ໜ່ວຍຮາກຖານຊາວໜຸ່ມທະນາຄານພັດທະນາລາວສາຂາເມືອງໂພນໂຮງເປີດກອງປະຊຸມໃຫຍ່ຄັ້ງທີ IX.

ກອງປະຊຸມໃຫຍ່ຄັ້ງທີ IX ຂອງໜ່ວຍຮາກຖານຊາວໜຸ່ມທະນາຄານພັດທະນາລາວ ສາຂາ ເມືອງໂພນໂຮງ ແຂວງວຽງຈັນ ໄດ້ຈັດຂຶ້ນໃນວັນທີ 26 ສິງຫາ 2017 ຢູ່ທີ່ຫ້ອງປະຊຸມທະນາຄານດັ່ງກ່າວ ໂດຍພາຍໃຕ້ການເປັນປະທານຂອງ ສະຫາຍ ຈັນທະລາ ທິບທຳມະວົງ ຄະນະບໍລິຫານງານຊາວໜຸ່ມແຂວງວຽງຈັນ ເລຂາຊາວໜຸ່ມທະນາຄານພັດທະນາລາວ ເປັນກຽດ ເຂົ້າຮ່ວມມີ ສະຫາຍ ສະໝອນ ໄຊຊະນະວົງ ເລຂາໜ່ວຍພັກ, ຫົວໜ້າທະນາຄານພັດທະນາລາວສາຂາເມືອງໂພນໂຮງ ແລະ ສະຫາຍ ຄຳເລ້ ໄຊຍະວົງສີ ຄະນະພັກ ຮອງເລຂາຄະນະບໍລິຫານງານຊາວໜຸ່ມ ປປລ ແຂວງວຽງຈັນ, ມີບັນດາແຂກເຊີນ ຈາກອົງການຈັດຕັ້ງມະຫາຊົນ ແລະ ສະມາຊິກຊາວໜຸ່ມພາຍໃນໜ່ວຍເຂົ້າຮ່ວມທັງໝົດ 35 ສະຫາຍ, ຍິງ 16 ສະຫາຍ. 

ກອງປະຊຸມດັ່ງກ່າວ ໄດ້ຮັບຟັງບົດລາຍງານການເມືອງທັງສອງພາກ ເຊິ່ງສະເໜີໂດຍ ສະຫາຍ ຈັນທະລາ ທິບທຳມະວົງ ໂດຍໄດ້ຍົກໃຫ້ເຫັນຜົນງານທີ່ຍາດມາໄດ້ໄລຍະ 05 ປີ ຜ່ານມາ, ພ້ອມທັງຕີລາຄາຈຸດດີ, ຈຸດອ່ອນ, ຂໍ້ຄົງຄ້າງ, ບົດ ຮຽນທີ່ຖອດຖອນໄດ້ ແລະ ຜ່ານທິດທາງແຜນການ 05 ປີ ຕໍ່ໜ້າ. ກອງປະຊຸມໄດ້ມີຄວາມເປັນເອກະພາບສູງຕໍ່ບົດລາຍງານການ ເມືອງທັງສອງພາກ ສິ່ງສຳຄັນ ກອງປະຊຸມໄດ້ເປັນເອກະສັນຮັບຮອງເອົາທິດທາງໜ້າທີ່ລວມ ແລະ ຄາດໝາຍສູ້ຊົນແຕ່ນີ້ ຮອດປີ 2022 ຄື: ເພີ່ມທະວີເອົາໃຈໃສ່ສຶກສາອົບຮົມການເມືອງ – ແນວຄິດໃຫ້ບັນດາສະມາຊິກຊາວໜຸ່ມ ໃຫ້ມີນ້ຳໃຈຮັກຊາດ ຮັກລະບອບໃໝ່, ຕັ້ງໜ້າປະຕິບັດແນວທາງ, ມະຕິ, ຄຳສັ່ງຕ່າງໆຂອງພັກ, ກົດໝາຍຂອງລັດ, ແຜນພັດທະນາເສດຖະກິດ-ສັງຄົມ, ສ້າງຄະນະຊາວໜຸ່ມ-ສະມາຊິກຊາວໜຸ່ມໃຫ້ກາຍເປັນຄົນຮຸ້ນສືບທອດອຸດົມການປະຕິວັດ, ວັດທະນະທຳອັນດີງາມຂອງຊາດ ແລະ ເຫັນຄຸນຄ່າການອອກແຮງງານ, ຝຶກຝົນຫຼໍ່ຫຼອມສິນທຳປະຕິວັດ ເອົາໃຈໃສ່ຮ່ຳຮຽນເພິ່ງຕົນເອງ, ກຸ້ມຕົນເອງ ສ້າງຄວາມເຂັ້ມແຂງດ້ວຍຕົນເອງ ແລະ ເອົາໃຈໃສ່ຊຸກຍູ້  ແລະ ນຳພາສະມາຊິກຊາວໜຸ່ມເຂົ້າສູ່ຂະບວນການຕ່າງໆ ຂອງພັກ, ຂອງລັດ ແລະ ຂອງຊາວໜຸ່ມຢ່າງເປັນເຈົ້າການ. 

ກອງປະຊຸມຍັງໄດ້ປ່ອນບັດເລືອກຕັ້ງເອົາຄະນະຊາວໜຸ່ມຊຸດທີ IX ຈຳນວນ 3 ສະຫາຍ ໃນນີ້ ກອງປະຊຸມຄັ້ງປະ ຖົມມະລຶກໄດ້ຕົກລົງເປັນເອກະສັນເລືອກເອົາສະຫາຍ ຈັນທະລາ ທິບທຳມະວົງ ເປັນເລຂາ, ສະຫາຍ ອາລິສັກ ພານຸວົງ ເປັນຮອງເລຂາ, ສະຫາຍ ນາງ ພິມທອງ ສົມຈັນມະວົງ ເປັນຄະນະ, ກອງປະຊຸມໄດ້ເລືອກເອົາ ສະຫາຍ ອາລິສັກ ພານຸວົງ ເປັນປະທານກວດກາ, ສະຫາຍ ວິໄລຄຳ ແສນຈົງຮັກ ເປັນຮອງປະທານກວດກາ ແລະ ສະຫາຍ ສຸກສາຄອນ ເປັນຄະນະ. 

ໃນຕອນທ້າຍກອງປະຊຸມ ຍັງໄດ້ຮັບຟັງການໂອ້ລົມ ຂອງ ສະຫາຍ ສະໝອນ ໄຊຊນະວົງ ເລຂາໜ່ວຍພັກ, ຫົວ ໜ້າທະນາຄານພັດທະນາລາວສາຂາເມືອງໂພນໂຮງ ແລະ ສະຫາຍ ຄຳເລ້ ໄຊຍະວົງສີ ຄະນະພັກ ຮອງເລຂາຄະນະບໍລິຫານ ງານຊາວໜຸ່ມແຂວງວຽງຈັນ ເພື່ອເປັນບ່ອນອີງ,  ເປັນທິດຊີ້ນຳໃຫ້ແກ່ການເຄື່ອນໄຫວວຽກງານ ຊາວໜຸ່ມໃນຊຸມປີຕໍ່ໜ້າ. 

ຂ່າວໂດຍ: ຈັນທະສອນ ອິນທະວົງ 

020 22253997