ຄະນະຊາວໜຸ່ມ ປະຊາຊົນ ປະຕິວັດລາວ ແຂວງຈຳປາສັກ ພ້ອມດ້ວຍພາກສ່ວນຕ່າງໆ ລົງອວຍພອນທະຫານແນວໜ້າ.

ໃນ​ວັນ​ທີ 31 ມັງ​ກອນ 2018 ນີ້ ຄະນະ​ຊາວ​ໜຸ່ມ ປະຊາຊົນ ປະຕິວັດ​ລາວ ​ແຂວງ​ຈຳປາ​ສັກ ພ້ອມ​ດ້ວຍ ຮາກ​ຖານ​ຊາວ​ໜຸ່ມ ກອງ​ບັນຊາ​ການ​ທະຫານ​ແຂວງ, ຮາກ​ຖານ​ຊາວ​ໜຸ່ມ ຫ້ອງ​ວ່າການ​ປົກຄອງ​ແຂວງ, ຮາກ​ຖານ​ຊາວ​ໜຸ່ມພະ​ແນ​ກສຶກສາ​ທິການ ​ແລະ ກິລາ ​ແຂວງ​, ຮາກ​ຖານ​ຊາວ​ໜຸ່ມ ​ໂຮງໝໍ ​ແຂວງ, ຮາ​ກຖານ​ຊາວ​ໜຸ່ມ ວິທະຍາ​ໄລ​ກະສິກຳ ​ແລະ ປ່າ​ໄມ້, ໜ່ວຍ​ຊາວ​ໜຸ່ມ ຄະນະ​ກວດ​ພັກ​ແຂວງ ​ແລະ ໜວ່ຍຊາວ​ໜຸ່ມ ສະຫະພັນ​ຍິງ​ແຂວງ, ​ໄດ້​ພ້ອມ​ກັນ​ລົງ​ອວຍພ​ອນ ພ້ອມ​ມອບ​ເຄື່ອງ ອຸປະ​ໂພ​ກ – ບໍລິ​ໂພ​ກ ຈຳນວນ​ໜື່ງ ເປັນ​ມູນ​ຄ່າ 9,000,000 ກວ່າ​ກີບ ໃຫ້​ແກ່ ອ້າຍ-​ນ້ອງ​ນາຍ ພົນທະຫານ​ແນວ​ໜ້າ​ກອງພັນ 22 ​​ເມືອງໂພນ​ທອງ ​ແຂວງຈຳປາ​ສັກ ​ເນື່ອງ​ໃນ​ໂອກາດ ສະ​ເຫຼີ​ມສະຫຼອງ ວັນ​ສ້າງ​ຕັ້ງ​ກອງທັບປະຊາຊົນລາວ ຄົບຮອບ 69 ປີ ( 20 ມັງກອນ 1949 – 20 ມັງກອນ 2018 )  ເຂົ້າ​ຮ່ວມຄັ້ງ​ນີ້​ມີ ທ່ານ ອຸດົມ​ສັກ ດີ​ວິ​ໄຊ ກຳມະການ​ພັກ​ແຂວງ, ​ເລຂາ​ຄະນະ​ຊາວ​ໜຸ່ມ ປະຊາຊົນ ປະຕິວັດ​ລາວ ​ແຂວງ​ຈຳປາ​ສັກ, ທ່ານ ພັຕ ຈັນ​ໄທ ຊົມ​ພູ ​ເລຂາ​ຄະນະພັກ​ຮາກ​ຖານ ກອງພັນ 22, ຫົວໜ້າການ​ເມືອງ ກອງພັນ 22, ນາຍ ​ແລະ ພົນທະຫານ ນອກ​ນັ້ນຍັງ​ມີ ຫົວໜ້າ​ຄະນະ ພ້ອມ​ດ້ວຍພະນັກງານ ຂອງ​ແຕ່​ລະ​ພາກສ່ວນ​ເຂົ້າ​ຮ່ວມ.

​ໃນ​ພິທີ ທ່ານ ພັຕີ ຈັນ​ໄທ ຊົມ​ພູ ​ເລຂາຄະ​ນະ​ພັກ​ຮາກ​ຖານ ກອງພັນ 22, ​ຫົວໜ້າການ​ເມືອງ ກອງພັນ 22 ໄດ້​ຂື້ນ​ລາຍ​ງານ​ສະພາບ​ລວມຂອງ​ກອງພັນ​ໂດຍ​ຫຍໍ້ ​ເຊີ່ງ​ໃນ​ນັ້ນ​​ ໄດ້ໃຫ້​ຮູ້​ວ່າ: ກອງພັນ 22 ຕັ້ງ​ຢູ່​ພື້ນ​ທີ່ ​ເມືອ​ງ ​ໂພນ​ທອງ ​ແຂວງ ຈຳປາ​ສັກ ​ເຊີ່ງ​ຫ່າງຈາ​ກຕົວ​ເມືອງ​ໄປ 28 ກິ​ໂລ​ແມັດ, ມີ​ຊາຍ​ແດນ​ຕິດ​ຈອດ​ກັບ ລາ​ຊະອານາ​ຈັກໄທ, ພາຍ​ໃນ​ກອງພັນ​ມີ​ສະມາຊິກ​ຊາວ​ໜຸ່ມ​ທັງ​ໝົດ: 183 ສະຫາຍ, ​ໃນ​ນັ້ນ​ ມີສະມາຊິກ​ພັກ 83 ສະຫາຍ, ຈາກ​ນັ້ນ ຄະນະ​ທີ່​ລົງ​ອວຍພອນ​ກໍ່​ໄດ້​ມອບ​​ເຄື່ອງ​ ອຸປະ​ໂພກ, ບໍລິ​ໂພກ ​ເຊັ່ນ: ນ້ຳ​ດື່ມ,​ ​ ຢາ​ປົວ​ພະຍາດ, ອຸປະກອນ​ເຄື່ອງ​ຫຼີ້ນກິລາ, ໝີ່,​ ປາປ໋ອງ ​ແລະ ສີ່​ງຂອງ​ຕ່າງໆ​ອີກ​ຈຳນວນ​ໜຶ່ງ, ​​ເພື່ອ​ເປັນ​ການສະ​ແດງ​ໃຫ້​ເຫັນ​ຄວາມ​ເປັນ​ຫ່ວງ​ເປັນ​​ໄຍຂອງ​ພະນັກງານ​ລັດ​ທະ​ກອນ​ຢູ່​ແນວຫຼັງທີ່​ມີ​ຕໍ່​ອ້າຍ​ – ນ້ອງ ທະຫານ​ແນວໜ້າທີ່​ໄດ້​ປະຕິບັດໜ້າທີ່ທີ່​ເປັນ​ກຳ​ແພງ​ປ້ອງ​ກັນ​ປະ​ເທດ​ຊາດ​ໃຫ້​ມີ​ຄວາມ​ສະ​ຫງົບ​ມາ​ເຖິງ​ທຸກ​ວັນ​ນີ້, ຈາກ​ນັ້ນ​ແຕ່​ລະ​ພາກ ສ່ວນ​ກໍ່​ໄດ້​ ​ຮ່ວມ​ພາ​ເຂົ້າ​ສາມັກຄີ.

                                                         ຂ່າວ: ຫ້ອງການ​ຊາວ​ໜຸ່ມ​ ແຂວງ​ຈຳປາ​ສັກ