ຄຊປປລ ແຂວງບໍລິຄໍາໄຊ ລົງເຜີຍແຜ່ເອກະສານຜົນຮ້າຍຂອງຢາເສບຕິດ ຢູ່ສູນປິ່ນປົວ – ຟື້ນຟູສຸຂະພາບ ແລະ ຝຶກວິຊາຊີບຜູ້ຕິດຢາເສບຕິດ ໜອງດົງ

IMG_8332

ຕອນເຊົ້າຂອງວັນທີ 27 ມິຖຸນາ 2017 ຢູ່ທີ່ສູນປິ່ນປົວ-ຟື້ນຟູສຸຂະພາບ ແລະ ຝຶກວິຊາຊີບຜູ້ຕິດຢາເສບຕິດ ໜອງດົງ, ທ່ານນາງ ຄໍາໃບ ບໍລິວັນ ຮອງເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວແຂວງບໍລິຄໍາໄຊ, ມີຂະແໜງອົບຮົມຄະນະຊາວໜຸ່ມແຂວງ ລົງພົບປະ ແລະ ອົບຮົມແນວຄິດໃຫ້ນັກໂທດ, ຜູ້ຕ້ອງຫາ ແລະ ຜູ້ຫຼົງຜິດຢູ່ທີ່ສູນປິ່ນປົວ-ຟື້ນຟູສຸຂະພາບ ແລະ ຝຶກວິຊາຊີບຜູ້ຕິດຢາເສບຕິດ ໜອງດົງແຂວງບໍລິຄໍາໄຊ ເຊິ່ງມີເຂົ້າຜູ້ຮ່ວມທັງໝົດ 138 ຄົນ, ຍິງ 5 ຄົນ.

ຈຸດປະສົງແມ່ນເພື່ອນໍາເອົາເອກະສານຕ້ານ ແລະ ສະກັດກັ້ນປະກົດການຫຍໍ້ທໍ້ໃນໝູ່ໄວໜຸ່ມ-ຊາວໜຸ່ມ, ເພື່ອເຊື່ອມຊຶມໃຫ້ໄວໜຸ່ມ-ຊາວໜຸ່ມຜູ້ທີ່ຫຼົງຜິດ ແລະ ຕົກເປັນທາດຂອງຢາເສບຕິດ, ໄດ້ຮັບຮູ້, ເຂົ້າໃຈ ແລະ ພ້ອມກັນກັບຕົວ, ກັບໃຈໃຫ້ກາຍເປັນຄົນດີຂອງສັງຄົມ, ເພາະຜົນຮ້າຍຂອງຢາເສບຕິດມີຄື: ຢາເສບຕິດແມ່ນສານກະຕຸ້ນ ຫຼື ລະງັບລະບົບປະສາດ, ເມື່ອເສບເຂົ້າໄປແລ້ວຈະມີຜົນກະທົບຢ່າງຮຸນແຮງຕໍ່ຮ່າງກາຍ, ຕໍ່ສະໝອງເຮັດໃຫ້ເປັນບ້າເສຍຈິດ, ຕໍ່ລະບົບປະສາດ, ເສຍອະນາຄົດ ແລະ ເສຍຊີວິດໄດ້.  ຢາເສບຕິດນອກຈາກຈະມີຜົນຮ້າຍຕໍ່ຜູ້ເສບແລ້ວ ຍັງມີຜົນຮ້າຍຕໍ່ປະເທດຊາດ, ຕໍ່ສັງຄົມ ແລະ ຄອບຄົວອີກດ້ວຍ. ຊາວໜຸ່ມເປັນແຂນຂວາຂອງພັກ, ເປັນກຳລັງແຮງກະດູກສັນຫຼັງຂອງປະເທດຊາດຈົ່ງຫ່າງໄກຢາເສບຕິດ. ໂອກາດດຽວກັນນີ້ທິມງານຄະນະບໍລິຫານງານຊາວໜຸ່ມແຂວງບໍລິຄຳໄຊ ຍັງໄດ້ນຳວາລະສານ, ປຶ້ມຄູ່ມື ແລະ ສາລະໜ້າຮູ້ຕ່າງໆ ແຈກຢາຍໃຫ້ຊາວໜຸ່ມຕ້ອງຫາທີ່ກຳລັງປິ່ນປົວຟື້ນຟູສຸຂະພາບໃນສູນໜອງດົງ ໄດ້ນຳໄປອ່ານເພື່ອເປັນປະໂຫຍດທີ່ດີແກ່ເຂົາເຈົ້າອີກດ້ວຍ.

ຂ່າວ ວິໄລພອນ ສີວິໄຊ

020 5565 3639

IMG_8343