ກອງປະຊຸມໃຫຍ່ໜ່ວຍຮາກຖານຊາວໜຸ່ມພະແນກວິທະຍາສາດ ແລະ ເຕັກໂນ່ໂລຊີແຂວງວຽງຈັນ ຄັ້ງທີ II

ກອງປະຊຸມໃຫຍ່ຂອງໜ່ວຍຮາກຖານຊາວໜຸ່ມພະແນກວິທະຍາສາດ ແລະ ເຕັກໂນໂລຊີແຂວງວຽງຈັນ ໄດ້ຈັດຂຶ້ນໃນວັນທີ 03 ຕຸລາ 2017 ຢູ່ທີ່ຫ້ອງປະຊຸມພະແນກດັ່ງກ່າວ ພາຍໃຕ້ການເປັນປະທານຂອງ ສະຫາຍ ສີພອນ ຂຸນຄຳພັນ  ເລຂາໜ່ວຍຮາກຖານຊາວໜຸ່ມພະແນກແນກວິທະຍາສາດ ແລະ ເຕັກໂນ່ໂລຊີ ເປັນກຽດ ເຂົ້າຮ່ວມມີ ສະຫາຍ ຄຳສາຍ ສຸມຸນທອງ ເລຂາໜ່ວຍພັກ, ຫົວໜ້າພະແນກວິທະຍາສາດ ແລະ ເຕັກໂນ່ໂລຊີ ແຂວງວຽງຈັນ ແລະ ສະຫາຍ ຄຳເລ້ ໄຊຍະວົງສີ ຄະນະພັກ, ຮອງເລຂາ ຄະນະບໍລິຫານງານຊາວໜຸ່ມ ແຂວງວຽງຈັນ ປະທານກວດກາ ຄຊປປລ ແຂວງວຽງ ມີບັນດາຄະ ນະຊາວໜຸ່ມພະແນກການອ້ອມຂ້າງ ແລະ ສະມາຊິກຊາວໜຸ່ມພາຍໃນໜ່ວຍເຂົ້າຮ່ວມທັງໝົດ 28 ສະຫາຍ, ຍິງ 12 ສະ ຫາຍ.

ໃນກອງປະຊຸມ ໄດ້ຮັບຟັງບົດລາຍງານການເມືອງທັງສອງພາກ ສະເໜີໂດຍ ສະຫາຍ ສີພອນ ຂຸນຄຳພັນ ເຊິ່ງໄດ້ຍົກໃຫ້ເຫັນຜົນງານທີ່ຍາດມາໄດ້ໄລຍະ 05 ປີ ຜ່ານມາ ພ້ອມທັງຕີລາຄາຈຸດດີ, ຈຸດອ່ອນ, ຂໍ້ຄົງຄ້າງ, ບົດຮຽນທີ່ຖອດຖອນ ໄດ້ ແລະ ກຳນົດທິດທາງແຜນການເຄື່ອນໄຫວໃນຊຸມປີຕໍ່ໜ້າ. ກອງປະຊຸມໄດ້ມີຄວາມເປັນເອກະພາບສູງຕໍ່ບົດລາຍງານການເມືອງທັງສອງພາກ ສິ່ງສຳຄັນ ກອງປະຊຸມໄດ້ເປັນເອກະສັນຮັບຮອງເອົາທິດທາງໜ້າທີ່ລວມ ແລະ ຄາດໝາຍສູ້ຊົນແຕ່ນີ້ ຮອດປີ 2021 ຄື: ເພີ່ມທະວີເອົາໃຈໃສ່ສຶກສາອົບຮົມການເມືອງ – ແນວຄິດໃຫ້ບັນດາສະມາຊິກຊາວໜຸ່ມ ໃຫ້ມີນ້ຳໃຈຮັກຊາດ ຮັກລະບອບໃໝ່, ເຊື່ອໝັ້ນຕໍ່ການນຳພາຂອງພັກ, ບໍາລຸງສ້າງໃຫ້ສະມາຊິກຊາວໜຸ່ມມີຄຸນສົມບັດສິນທໍາປະຕິວັດ, ມີຄວາມຮູ້ ຄວາມສາມາດທາງດ້ານວິທະຍາສາດ-ເຕັກໂນໂລຊີ ແລະ ນະວັດຕະກຳໃໝ່, ເອົາໃຈໃສ່ປັບປຸງວຽກງານຊາວໜຸ່ມໃຫ້ມີຄວາມເຂັ້ມແຂງຮອບດ້ານເພື່ອຕ້ານ ແລະ ສະກັດກັ້ນປະກົດການຫຍໍ້ທໍ້ໃນຖັນແຖວຊາວໜຸ່ມ, ເອົາໃຈໃສ່ຊຸກຍູ້ ແລະ ນຳພາສະ ມາຊິກຊາວໜຸ່ມ ເຂົ້າສູ່ຂະບວນການຕ່າງໆຂອງພັກ, ຂອງລັດ, ຂອງຊາວໜຸ່ມຢ່າງເປັນເຈົ້າການ ແລະ ພ້ອມກັນ ຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງຊາວໜຸ່ມ ໃຫ້ເປັນຂະບວນຟົດຟື້ນ ເພື່ອຮັກສາມູນເຊື້ອນາມມະຍົດໜ່ວຍຊາວໜຸ່ມ 4 ບຸກຕະຫຼອດໄປ.

ກອງປະຊຸມຍັງໄດ້ປ່ອນບັດເລືອກຕັ້ງເອົາຄະນະໜ່ວຍຊາວໜຸ່ມສະໄໝທີ II ຈຳນວນ 3 ສະຫາຍ ໃນນີ້ ກອງປະຊຸມຄັ້ງປະຖົມມະລຶກໄດ້ຕົກລົງເປັນເອກະສັນເລືອກເອົາ ສະຫາຍ ສີພອນ ຂຸນຄຳພັນ  ເປັນເລຂາ, ສະຫາຍ ນາງ ລາວະດີ ແກ້ວຈອມສີ  ເປັນຮອງເລຂາ, ສະຫາຍ ເສດຖາ ກິ່ງສະດາ ເປັນຄະນະ, ກອງປະຊຸມຍັງໄດ້ເລືອກເອົາ ສະຫາຍ ນາງ ລາວະດີ ແກ້ວຈອມສີ ເປັນປະທານກວດກາ, ສະຫາຍ ນາງ ວິໄລພອນ ຂຽວທອງຄຸນ ເປັນຮອງປະທານກວດກາ.

ໃນຕອນທ້າຍກອງປະຊຸມ ຍັງໄດ້ຮັບຟັງການໂອ້ລົມ ແລະ ປະກອບຄຳຄິດຄຳເຫັນຈາກ ສະຫາຍ ຄຳສາຍ ສຸມຸນທອງ ແລະ ສະຫາຍ ຄຳເລ້ ໄຊຍະວົງສີ ເພື່ອເປັນທິດຊີ້ນຳ ແລະ ເປັນບ່ອນອີງໃຫ້ແກ່ການເຄື່ອນໄຫວວຽກງານຊາວໜຸ່ມໃນຊຸມປີຕໍ່ໜ້າ.

ຂ່າວໂດຍ: ຈັນທະສອນ ອິນທະວົງ