ຂໍ້ແຂ່ງຂັນ 4 ບຸກຂອງຊາວໜຸ່ມແຂວງວຽງຈັນໄດ້ຮັບການຜັນຂະຫຍາຍຢ່າງເປັນຮູບປະທຳ

17976783_1284398431643882_1095624715_o18015884_1284398454977213_1245223534_o

18015800_1284398421643883_1519260669_o18053250_1284398428310549_1261641068_o

ສະມາຊິກຊາວໜຸ່ມປະຊາຊົນປະຕິວັດລາວທົ່ວແຂວງວຽງຈັນໄດ້ພ້ອມກັນນຳເອົາເນື້ອໃນຂໍ້ແຂ່ງຂັນ 4 ບຸກຂອງ ຊາວໜຸ່ມມາຈັດຕັ້ງຜັນຂະຫຍາຍໃຫ້ເກີດເປັນຮູບປະທຳ.ຊີ້ໃຫ້ເຫັນການຮັບຮອງໜ່ວຍຊາວໜຸ່ມ 4 ບຸກໃນໜຶ່ງ ປີຜ່ານມາໄດ້ 513 ໜ່ວຍຂອງຈຳນວນ 763 ໜ່ວຍທົ່ວແຂວງ,ປະກາດເມືອງ 4 ບຸກໄດ້ 5 ເມືອງຂອງຈຳນວນ 11 ເມືອງທົ່ວແຂວງ.

ຜົນງານດັ່ງກ່າວໄດ້ຮັບການລາຍງານໃນກອງປະຊຸມຄົບຄະນະບໍລິຫານງານຊາວໜຸ່ມແຂວງວຽງຈັນຄັ້ງທີ III ສະ ໄໝທີ VII ທີ່ໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 28 ມີນາປີ 2017 ນີ້ຢູ່ທີ່ຫ້ອງວ່າການປົກ ຄອງແຂວງວຽງຈັນ ໂດຍການເປັນກຽດເຂົ້າຮ່ວມຂອງ ທ່ານ ທອງສະຫວັນ ວົງສຳພັນ ຄະນະປະຈຳພັກ ແຂວງ,ປະທານແນວລາວສ້າງຊາດ, ທັງເປັນຜູ້ຊີ້ນຳອົງການຈັດຕັ້ງມະຫາຊົນຂັ້ນແຂວງ, ມີຄະນະບໍລິຫ່ນງານ ຊາວໜຸ່ມ, ເລຂາຊາວໜຸ່ມ 11 ເມືອງແລະພະແນກການອ້ອມຂ້າງແຂວງເຂົ້າຮ່ວມຢ່າງພ້ອມພຽງ.

ທ່ານ ນາງຈັນທະຄອນ ສີອຳພອນ ກຳມະການພັກແຂວງ, ເລຂາຄະນະບໍລິຫານງານຊາວໜຸ່ມແຂວງວຽງຈັນ ໄດ້ກ່າວໃນກອງປະຊຸມຄັ້ງນີ້ວ່າ: ປີ 2016 ຜ່ານມາສາມາຊິກຊາວໜຸ່ມແຂວງວຽງຈັນ ຈຳນວນ 763 ໜ່ວຍທົ່ວແຂວງໄດ້ພ້ອມກັນນຳເອົາເນື້ອໃນຂໍ້ແຂ່ງຂັນ 4 ບຸກຂອງຊາວໜຸ່ມໄປຜັນຂະຫຍາຍສ້າງເປັນແຜນ ການລະອຽດຈັບມືແຂ່ງຂັນກັນໃນຈຳນວນສາມາຊິກຊາວໜຸ່ມ 25.009 ສະຫາຍ, ຍິງ10.801 ສະຫາຍໃຫ້ຂໍ້ແຂ່ງຂັນດັ່ງກ່າວເກີດເປັນຮູບປະທຳຢ່າງແທ້ຈິງເຊິ່ງສະແດງອອກ ໃຫ້ເຫັນວ່າໃນ 1 ປີຜ່ານມາສາມາດປະກາດໜ່ວຍ 4 ບຸກໄດ້ທັງໝົດ 513 ໜ່ວຍຂອງຈຳນວນ 763 ໜ່ວຍທົ່ວແຂວງ, ແລະ ປະກາດຮັບຮອງເມືອງ 4 ບຸກໄດ້ 5 ເມືອງຂອງຈຳນວນ 11 ເມືອງທົ່ວແຂວງ.

ທ່ານເລຂາຄະນະບໍລິຫານງານຊາວໜຸ່ມແຂວງວຽງຈັນກ່າວຕື່ມອີກວ່າ: ໃນປີ 2017 ນີ້ຄະນະບໍລິຫານຊາວໜຸ່ມ ແຂວງວຽງຈັນຈະສູ້ຊົນປະຕິບັດຂໍ້ແຂ່ງຂັນ 4 ບຸກຂອງຕົນເອງແຕ່ລະຂໍ້ໃຫ້ໄດ້ດັ່ງນີ້: ບຸກດ້ານແນວຄິດໃຫ້ໄດ້ 90% ໂດຍເລັ່ງໃສ່ສຶກສາອົບຮົມການເມືອງແນວຄິດໃຫ້ແກ່ສະມາຊິກຊາວໜຸ່ມໃຫ້ທົ່ວເຖິງ,ຈັດຕັ້ງປາທະກະຖາ ເລົ່າມູນເຊື້ອໃນວັນສຳຄັນຕ່າງຕ່າງຂອງພັກ ,ຂອງຊາດ, ຂອງກອງທັບ ແລະ ຂອງຄະນະຊາວໜຸ່ມໃຫ້ກ້ວາງຂວາງ ແລະທົ່ວເຖິງ, ບຸກດ້ານການຝຶກຝົນຮໍ່າຮຽນໃຫ້ໄດ້ 95 % ເລັ່ງໃສ່ຝຶກຝົນຮຽນຮູ້,ນຳໃຊ້ວິທະຍາສາດເຕັກໂນໂລຊີ ທີ່ທັນສະໄໝໃນຍຸກປະຈຸບັນຄຽງຄູ່ກັບການຮໍ່າຮຽນວິຊາຊີບ,ວິຊາສະເພາະ,ວັດທະນະທຳຮີດຄອງປະເພນີຂອງຊາດ,ຂອງເຜົ່າໃຫ້ທົ່ວເຖິງ.ບຸກທາງດ້ານການ ຈັດຕັ້ງໃຫ້ໄດ້ 90 %ໂດຍເລັ່ງໃສ່ຮຽນຮູ້ແບບແຜນວິທີເຮັດວຽກ, ຍົກສູງຄວາມຮັບຜິດຊອບຂອງຊາວໜຸ່ມໃຫ້ສູງຂຶ້ນ, ມີສະຕິຕໍ່ການຈັດຕັ້ງແລະເຄົາລົບລະບຽບກົດໝາຍຢ່າງ ເຂັ້ມງວດ, ຂະຫຍາຍສາມະຫາຊົນຜູ້ກ້າວໜ້າເຂົ້າເປັນສາມາຊິກຊາວໜຸ່ມໃຫ້ມີຄຸນນະພາບດີຂຶ້ນ ແລະບຸກດ້ານວິ ຊາຊີບແລະສ້າງວຽກເຮັດງານທຳໃຫ້ໄດ້ 85 %ເລັ່ງໃສ່ສ້າງທຸກເງື່ອນໄຂໃຫ້ຊາວໜຸ່ມໄດ້ເຂົ້າເຖິງວຽກເຮັດງານທຳ, ຈັດຕັ້ງຝຶກອົບຮົມຕ່າງໆໃຫ້ແກ່ຊາວໜຸ່ມທີ່ດ້ອຍໂອກາດ, ເຂດຫ່າງໄກສອກຫຼີກ, ຄອບ ຄົວທຸກຍາກ,ຂາດ ທຶນຮອນໃນການສືກສາດ້ວຍການຝຶກອົບຮົມ ຊ່າງເສີມສວຍ, ຕັດຫຍິບ, ປຸງແຕ່ງ, ຊ່າງໄມ້, ຊ່າງກໍ່ສ້າງແລະ ສ້ອມແປງອຶ່ນໆທີ່ເຮັດໃຫ້ເຂົາເຈົ້າມີວຽກເຮັດງານທຳທີ່ໝັ້ນຄົງ.