ກອງປະຊຸມກຳນົດພະນັກງານນຳພາ-ຄຸ້ມຄອງຄະນະບໍລິຫານງານຊາວໜຸ່ມແຂວງ

ເພື່ອຮັກສາຄຸນນະພາບຂອງພະນັກງານ, ສະມາຊິກພັກ ໃຫ້ມີຄວາມໜັກແໜ້ນ, ເຂັ້ມແຂງ ແລະ ພຽບພ້ອມດ້ວຍຄຸນສົມບັດ-ສິນທຳປະຕິວັດ. ໃນການບໍລິຫານ, ຊີ້ນຳ-ນຳພາວຽກງານໃນຕໍ່ໜ້າ. ໃນ​ຕອນ​ເຊົ້າ​ຂອງ​ວັນ​ທີ 1 ກຸມພາ 2018 ຢູ່ທີ່ຫ້ອງປະຊຸມຄະນະບໍລິຫານງານຊາວໜຸ່ມແຂວງບໍລິຄໍາໄຊ ໄດ້ເປີດກອງປະຊຸມຂຶ້ນແຜນກຳນົດພະນັກງານນຳພາ-ຄຸ້ມຄອງຂຶ້ນ​ຢ່າງເປັນ​ທາງ​ການ ພາຍ​ໃຕ້​ການ​ເປັນ​ປະທານ​ຂອງ​ສະຫາຍ ກວນເພັດ ພວງມາລາ ກຳມະການສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ ເປັນກຽດເຂົ້າຮ່ວມກອງປະຊຸມໃນຄັ້ງນີ້ໂດຍ ສະຫາຍ ວັນເລີນ ປຸ້ຍໄມນີ ຮອງຫົວໜ້າຄະນະຈັດຕັ້ງແຂວງ, ສະຫາຍ ຄຳກອງ ລາວລີ ຮອງຫົວໜ້າພະແນກພາຍໃນແຂວງ, ມີພະນັກງານພາຍໃນຫ້ອງການຄະນະຊາວໜຸ່ມແຂວງເຂົ້າຮ່ວມທັງໝົດ 25 ສະຫາຍ, ຍິງ 13 ສະຫາຍ. ກອງ​ປະຊຸມໃນ​ຄັ້ງ​ນີ້​​ດຳ​ເນີນ​ໄປ​ເປັນ​ເວລາ 1 ວັນເຕັມ ເຊິ່ງທ່ານ​ປະທານ​ໄດ້​ນຳເອກະສານທີ່ສຳຄັນ 4 ເອກສານມາເຊື່ອມຊຶມ ໃຫ້ພະນັກງານສະມາຊິກພັກ ໃນນັ້ນປະກອບມີ: ບົດແນະນຳກ່ຽວກັບການກະກຽມດຳເນີນກອງປະຊຸມໃຫຍ່ຊາວໜຸ່ມແຕ່ລະຂັ້ນ, ດຳລັດວ່າດ້ວຍມາດຕະຖານຕຳແໜ່ງບໍລິຫານຂອງລັດຖະກອນແຫ່ງ ສປປລາວ ເລກທີ 461/ລບ, ລົງວັນທີ 9 ຕຸລາ 2012, ມະຕິວ່າດ້ວຍມາດຕະຖານຂອງພະນັກງານນຳພາຄຸ້ມຄອງ ເລກທີ 030/ກມສພ, ລົງວັນທີ 03 ມັງກອນ 2018 ແລະ ມະຕິວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ເລກທີ 032/ກມສພ, ລົງວັນທີ 03 ມັງກອນ 2018. ເພື່ອເປັນບ່ອນອີງໃນການທາ​ບທາມ​ລົງ​ຄະ​ແນນ​ສຽງ​ຄວາມ​ເຊື່ອ​ໝັ້ນຂອງບຸກຄົນ ເຂົ້າໃນຕຳແໜ່ງຕ່າງໆທີ່ກຳນົດໄວ້. ກອງປະຊຸມໄດ້ດຳເນີນໄປຕາມວາລະຂັ້ນຕອນຄື: ຮອບທີ I, ທີ II ແລະ ທີ III ຕາມລໍາດັບ, ເພື່ອຄັດເລືອກຈັດວາງຜູ້ທີ່ມີຄວາມຮູ້ຄວາມສາມາດ ເຂົ້າໄປບໍລິຫານຕາມໜ້າວຽກທີ່ເໜາະສົມ ກັບຄວາມຮູ້ຄວາມສາມາດຂອງແຕ່ລະສະຫາຍ.

                                                 ຂ່າວ: ວິໄລພອນ ສີວິໄຊ; ຊາວໜຸ່ມແຂວງບໍລິຄຳໄຊ

                                                                             020 55653639