ກອງປະຊຸມໃຫຍ່ຄັ້ງທີ II ຂອງຮາກຖານຊາວໜຸ່ມພະແນກຊັບພະຍາກອນ ທຳມະຊາດ ແລະ ສິ່ງແວດລ້ອມ ແຂວງ

ໃນວັນທີ 3 ສິງຫາ 2017 ຢູ່ທີ່ຫ້ອງປະຊຸມ ຂອງ​ພະ​ແນ​ກຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ແຂວງ ໄດ້ເປີດກອງປະຊຸມໃຫຍ່ ຄັ້ງທີ II ຊາວໜຸ່ມຂອງຕົນຂຶ້ນ ເປັນກຽດເຂົ້າຮ່ວມກອງປະຊຸມໃນຄັ້ງນີ້ມີ ທ່ານ ກວນ​ເພັດ ພວງມາລາກຳມະການ​ສູນ​ກາງ​ຊາວໜຸ່ມປະຊາຊົນ​ປະຕິວັດ​ລາວ ເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ, ທ່ານ ສົມ​ສະຫງວນ ສຸວັນນະ​ລາດ ເລຂາຄະນະພັກຮາກ​ຖານ, ຫົວໜ້າ​ພະ​ແນ​ກຊັບພະຍາກອນ​ທຳ​ມະ​ຊາດ ​ແລະ ສິ່ງແວດ​ລ້ອມແຂວງ, ມີແຂກຖືກເຊີນ, ຊາວໜຸ່ມແຮກສ່ຽວອ້ອມ​ຂ້າງ ພ້ອມສະມາຊິກຊາວໜຸ່ມເຂົ້າຮ່ວມ 60 ສະຫາຍ, ຍິງ 25 ສະຫາຍ.

ກອງປະຊຸມສະຫາຍ ລົມ​ເຢັນ ສີ​ສຸ​ວົງ ​ເລຂາຊາວໜຸ່ມຮາກ​ຖານ​ພະ​ແນ​ກຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ​ແຂວງ ໄດ້ຂຶ້ນຜ່ານບົດສະຫຼຸບການເຄື່ອນໄຫວໜ້າທີ່ວຽກງານຂອງຊາວໜຸ່ມໃນໄລຍະ 5 ປີຜ່ານມາ ແລະ ທິດທາງແຜນການຕໍ່ໜ້າ ເຊິ່ງໄດ້ສະແດງອອກຄື: ດ້ານການເມືອງແນວຄິດ: ຄະນະຊາວໜຸ່ມທຸກຂັ້ນໄດ້ຖືເອົາວຽກງານການສຶກສາອົບຮົມການເມືອງ-ແນວຄິດເປັນກົກແນໃສ່ສ້າງຊາວໜຸ່ມຕິດພັນກັບການປຸກລະດົມສ້າງຂະບວນການດ້ານຕ່າງໆ ສ້າງເງື່ອນໄຂໃຫ້ພະນັກ ງານຊາວໜຸ່ມ ໄດ້ຮໍ່າຮຽນແນວທາງນະໂຍບາຍຂອງພັກ, ມະຕິ, ຄຳສັ່ງ, ລະບຽບກົດໝາຍ, ແຜນພັດທະນາເສດ ຖະກິດ-ສັງຄົມຂອງລັດເປັນຕົ້ນ: ກົດໝາຍວ່າດ້ວຍ ຄຊປປລ ແລະ ເອກະສານຂໍ້ແຂ່ງຂັນ 4 ບຸກຂອງສູນກາງຊາວໜຸ່ມວາງອອກ, ຮາກຖານຊາວໜຸ່ມພະ​ແນ​ກຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ​ແຂວງ ມີສະມາຊິກຊາວໜຸ່ມທັງໝົດ 104 ສະຫາຍ, ຍິງ 44 ສະຫາຍ ປະກອບ​ມີ 5 ໜ່ວຍຊາວໜຸ່ມທີ່​ຂື້ນ​ກັບ, ກອງປະຊຸມໄດ້ປ່ອນບັດຄັດເລືອກເອົາເລຂາຮາກຖານຊາວໜຸ່ມຊຸດໃໝ່ ໂດຍມີຜູ້​ສະໝັກທັງໝົດ 7 ສະຫາຍ, ຍິງ 2 ສະຫາຍ ​ໂດຍເລືອກເອົາ 5 ສະຫາຍ, ກອງປະຊຸມຄັ້ງປະຖົມມະລຶກ ​ໄດ້ເລືອກເອົາສະຫາຍ ລົມ​ເຢັນ​ ສີ​ສຸ​ວົງ ເປັນເລຂາ, ສະຫາຍ ຄຳ​ປະ​ເສີດ ​ແກ້ວມະນີ​ ເປັນຮອງ, ສະຫາຍ ສອນ​ໄຊ ​ໄຊ​ຍະ​ວົງ​ສີ ເປັນຮອງທັງເປັນຜູ້ກວດກາ, ສະຫາຍ ນາງ ວຽງຄຳ ຍົດ​ບຸນ​ເຮືອງ ​ເປັນ​ຄະນະ,

ສະຫາຍ ມີ​ໄຊ ​ເພັດ​ສະ​ລາດ ​ເປັນ​ຄະນະ ຕອນທ້າຍກອງປະຊຸມຍັງໄດ້ຮັບຟັງການໂອ້ລົມ ແລະ ໃຫ້ທິດຊີ້ນຳຈາກ ທ່ານ ກວນ​ເພັດ ພວງມາລາ ​ເລຂາ​ຄະນະ​ບໍລິຫານ​ງານ​ຊາວໜຸ່ມ​ແຂວງ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ ແລະ ທ່ານໄດ້ເນັ້ນໜັກໃຫ້ຄະນະຊາວໜຸ່ມຊຸດໃໝ່ ຈົ່ງນຳເອົາເນື້ອໃນມະຕິກອງປະຊຸມໃຫຍ່ຄັ້ງນີ້ ໄປຈັດຕັ້ງຜັນຂະຫຍາຍໃຫ້ປະກົດຜົນເປັນຈິງ, ເປັນແບບຢ່າງນຳພາໃນທຸກດ້ານ, ເປັນກຳລັງແຮງທີ່ຫ້າວຫັນ, ແຂງແຮງໃຫ້ແກ່ຄະນະພັກ ເພີ່ມທະວີຄວາມສາມັກຄີເປັນເອກະພາບຢ່າງສູງພາຍໃຕ້ການນຳພາຂອງພັກ, ພ້ອມກັນບຸກບືນກ້າວຂຶ້ນຢ່າງບໍ່ຢຸດຢັ້ງ.

                                           ຂ່າວ: ຈັນທະ​ວົງ ພັນ​ຍານຸວົງ ນັກຂ່າວຊາວໜຸ່ມ 020 2851 6649