ພິທີປະກາດຮັບຮອງຄະນະຊາວໜຸ່ມປະຊາຊົນປະຕິວັດລາວເມືອງທຸລະຄົມ ເປັນຄະນະ ຊປປລ 4 ບຸກ

ໃນຕອນເຊົ້າຂອງວັນທີ 02 ສິງຫາ 2017 ທີ່ຜ່ານມານີ້ ຄະນະຊາວໜຸ່ມ ປປລ ເມືອງທຸລະຄົມ ໄດ້ຈັດຕັ້ງພິທີປະ ກາດຮັບຮອງຄະນະ ຊປປລເມືອງທຸລະຄົມ ເປັນຄະນະ ຊປປລ 4 ບຸກຮອບທີ I ຂຶ້ນຢູ່ທີ່ສະໂມສອນຫ້ອງວ່າການປົກ ຄອງເມືອງທຸລະຄົມ ໂດຍພາຍໃຕ້ການເປັນປະທານຂອງ ສະຫາຍ ພົມ ສຸກສະຫວັນ ເລຂາຄະນະບໍລິຫານງານຊາວໜຸ່ມ ເມືອງທຸລະຄົມ ໃຫ້ກຽດເຂົ້າຮ່ວມມີ ສະຫາຍ ເສດໄຊ ວິໄລໄຟ ກຳມະການພັກແຂວງ ເລຂາພັກເມືອງ ເຈົ້າເມືອງໆ ທຸລະ ຄົມ, ສະຫາຍ ນາງ ຈັນທະຄອນ ສີອຳພອນ ກຳມະການພັກແຂວງ ກຳມະ ການສູນກາງຊາວໜຸ່ມ ເລຂາຄະນະບໍລິຫານງານຊາວໜຸ່ມແຂວງ ບັນດາສະຫາຍຄະນະປະຈຳພັກເມືອງ, ເລຂາຄະນະບໍລິຫານງານຊາວໜຸ່ມ 10 ເມືອງ,ຄະນະຊາວໜຸ່ມຫ້ອງການອ້ອມຂ້າງເມືອງ ແລະ ສະມາຊິກຊາວໜຸ່ມ-ເຍົາວະຊົນເຂົ້າຮ່ວມທັງໝົດ 148 ສະຫາຍ, ຍິງ 30 ສະຫາຍ.

ໃນພິທີ ສະຫາຍ ພົມ ສຸກສະຫວັນ ເລຂາຊາວໜຸ່ມເມືອງທຸລະຄົມ ໄດ້ຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງ ຂັນ 4 ບຸກສົກປີ 2016 – 2017 ພ້ອມທັງຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້. ຜ່ານການປະເມີນຜົນໂດຍອີງໃສ່ຖານມາດຖານຂໍ້ແຂ່ງຂັນ 4 ບຸກໃນແຕ່ລະດ້ານສາມາດປະຕິບັດໄດ້ຄື: ບຸກດ້ານແນວຄິດປະ ຕິບັດໄດ້ 85%, ດ້ານການຝຶກຝົນຫຼໍ່ຫຼອມຮ່ຳຮຽນ 90%, ດ້ານການປັບປຸງການຈັດຕັ້ງ 91% ແລະ ດ້ານການສ້າງວິຊາຊີບວຽກເຮັດງານທຳ 90%. ເພື່ອຢັ້ງຢືນຄືນຜົນງານໃນການຈັດຕັ້ງປະຕິບັດ ຂໍ້ແຂ່ງຂັນ 4 ບຸກ ໃນໄລຍະຜ່ານມາ ໄດ້ມີສະມາຊິກຫຼາຍສະຫາຍກາຍເປັນຕົວແບບ ໃນນີ້ ດີເດັ່ນກວ່າໝູ່ແມ່ນຄອບຄົວຂອງ ສະຫາຍ ນາງ ແມ໋ງ ສະມາຊິກຊາວໜຸ່ມບ້ານບຸ່ງພ້າວ ຕົວແບບດ້ານການປູກພືດປອດສານພິດ ສາມາດສ້າງ ລາຍຮັບເຂົ້າສູ່ຄອບຄົວ 144.000.000 ກີບຕໍ່ປີ ແລະ ຄອບຄົວ ສະຫາຍ ສາກົນ ເລຂາຊາວໜຸ່ມບ້ານເກິນກາງ ຕົວແບບດ້ານບໍລິການອຸດສາຫະກຳກົນຈັກ ສາມາດສ້າງລາຍຮັບເຂົ້າສູ່ຄອບຄົວ 225.000.000 ກີບຕໍ່ປີ. ຕໍ່ຜົນຂອງການປະເມີນໃນແຕ່ລະດ້ານເຫັນໄດ້ວ່າຄະນະຊາວໜຸ່ມ ປປລ ເມືອງທຸລະຄົມ ແມ່ນຖືກຕ້ອງຕາມເງື່ອນໄຂຂອງການສ້າງເມືອງຄະນະຊາວໜຸ່ມ 4 ບຸກ ໃນຮອບ 1 ສະໄໝທີ VII ເປັນເມືອງທີ 6 ຂອງແຂວງວຽງຈັນ ແລະ ເປັນອັນດັບ ທີ 90 ໃນ 148 ເມືອງ ທົ່ວປະເທດ.

ພິທີດັ່ງກ່າວ ສະຫາຍ ນາງ ຈັນທະຄອນ ສີອຳພອນ ໄດ້ໃຫ້ກຽດຂຶ້ນມອບໃບຢັ້ງຢືນ ຄະນະຊາວໜຸ່ມເມືອງ 4 ບຸກ ແລະ ໃບຍ້ອງຍໍໃຫ້ແກ່ຄະນະບໍລິຫານງານຊາວໜຸ່ມເມືອງ. ໃນຕອນທ້າຍຂອງພິທີ ສະຫາຍ ເສດໄຊ ວິໄລໄຟ ເລຂາພັກເມືອງ ເຈົ້າເມືອງໆ ທຸລະຄົມ ກໍ່ໄດ້ໃຫ້ກຽດໂອ້ລົມ ເຊິ່ງສະຫາຍໄດ້ສະແດງຄວາມຍ້ອງຍໍ ຊົມເຊີຍຕໍ່ຄະນະ ຊປປລ ເມືອງທຸລະຄົມ ກໍ່ຄືສະມາ ຊິກຊາວໜຸ່ມທົ່ວເມືອງທຸລະຄົມ ເຊິ່ງສະຫາຍໄດ້ຮຽກຮ້ອງມາຍັງຄະນະຊາວໜຸ່ມເມືອງຈົ່ງຮັກສາມູນ ເຊື້ອນາມມະຍົດ 4 ບຸກ ແລະ ພັດທະນາຄຸນນະພາບໃໝ່, ເອົາໃຈໃສ່ສົ່ງເສີມດ້ານຕັ້ງໜ້າ, ປັບປຸງແກ້ໄຂຈຸດອ່ອນ ແລະ ຂໍ້ຄົງຄ້າງ ໂດຍສະເພາະແມ່ນການປັບປຸງກົງຈັກການຈັດຕັ້ງຊາວໜຸ່ມຂັ້ນຮາກຖານບ້ານ, ສ້າງໃຫ້ຊາວໜຸ່ມມີຄວາມເຂັ້ມ ແຂງທາງດ້ານແນວຄິດ-ການເມືອງ, ເປັນເຈົ້າການໃນການຕ້ານ ແລະ ສະກັດກັ້ນປະກົດການຫຍໍ້ທໍ້ທີ່ເກີດຂຶ້ນໃນຖັນແຖວ ຊາວໜຸ່ມ-ເຍົາວະຊົນ ໂດຍສະເພາະແມ່ນບັນຫາຢາເສບຕິດ, ຂີ້ລັກງັດແງະ, ປຸ້ນຈີ້ຊີງຊັບ, ການຫຼິ່ນກິນຟຸມເຟືອຍ ແລະ ການນຳໃຊ້ສື່ອອນລາຍຕ່າງໆ ອັນເຮັດໃຫ້ເກີດຄວາມເສື່ອມເສຍໃຫ້ແກ່ການຈັດຕັ້ງກໍ່ຄືປະ ເທດຊາດ.

ພາບ ແລະ ຂ່າວໂດຍ: ຈັນທະສອນ ອິນທະວົງ