ທ່ານ ເຈົ້າແຂວງ ຊີ້ນໍາວຽກງານຊາວໜຸ່ມ ທົ່ວແຂວງອຸດົມໄຊ ໃນໂອກາດວັນສ້າງຕັ້ງ ຊາວໜຸ່ມ ຄົບຮອບ 62 ປີ

DSCF5201DSCF5205

DSCF5218ໃນຕອນເຊົ້າຂອງວັນທີ 11 ເມສາ 2017 ນີ້ທີ່ສະໂມສອນຂອງແຂວງອຸດົມໄຊ ໄດ້ຈັດພິທີຮັບຟັງການໂອ້ລົມຂອງທ່ານ ເພັດສາຄອນ ຫຼວງອາໄພ, ກໍາມະການສູນກາງພັກ, ເລຂາຄະນະພັກແຂວງ,ເຈົ້າແຂວງ ແຂວງອຸດົມໄຊ, ໂດຍມີທ່ານ ໂອວາດ ຈັນທະວົງ ຄະນະປະຈໍາພັກແຂວງ ປະທານແນວລາວສ້າງຊາດແຂວງ, ມີຄະນະປະຈໍາຊາວໜຸ່ມ, ຄະນະບໍລິຫານງານຊາວໜຸ່ມແຂວງ, ເລຂາໜ່ວຍຊາວໜຸ່ມພະແນກການ, ຕະຫຼອດຮອດສະມາຊິກຊາວໜຸ່ມ ຈາກພາກສ່ວນຕ່າງໆ ເຂົ້າຮ່ວມຢ່າງພ້ອມພຽງ.

          ໃນພິທີໄດ້ຮັບຟັງການລາຍງານການຈັດຕັ້ງປະຕິບັດວຽກງານຊາວໜຸ່ມຂອງແຂວງໃນໄລຍະຜ່ານມາຈາກທ່ານ ບຸນທັນ ສຸລິຍະວົງ, ກໍາມະການພັກແຂວງ, ກໍາມະການສູນກາງຊາວໜຸ່ມ ປະຊາຊົນ ປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງ. ຕະຫຼອດໄລຍະຜ່ານມາມີຫຼາຍດ້ານທີພົ້ນເດັ່ນເປັນຕົ້ນແມ່ນການສ້າງຂະບວນການຊາວໜຸ່ມ 4 ບຸກ ໂດຍໄດ້ນໍາພາສະມາຊິກຊາວໜຸ່ມເຄື່ອນໄຫວຊ່ວຍເຫຼືອສ້າງໂຮງຮຽນໄດ້ຫຼາຍບ້ານ, ເປັນໃຈກາງປຸກລະດົມຂົນຂວາຍ ວັດຖຸອຸປະກອນການຮຽນ – ການສອນ, ອຸປະກອນກິລາ ແລະ ອື່ນໆ ໄປຊ່ວຍເຫຼືອບ້ານທີ່ຢູ່ຫາງໄກສອກຫຼີກ ແລະ ບ້ານທີ່ໄດ້ຮັບຜົນກະທົບຈາກໄພພິບັດ.

          ໂອກາດດຽວກັນນີ້ ທ່ານ ເຈົ້າແຂວງໄດ້ເລົ່າເຖິງປະຫວັດຄວາມເປັນມາຂອງການກໍາເນີດເຕີບໃຫຍ່ຂອງຊາວໜຸ່ມ ປະຊາຊົນ ປະຕິວັດລາວ ຄວາມເປັນມາຂອງການກຳເນີດເຕີບໃຫຍ່ຊາວໜຸ່ມ ປະຊາຊົນ ປະຕິວັດລາວໂດຍຫຍໍ້ ຕະຫຼອດໄລຍະ 62 ປີ ຜ່ານມາ ເຊິ່ງຊາວໜຸ່ມລ້ວນແລ້ວແຕ່ມີການຍົກລະດັບ, ການພັດທະນາວຽກງານຂອງຊາວໜຸ່ມຂຶ້ນເລື້ອຍໆ, ແຕ່ເມື່ອທຽບກັບຍຸກປະຈຸບັນນີ້ ແມ່ນຕ້ອງໄດ້ບຸກບືນໃຫ້ຫລາຍກວ່າເກົ່າ ຖ້າທຽບໃສ່ຊາວໜຸ່ມຮຸ່ນກ່ອນແມ່ນໂຊກດີຫລາຍທີ່ເກີດມາໃນຍຸກທີ່ປະເທດຊາດໄດ້ຮັບການປົດປ່ອຍ ແລະ ມີການພັດທະນາແລ້ວ, ສະນັ້ນ ຕ້ອງເບິ່ງໃຫ້ເຫັນບັນຫາ ແລະ ຢືນຢູ່ແຖວໜ້າກຽມພ້ອມຕະລຸມບອນທຸກວຽກງານການສ້າງສາພັດທະນາບ້ານເມືອງຕາມທິດຊີ້ນຳ ແລະ ການມອບໝາຍຂອງຂັ້ນເທິງສຸມຈິດສຸມໃຈໃສ່ການແກ້ໄຂຄວາມທຸກຍາກໃຫ້ໝົດໄປເທື່ອລະໜ້ອຍ ກ້າວໄປເຖິງການລົບລ້າງຄວາມທຸກຍາກໄດ້ໂດຍການປະຕິບັດ, ຕ້ອງໄດ້ຕັ້ງເປັນກອງລົບລ້າງເຮືອນມຸງຫຍ້າ – ແອ້ມຝາໄມ້ເຮ້ຍ ໃນແຕ່ລະເມືອງ ແຕ່ລະບ້ານ, ມີການວາງແຜນການຢ່າງຄັກແນ່ວ່າປີນີ້ຊາວໜຸ່ມພາກສ່ວນໃດຈະເຮັດຫຍັງ ລົງສຳຫລວດເບິ່ງວ່າສະມາຊິກຊາວໜຸ່ມບ້ານນັ້ນມີທ່າແຮງໃນການປູກ-ການລ້ຽງ ເພື່ອສ້າງລາຍຮັບໃຫ້ບ້ານກໍ່ຄືຄອບຄົວໃນບ້ານນັ້ນໆ ໂດຍແບ່ງຄວາມຮັບຜິດຊອບຕາມໜ້າທີ່ພາລະບົດບາດຂອງຊາວໜຸ່ມແຕ່ລະພາກສ່ວນ ແຕ່ລະພະແນກການເຮັດໃຫ້ສຳເລັດ ແລະ ເຮັດໃຫ້ເກີດໝາກເກີດຜົນ ເຮັດແທ້ທຳຈິງ ຊອກໃຫ້ເຫັນຜູ່ເກັ່ງຊຳນິຊຳນານໃນແຕ່ລະດ້ານ ເພື່ອສ້າງໃຫ້ເປັນຄູຝຶກ ເພື່ອລົງໄປຊຸກຍູ້ສົ່ງເສີມປະຊາຊົນສ້າງສາພັດທະນາຕາມເງື່ອນໄຂຂອງຕົນ ແລະ ຕ້ອງມີການເຄື່ອນໄຫວທີ່ມີລັກສະນະມະຫາຊົນ. ພ້ອມນີ້ທ່ານຍັງໄດ້ແນະນຳຂຽນແຜນໂຄງການທີ່ຕ້ອງການຈະພັດທະນານຳສະເໜີເພື່ອຂໍການຊ່ວຍເຫຼືອຈາກສະຖານທູດຍີ່ປຸນປະຈຳລາວ ແລະ ຈາກພາກສ່ວນອື່ນໆ ທັງໝົດນີ້ກໍເພື່ອສ້າງພັກໃຫ້ເຂັ້ມແຂງ, ແລະ ສ້າງອຳນາດລັດໃຫ້ມີຄວາມເຂັ້ມແຂງ, ເຮັດໃຫ້ຊີວິດການເປັນຢູ່ຂອງປະຊາຊົນລາວບັນດາເຜົ່າໃຫ້ມີຄວາມອຸດົມຮັ່ງມີຂຶ້ນ.