ຄຊປປລ ແຂວງວຽງຈັນສຳເລັດບັ້ນດຳເນີນຊີວິດການເມືອງປັບປຸງປົວແປງພັກ.

ກອງປະຊຸມບັ້ນດຳເນີນຊີວິດການເມືອງປັບປຸງປົວແປງພັກຂອງໜ່ວຍພັກຄະນະຊາວໜຸ່ມ ປປລ ແຂວງວຽງຈັນ ໄດ້ດຳເນີນມາເປັນເວລາ 3 ວັນ ແລະ ໄດ້ສຳເລັດລົງໃນວັນທີ 27 ກໍລະກົດ 2017 ຢູ່ທີ່ຫ້ອງປະຊຸມສະໂມສອນສູນພັດ ທະນາຊາວໜຸ່ມ – ເຍົາວະຊົນແຂວງວຽງຈັນ ໂດຍການໃຫ້ກຽດເປັນປະທານຂອງ ສະຫາຍ ທອງສະຫວັນ ວົງສຳພັນ ຄະ ນະປະຈຳພັກແຂວງ ຜູ້ຊີ້ນຳອົງການຈັດຕັ້ງມະຫາຊົນຂັ້ນແຂວງ ມີ ສະຫາຍ ນາງ ຈັນທະຄອນ ສີອຳພອນ ກຳມະການພັກແຂວງ ເລຂາໜ່ວຍພັກຄະນະຊາວໜຸ່ມ ປປລ ແຂວງ ພ້ອມດ້ວຍຄະນະ ແລະ ສະມາຊິກພັກເຂົ້າຮ່ວມທັງໝົດ 20 ສະ ຫາຍ, ຍິງ 8 ສະຫາຍ, ສະມາຊິກສຳຮອງ 2 ສະຫາຍ, ຍິງ 1 ສະຫາຍ.

ກອງປະຊຸມຄັ້ງນີ້ໄດ້ສຸມໃສ່ໃນການເຊື່ອມຊຶມເອກະສານເດັດດ່ຽວປັບປຸງປົວແປງພັກໃຫ້ມີຄວາມປອດໃສ, ເຂັ້ມ ແຂງ ແລະ ໜັກແໜ້ນ, ບົດສະຫຼຸບຕີລາຄາຄວາມຮັບຜິດຊອບຂອງຄະນະພັກ ໃນການຈັດຕັ້ງປະຕິບັດວຽກງານຮອບ ດ້ານໃນໄລຍະຜ່ານມາ ໂດຍສະເພາະແມ່ນການປະຕິບັດມະຕິ X ຂອງພັກ, ມະຕິ V ຂອງອົງຄະນະພັກແຂວງ ແລະ ມະຕິ IV ຂອງໜ່ວຍພັກ ຄະນະຊາວໜຸ່ມ ປປລ ແຂວງວຽງຈັນ, ເພື່ອເປັນບ່ອນອີງໃນການດຳເນີນສຳຫຼວດບຸກຄົນ, ຄະນະພັກ, ສະມາຊິກແຕ່ລະສະຫາຍ, ນອກນີ້ ຍັງໄດ້ຜ່ານບົດສຳຫຼວດຕົນເອງ ແລະ ປະກອບຄຳເຫັນ, ຄຳຕຳນິຕິຊົມ ເພື່ອຊ່ວຍເຫຼືອເຊິ່ງກັນ ແລະ ກັນຢ່າງມີບັນຍາກາດຟົດຟື້ນ ແລະ ສ້າງສັນ, ມີຄວາມເປັນເອກະພາບ, ຮັບປະກັນໄດ້ຄວາມສາມັກຄີ ເຊິ່ງມັນໄດ້ກາຍເປັນບາດລ້ຽວທີ່ສຳຄັນໃນການປັບປຸງປົວແປງພັກຂອງໜ່ວຍພັກຄະນະຊາວໜຸ່ມ ປປລ ແຂວງວຽງຈັນ ພ້ອມກັນນັ້ນ ຍັງມີການປະກອບຄຳຄິດຄຳເຫັນ ແລະ ທາບທາມຄວາມເຊື່ອໝັ້ນໄວ້ວາງໃຈຕໍ່ບຸກຄົນພາຍໃນຄະນະບໍລິຫານງານພັກແຂວງ ແລະ ຄະນະໜ່ວຍພັກຄະນະ ຊປປລ ແຂວງວຽງຈັນ ເພື່ອເປັນການເສີມຂະຫຍາຍ ປະຊາທິປະໄຕຂອງຕົນຕາມຫຼັກການຂອງພັກ.

ໃນຕອນທ້າຍ ສະຫາຍ ທອງສະຫວັນ ວົງສຳພັນ ຄະນະປະຈຳພັກແຂວງ ຜູ້ຊີ້ນໍາອົງການຈັດຕັ້ງມະຫາຊົນຂັ້ນແຂວງ ໄດ້ໂອ້ລົມຕໍ່ກອງປະຊຸມ ພ້ອມທັງເນັ້ນໃຫ້ຄະນະພັກ, ສະມາຊິກພັກ ຈົ່ງພ້ອມກັນຜັນຂະຫຍາຍເນື້ອໃນກອງປະ ຊຸມບັ້ນດຳເນີນຊີວິດການເມືອງໃຫ້ເປັນຮູບປະທຳເທື່ອລະກ້າວ, ພ້ອມກັນຕັດສິນໃຈໃຫ້ມີການປ່ຽນແປງຕາມທິດນຳຂອງພັກຢ່າງແທ້ຈິງ, ສ້າງຄວາມສາມັກຄີເປັນເອກະພາຍໃນຄະນະພັກ, ສະມາຊິກພັກໃຫ້ແໜ້ນແຟ້ນ ເຮັດໃຫ້ການຈັດຕັ້ງພັກ ມີຄວາມປອດໃສ ແລະ ເຂັ້ມແຂງ