມ. ນອກ​ຈາກ​ຜົນ​ງານ​ທີ່​ກ່າວ​ມານັ້ນ ສະຫາຍ ຍັງ​ໄດ້​ຍົກ​ໃຫ້​ເຫັນ ດ້ານ​ອ່ອນ, ຂໍ້​ຄົງ​ຄ້າງ ​ພ້ອມ​ທັງ​ບົດ​ຮຽນ​ທີ່​ຖອດ​ຖອນ​ໄດ້ ເພື່ອ​ນຳ​ມາ​ເປັນ​ວິ​ທີ​ການ​ແກ້​ໄຂ. ຈາກນັ້ນ ກໍ່​ໄດ້​ຜ່ານ​ທິດ​ທາງ​ແຜນ​ການຕໍ່ໜ້າ ທີ່​ຈະ​ຕ້ອງ​ໄດ້​ສຸມ​ໃສ່​ຄາດ​ໝາຍ​ສູ້​ຊົນ ແລະ ວຽກ​ງານ​ແຕ່​ລະ​ດ້ານ​ໃຫ້​ໄດ້​ຮັບ​ຜົນ​ສຳ​ເລັດ​ລື່ນ​ຄາດ​ໝາຍ​ທີ່​ໄດ້​ກຳ​ນົດ​ເອົາ​ໄວ້. ກອງ​ປະ​ຊຸມ​ຄັ້ງ​ນີ້ ຍັງ​ໄດ້​ມີ​ພິ​ທີ​ມອບ​ໃບ​ຊົມ​ເຊີຍ​ຈາກ​ຄະ​ນະ​ຊາວ​ໜຸ່ມ​ເມືອງໃຫ້​ຜູ້​ທີ​ມີ​ຜົນ​ງານ​ໃນ​ຂະ​ບວນ​ການ​ແຂ່ງ​ຂັນ 4 ບຸກ​ ອ້ອມ​ຂ້າງ ແລະ ຮາກ​ຖານ​ບ້ານ ຈຳ​ນວນ 80 ສະ​ຫາຍ; ຍິງ 27 ສະ​ຫາຍ ແລະ ມອບ​ໃບ​ຍ້ອງ​ຍໍ ໃຫ້​ຜູ້​ທີ່​ມີ​ຜົນ​ງານ​ດີ​ເດັ່ນ​ໃນ​ຂະ​ບວນ​ການ 4 ບຸກ ​ຈຳ​ນວນ 521 ສະ​ຫາຍ; ຍິງ 189 ສະ​ຫາຍ ພ້ອມນັ້ນ ຍັງ​ໄດ້​ມີ​ພິ​ທີ​ມອບ​ໃບ​ຢັ້ງ​ຢືນ​ໜ່ວຍ​ຊາວ​ໜຸ່ມ​ນຳ​ໜ້າ 4 ບຸກ ໃຫ້​ໜ່ວຍ​ຊາວ​ໜຸ່ມ​ອ້ອມ​ຂ້າງ 10 ໜ່ວຍ ແລະ ​ໜ່ວຍຮາກ​ຖານບ້ານ 3 ໜ່ວຍ. ເຊິ່ງ​ໃຫ້​ກຽດ​ຂຶ້ນ​ຮັບ​ແມ່ນ​ຕາງໜ້າ​ຄະ​ນະ​ໜ່ວຍອ້ອມ​ຂ້າງ, ຄະ​ນະ​ໜ່ວຍຮາກ​ຖານ​ບ້ານ ແລະ ໃຫ້​ກຽດ​ມອບ​ໂດຍ​ແມ່ນ​ຄະ​ນະ​ປະ​ທານກອງ​ປະ​ຊຸມ​ດັ່ງ​ກ່າວ.

ຂ່າວ: ຊາວ​ໜຸ່ມ​ແຂວງ​ອັດ​ຕະ​ປື.