ພິທີປະກາດຄະນະຊາວໜຸ່ມປະຊາຊົນປະຕິວັດລາວເມືອງປາກກະດິງ ເປັນເມືອງ ຊາວໜຸ່ມ 4 ບຸກ

ໂດຍປະຕິບັດຕາມບົດແນະນຳການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມປະຊາຊົນປະຕິວັດລາວສະບັບເລກທີ 096/ລຂ ລົງວັນທີ 22 ກຸມພາ 2012, ປະຕິບັດຕາມມະຕິກອງປະຊຸມຄົບຄະນະບໍລິຫານງານຊາວໜຸ່ມແຂວງບໍລິຄໍາໄຊ ຄັ້ງວັນທີ 3 ສະໄໝທີ V ແລະ ຜົນການກວດກາຮັບຮອງໜ່ວຍຊາວໜຸ່ມ 4 ບຸກ.

ໃນວັນທີ 12 ຕຸລາ 2017 ນີ້ ຢູ່ທີ່ສະໂມສອນດອກປິກໄກ່ເມືອງປາກກະດິງໄດ້ຈັດພິທີປະກາດຄະນະບໍລິຫານາງນເມືອງປາກກະດິງເປັນເມືອງຊາວໜຸ່ມ 4 ບຸກເຊິ່ງເປັນເມືອງທີ່ 4 ຂອງແຂວງບໍລິຄຳໄຊ . ເປັນກຽດເຂົ້າຮ່ວມພິທີໃນຄັ້ງນີ້ໂດຍທ່ານ ໂຄສະຈານ ແສນທະວີໄຊ ຄະນະປະຈຳພັກເມືອງ ຮອງເຈົ້າເມືອງ ປາກກະດິງ, ທ່ານ ນາງ ຄຳໃບ ບໍລິວັນ ຮອງເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວແຂວງບໍລິຄຳໄຊ, ມີແຂກຖຶກເຊີນ, ຊາວໜຸ່ມແຮກສ່ຽວອ້ອມຂ້າງເມືອງພ້ອມດ້ວຍສະມາຊິກຊາວໜຸ່ມເຂົ້າຮ່ວມຢ່າງພ້ອມພຽງ. ໃນພິທີ ສະຫາຍ ຄຳປາດຖະໜາ ສີສຸລາດ ຄະນະກຳມະການພັກເມືອງ ເລຂາຄະນະບໍລິຫານງານຊາວໜຸ່ມເມືອງໄດ້ຂື້ນຜ່ານບົດສະຫຼຸບໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກໃນສົກປີ 2016 ແລະ ທິດທາງແຜນການປີ 2017, ເມືອງປາກກະດິງປັດຈຸບັນມີສະມາຊິກຊາວໜຸ່ມທັງໝົດ 1881 ສະຫາຍ, ຍິງ 823 ສະຫາຍ. ປະກອບມີ 22 ຮາກຖານ,  113 ໜ່ວຍຂື້ນກັບ, ປັດຈຸບັນສາມາດເປີດກອງປະຊຸມໃຫ່ຍໄດ້ 22 ຮາກຖານ. ພາຍໃຕ້ການຊີ້ນຳ-ນຳພາຂອງຄະນະພັກ, ຄະນະບໍລິຫານງານຊາວໜຸ່ມປະຊາຊົນປະຕິວັດລາວແຂວງບໍລິຄຳໄຊ, ຄະນະບໍລິຫານງານຊາວໜຸ່ມປະຊາຊົນປະຕິວັດລາວເມືອງປາກກະດິງສາມາດຈັດຕັ້ງປະຕິບັດຂໍ້ແຂ່ງຂັນ 4 ບຸກ ຍາດໄດ້ຜົນງານທີ່ພົ້ນເດັ່ນຫຼາຍດ້ານເຫັນວ່າຖຶກຕ້ອງຕາມເງືອນໄຂ, ມາດຖານທີ່ສູນກາງຊາວໜຸ່ມປະຊາຊົນປະຕິວັດລາວວາງອອກ.

ໃນພິທີ ທ່ານ ນາງ ຄຳໃບ ບໍລິວັນ ຮອງເລຂາຄະນະບໍລິຫານງານຊາວໜຸ່ມແຂວງ ໄດ້ເປັນກຽດມອບໃບຢັ້ງຢືນ 4 ບຸກ ໃຫ້ຄະນະຊາວໜຸ່ມປະຊາຊົນປະຕິວັດລາວເມືອງປາກກະດິງ, ທ່ານ ໂຄສະຈານ ແສນທະວີໄຊ ຄະນະປະຈຳພັກເມືອງ ຮອງເຈົ້າເມືອງ ກໍ່ໄດ້ເປັນກຽດເປີດປ້າຍປະກາດ 4 ບຸກ  ແລະ ລັ່ນຄ້ອງເກົ້າບາດ ໂດຍຊ້ອງໜ້າແຂກທີ່ເຂົ້າຮ່ວມເປັນສັກຂີ່ພີຍານ, ພ້ອມດຽວກັນນັ້ນທ່ານຍັງໄດ້ມີຄຳເຫັນໂອ້ລົມ ກ່ອນອື່ນໝົດທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ ແລະ ເນັ້ນໜັກໃຫ້ຄະນະ ແລະ ສະມາຊິກຊາວໜຸ່ມທຸກສະຫາຍຈົ່ງໄດ້ເອົາໃຈໃສ່ຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ປະຈຳປີ 2017 ໂດຍຕິດພັນກັບໜ້າທີວິຊາສະເພາະ  ແລະ ຮັກສາມູນເຊື້ອນາມມະຍົດນີ້ໄວ້ຕະຫຼອດໄປ.

 ຂ່າວໂດຍ: ຈັນທະວົງ ພັນຍານຸວົງ 020 2851 6649