ພິທີປາຖະກະຖາວັນສ້າງຕັ້ງ ຄຊປປລ ຄົບຮອບ 62 ປີ (14 ເມສາ 1955 – 14 ເມສາ 2017)

IMG_5599IMG_5614IMG_5635ເພື່ອໃຫ້ຊາວໜຸ່ມ-ໄວໜຸ່ມ ແລະ ເຍົາວະຊົນຮູ້ໄດ້ເຖີງນ້ຳໃຈຮັກຊາດ, ເສຍສະຫຼະ, ບໍ່ຍອມຈຳນົນຂອງວິລະ ບູລຸດໜຸ່ມແຕ່ລະຮຸ່ນທີ່ໄດ້ສ້າງວິລະກຳ ແລະ ຜົນງານອັນຍິ່ງໃຫຍ່ໃນການຕໍ່ສູ້ກູ້ຊາດຈົນຍາດໄດ້ໄຊຊະນະນຳເອົາ ເອກະລາດ, ສັນຕິພາບມາໃຫ້ປະຊາຊົນລາວບັນດາເຜົ່າ, ພ້ອມທັງປັກປັກຮັກສາໝາກຜົນຂອງການປະຕິວັດ ໄວ້ໄດ້ຢ່າງໝັ້ນຄົງ.

      ໃນຕອນບ່າຍຂອງວັນທີ 30 ເມສາ 2017 ຢູ່ທີ່ຫ້ອງປະຊຸມສະໂມສອນໃຫຍ່ຂອງແຂວງບໍລິຄຳໄຊ ຄະນະບໍລິຫານງານຊາວໜຸ່ມແຂວງບໍລິຄຳໄຊ ໄດ້ຈັດພິທີປາຖະກະຖາເລົ່າມູນເຊື້ອວັນສ້າງຕັ້ງ ຄຊປປລ ຄົບຮອບ 62 ປີ ຂຶ້ນຢ່າງເປັນທາງການ ພາຍໃຕ້ການເປັນປະທານ ແລະ ເປັນກຽດຂຶ້ນປາຖະກະຖາໃນຄັ້ງນີ້ໂດຍ ທ່ານ ອາລຸນໄຊ ສູນນະລາດ ກຳມະການສຳຮອງສູນກາງພັກ, ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ຊຶ່ງມີພະນັກງານອາວຸໂສອາດີດການນຳຂອງຊາວໜຸ່ມ, ເລຂາຮາກຖານ, ໜ່ວຍພ້ອມດ້ວຍສະມາຊິກຊາວໜຸ່ມອ້ອມຂ້າງແຂວງ ເຂົ້າຮ່ວມ 400 ກ່ວາຄົນ.

      ໃນພິທີທ່ານປະທານຍັງໄດ້ເຊີນເອົາທ່ານ ທອງອອນ ຄຳພູບານ ອະດີດການນຳຂັ້ນແຂວງ, ທ່ານ ລຳສະໄໝ ວໍລະສານ ຄະນະປະຈຳພັກແຂວງ, ປະທານແນວລາວສ້າງຊາດແຂວງ, ຜູ້ຊີ້ນຳອົງການຈັດຕັ້ງມະຫາຊົນຂັ້ນແຂວງ. ຂຶ້ນເລົ່າເຫດການຕົວຈິງ ແລະ ຍົກໃຫ້ເຫັນຜົນງານອັນອົງອາດກ້າຫານຂອງຊາວໜຸ່ມຮຸ່ນກ່ອນ, ແຕ່ຮຸ່ນ ທີ I ຫາຮຸ່ນທີ IV,  ຊາວໜຸ່ມຮຸ່ນທີໜຶ່ງ: ເປັນໄລຍະທີ່ເຈົ້າຟ້າງຸ່ມທ້ອນໂຮມອານາຈັກລາວລ້ານຊ້າງ ແລະ ຕໍ່ສູ້ກັບສັກດີນາຜູ້ຮຸກຮານ ຊາວໜຸ່ມກໍ່ໄດ້ມີບົດບາດສຳຄັນໃນການຕໍ່ສູ້ຢ່າງອົງອາດກ້າຫານໃນກອງທັບອານາຈັກລາວລ້ານຊ້າງເຖິງບໍ່ມີພັກນຳພາ; ຊາວໜຸ່ມຮຸ່ນທີສອງ: ກາງສັດຕະວັດທີ 18 ຈັກກະພັດຝະລັ່ງໄດ້ຄອບຄອງອິນດູຈີນພວກມັນໄດ້ກົດຂີ່ຂູດຮີດຢ່າງໜັກໜ່ວງໂດຍເກັບເກນແຮງງານຊາວໜຸ່ມໄປເປັນທະຫານ, ເປັນກຸລີໂດຍບໍ່ໄດ້ຮັບຄ່າແຮງງານ ໂດຍບໍ່ຍອມກົ້ມຫົວຕໍ່ຄວາມໂຫດຮ້າຍປ່າເຖື່ອນຂອງສັກດີນາ ແລະ ຈັກກະພັດຕ່າງດ້າວຊາວໜຸ່ມລາວຈຳນວນຫຼາຍໄດ້ຫາທາງເພື່ອຕໍ່ສູ້ກູ້ຊາດເປັນຕົ້ນ: ຂະບວນຕໍ່ສູ້ນຳພາໂດຍອົງແກ້ວ, ອົງກົມມະດຳ, ພໍ່ກະດວດ ແລະ ອື່ນໆ ແຕ່ເປັນການຕໍ່ສູ້ພໍໃຜພໍລາວບໍ່ມີພັກນຳພາຈຶ່ງເຮັດໃຫ້ປະລາໄຊລົງ; ຊາວໜຸ່ມຮຸ່ນທີສາມ: ພາຍຫຼັງທີ່ພັກປະຊາຊົນລາວຖືກສ້າງຕັ້ງຂຶ້ນ ໃນວັນທີ 22 ມີນາ 1955. ດ້ວຍຄວາມເຊື່ອໝັ້ນໃນກໍາລັງແຮງ, ຄວາມສາມາດ ແລະ ນໍ້າໃຈອົງອາດກ້າຫານຂອງຊາວໜຸ່ມໃນພາລະກິດຕໍ່ສູ້ຕ້ານຈັກກະພັດຜູ້ຮຸກຮານ ພັກໄດ້ຕົກລົງສ້າງຕັ້ງອົງການຈັດຕັ້ງຊາວໜຸ່ມຕະລຸມບອນຂຶ້ນໃນວັນທີ 14 ເມສາ 1955, ເປັນໃຈກາງເຕົ້າໂຮມ ແລະ ສຶກສາອົບຮົມຊາວໜຸ່ມະຕິບັດບົດບາດປະຈັນບານໃນທຸກສະໜາມຮົບດ້ວຍມານະຈິດທີ່ວ່າ ຍອມຕາຍດີກ່ວາຍອມເສຍເອກະລາດ, ເດັດຂາດບໍ່ໃຫ້ປະເທດຊາດຖືກຕັດແບ່ງ ແລະ ຄວາມປອງດອງຊາດຖືກທຳລາຍ; ຊາວໜຸ່ມຮຸ່ນທີສີ່: ແມ່ນໄລຍະປົກປັກຮັກສາ ແລະ ສ້າງສາພັດທະນາປະເທດຊາດ, ເຊິ່ງການຈັດຕັ້ງຊາວໜຸ່ມໄດ້ຮັບການສ້າງຕັ້ງຂຶ້ນ ແລະ ເຕົ້າໂຮມເອົາຄວາມສາມັກຄີຊາວໜຸ່ມລາວແຕ່ເໜືອຮອດໃຕ້ເຂົ້າມາຢູ່ໃຕ້ຮົ່ມທຸງອັນດຽວກັນພາຍໃຕ້ການຂອງພັກປະຊາຊົນປະຕິວັດລາວຢ່າງສົມກຽດ. ໂອກາດທີ່ມີຄວາມໝາຍ ຄວາມສໍາຄັນນີ້ ສູນກາງຊາວໜຸ່ມປະຊາຊົນປະຕິວັດລາວ ໄດ້ມອບຄອມພິວເຕີ 1 ຊຸດ ພ້ອມລຳໂພງ 8 ໜ່ວຍ ລວມມູນຄ່າ 9,000,000 ກີບ ແລະ ບໍລິສັດ ວັດທະນາທານສະປອດຈໍາກັດ ໄດ້ມອບກ້ອງຖ່າຍຮູບ 1 ໜ່ວຍ ມູນຄ່າ 6,000,000 ກີບ, ໃຫ້ຄະນະບໍລິຫານງານຊາວໜຸ່ມແຂວງບໍລິຄໍາໄຊ ເພື່ອນໍາໃຊ້ເຂົ້າໃນການພັດທະນາວຽກງານຊາວໜຸ່ມ ໃຫ້ມີບາດກ້າວຂະຫຍາຍຕົວຂຶ້ນເລື້ອຍໆ.

                                                             ຂ່າວ: ວິໄລພອນ ສີວິໄຊ. ຊາວໜຸ່ມແຂວງບໍລິຄຳໄຊ

    020 55653639