ຄະນະບໍລິຫານງານຊາວໜຸ່ມແຂວງບໍລິຄຳໄຊຊ່ວຍປຸກເຮືອນໃຫ້ປະຊາຊົນທຸກຍາກ ບ້ານນາໄໝ

IMG_8215IMG_8175

IMG_8184ປະຕິບັດຕາມ ມະຕິກອງປະຊຸມຄົບຄະນະບໍລິຫານງານຊາວໜຸ່ມແຂວງບໍລິຄຳໄຊ ຄັ້ງທີ 3 ສະໄໝທີ V. ໂດຍສະເພາະແມ່ນກິດຈະກຳຕອບບຸນແທນຄຸນຂອງຄະນະບໍລິຫານງານຊາວໜຸ່ມ ໄດ້ວາງອອກໃຫ້ປະກົດຜົນເປັນຈິງ. ໃນວັນທີ 22 ມິຖຸນາ 2017 ທີ່ຜ່ານມານີ້ ທ່ານ ທະນູວັນ ວົງມະນີ ຮອງເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ ພ້ອມທິມງານ ມີສະມາຄົມນັກທຸລະກິດໜຸ່ມແຂວງ, ອົງການແນວລາວສ້າງຊາດແຂວງ, ສະຫະພັນກຳມະບານແຂວງ, ຊາວໜຸ່ມເມືອງປາກຊັນ, ຮາກຖານ, ໜ່ວຍຊາວໜຸ່ມອ້ອມຂ້າງ ແລະ ພະນັກງານຊາວໜຸ່ມແຂວງທັງໝົດ , ໄດ້ນຳເງິນ, ແຮງງານທີ່ລະດົມຈາກສະມາຄົມນັກທຸລະກິດໜຸ່ມແຂວງ, ຄະນະຊາວໜຸ່ມເມືອງປາກຊັນ, ຮາກຖານ, ໜ່ວຍ, ຊາວໜຸ່ມອ້ອມຂ້າງແຂວງ ແລະ ຊາວໜຸ່ມແຮກສ່ຽວ ໄປຊ່ວຍເຫຼືອປະຊາຊົນທຸກຍາກ ອະນາຖາ ຢູ່ບ້ານນາໄໝ, ເມືອງປາກຊັນ ໂດຍການປຸກເຮືອນທີ່ແໜ້ນໜາຖາວອນຂະ ໜາດ 6×7 ແມັດ, ໜຶ່ງຫຼັງ ໃຫ້ແກ່ ນາງ ຈາຍ ໃບວິຫານ, ອາຍຸ 50 ປີ, ໂດຍໄດ້ມອບເປັນວັດຖຸເຊັ່ນ: ກະເບື້ອງ, ຊີມັງ, ດິນບອກກໍ່ຝາ, ເຫຼັກ, ຫີນ ແລະ ຊາຍ. ລວມມູນຄ່າການກໍ່ສ້າງທັງໝົດ ຈຳນວນ 6,500,.000 ກີບ,  ກ່າວມອບໂດຍ ທ່ານ ທະນູວັນ ວົງມະນີ ຮອງເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ, ກ່າວຮັບໂດຍ ນ. ຈ່າຍ ໃບວິຫານ ຄອບຄົວທຸກຍາກອະນາຖາ ໂດຍຊ້ອງໜ້າອຳນາດການປົກຄອງບ້ານ, ສະມາຄົມນັກທຸລະກິດໜຸ່ມແຂວງ, ອົງການຈັດຕັ້ງພາຄີ, ຄະນະຮາກຖານ, ຄະນະໜ່ວຍ ພ້ອມສະມາຊິກຊາວໜຸ່ມເຂົ້າຮ່ວມຢ່າງພ້ອມພຽງ. ພາຍຫຼັງສຳເລັດພິທີມອບ-ຮັບຢ່າງເປັນທາງການ ຫົວໜ້າທິມງານກໍ່ນຳພາສະມາຊິກຊາວໜຸ່ມ ອອກແຮງມຸງຫຼັງຄາ, ກໍ່ຝາ 20 ສໍາເລັດ, ເອົາດິນເຂົ້າຖົມພື້ນ ເຊິ່ງສາມາດເຮັດໃຫ້ຫຼຸດຜ່ອນຄ່າໃຊ້ຈ່າຍລົງໄດ້ ສ່ວນໃດສ່ວນໜຶ່ງ ແລະ ເຫັນໄດ້ຄວາມສາມັກຄີເອື້ອເຝື້ອເພື່ອແຜ່ຊວຍເຫຼືອເຊິ່ງກັນ ແລະ ກັນ, ເຊິ່ງນາງ ຈາຍ ເອງກໍ່ມີຄວາມດີອົກດີໃຈ ແລະ ສະແດງຄວາມຂອບໃຈຕໍ່ຄະນະບໍລິຫານງານຊາວໜຸ່ມແຂວງ, ສະມາຄົມນັກທຸລະກິດໜຸ່ມ, ຕະຫຼອດຮອດອຳນາດການປົກຄອງພັກ-ລັດ ທຸກພາກສ່ວນທີ່ໃຫ້ການຊ່ວຍເຫຼືອເບິ່ງແຍງບັນເທົາທຸກ ຕໍ່ຄອບຄົວທຸກຍາກອະນາຖາ, ດ້ອຍໂອກາດ ເຮັດໃຫ້ຄອບຄົວຜູ້ກ່ຽວໄດ້ຢູ່ເຮືອນທີ່ແໜ້ນໜາຖາວອນຄືກັບຊາວບ້ານຄົນອື່ນໆ. ຄະນະບໍລິຫານງານຊາວໜຸ່ມແຂວງ ຈົ່ງສືບຕໍ່ປະຕິບັດກິດຈະກໍາດັ່ງກ່າວຕະຫຼອດໄປຢ່າງທົ່ວເຖິງ.

ຂ່າວ: ວິໄລພອນ ສີວິໄຊ; 020 55653639