ກອງປະຊຸມເປີດກ້ວາງຄົບຄະນະບໍລິຫານງານຊາວໜຸ່ມແຂວງບໍລິຄຳໄຊ ຄັ້ງທີ 3 ສະໄໝທີ V

IMG_5428IMG_5424

ໃນວັນທີ 29 ມີນາ 2017 ຢູ່ທີ່ຫ້ອງປະຊຸມເບີ 4 ຂອງແຂວງບໍລິຄຳໄຊ ໄດ້ເປີດກອງປະຊຸມ ເປີດກ້ວາງຄົບຄະນະບໍລິຫານງານຊາວໜຸ່ມແຂວງບໍລິຄຳໄຊ ຄັ້ງທີ 3 ສະໄໝທີ V ຂື້ນຢ່າງເປັນທາງການ ພາຍໃຕ້ການເປັນປະທານຂອງສະຫາຍ ກວນເພັດ ພວງມາລາ ກຳມະການສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ, ເປັນກຽດເຂົ້າຮ່ວມກອງປະຊຸມໃນຄັ້ງນີ້ໂດຍ ທ່ານ ອາລຸນໄຊ ສູນນະລາດ ກຳມະການສຳຮອງສູນກາງພັກ, ຮອງເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ, ທ່ານ ລຳສະໄໝ ວໍລະສານ ຄະນະປະຈຳພັກແຂວງ ປະທານແນວລາວສ້າງຊາດແຂວງ, ຜູ້ຊີ້ນຳອົງການຈັດຕັ້ງມະຫາຊົນຂັ້ນແຂວງ, ມີຄະນະພັກອົງການຈັດຕັ້ງມະຊົນ, ຄະນະປະຈໍາຊາວໜຸ່ມ, ຄະນະບໍລິຫານຊາວໜຸ່ມແຂວງ-ເມືອງ, ຄະນະຮາກຖານ, ຄະນະໜ່ວຍ ພ້ອມດ້ວຍສະມາຊິກຊາວໜຸ່ມອ້ອມຂ້າງແຂວງບໍລິຄຳໄຊ ເຂົ້າຮ່ວມ 72 ສະຫາຍ, ຍິງ  25  ສະຫາຍ, ໂອ ກາດນີ້ສະຫາຍ ກວນເພັດ ພວງມາລາ ເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ ໄດ້ກ່າວເປີດກອງປະຊຸມຢ່າງເປັນທາງການ.

ກອງປະຊຸມສະຫາຍ ແກ້ວອຸດອນ ໄຊປະເສີດ ຮອງເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ, ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດໜ້າທີ່ວຽກງານຊາວໜຸ່ມ-ເຍົາວະຊົນ ສົກປີ 2015 – 2016 ແລະ ທິດທາງແຜນການປະຈຳປີ  2017, ໃນໄລຍະ 1 ປີຜ່ານມາຄະນະຊາວໜຸ່ມແຂວງບໍລິຄຳໄຊ ທຸກຂັ້ນສາມາດຍາດຜົນງານພົ້ນເດັ່ນຫຼາຍດ້ານເປັນຕົ້ນ: ແມ່ນໄດ້ຖືເອົາວຽກງານການເມືອງແນວຄິດເປັນກົກ ສອດຫ້ອຍ ເຂົ້າທຸກຂົງເຂດວຽກງານ ໂດຍນຳເອົາແນວທາງນະໂຍບາຍຂອງພັກ, ມະຕິ, ຄຳສັ່ງ, ລະບຽບກົດໝາຍ, ແຜນພັດທະນາເສດຖະກິດ-ສັງຄົມ ລົງເຜີຍແຜ່ເຊື່ອມຊຶມໃຫ້ແກ່ຊາວໜຸ່ມ – ເຍົາວະຊົນຮັບຮູ້ ແລະ ເຂົ້າໃຈ, ວຽກງານການຈັດຕັ້ງໄດ້ສຸມໃສ່ປັບປຸງການຈັດຕັ້ງ: ຊາວໜຸ່ມໃຫ້ໜັກແໜ້ນເຂັ້ມແຂງຂື້ນເລື້ອຍໆ ປະຈຸບັນມີຄະນະບໍລິຫານງານຊາວໜຸ່ມແຂວງ 24 ສະຫາຍ, ຍິງ 5 ສະຫາຍ, ຍົກຍ້າຍໄປຮັບໜ້າທີ່ໃໝ່ 5 ສະຫາຍ, ຍິງ 0, ຊາວໜຸ່ມໃນເກນອາຍຸທັງໝົດ 63,911 ສະຫາຍ, ຍິງ 32,265 ສະຫາຍ, ເປັນສະມາຊິກຊາວໜຸ່ມປະຊາຊົນປະຕິວັດລາວ 21,925 ສະຫາຍ, ຍິງ 11,526 ສະຫາຍ; ໄວເຍົາວະຊົນມີທັງໝົດ 56,516 ນ້ອງ, ຍິງ 19,154 ນ້ອງ, ເປັນສະມາຊິກເຍົາວະຊົນ 22,298 ນ້ອງ, ຍິງ 13,976 ນ້ອງ; ໄວອະນຸຊົນ 13,713 ຫຼານ, ຍິງ 6,747 ຫຼານ, ເປັນສະມາຊິກອະນຸຊົນ 2,104 ຫຼານ, ຍິງ 1,102 ຫຼານ. ວຽກງານຂະບວນການ: ກໍໄດ້ມີຫຼາຍຂະບວນການທີ່ພົ້ນເດັ່ນເປັນຕົ້ນ: ຂະບວນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ມາຮອດປະຈຸບັນສາມາດກວດກາປະເມີນຜົນຮັບຮອງ ທົ່ວແຂວງໄດ້ 29 ພາກສ່ວນ, ຂັ້ນແຂວງ ມີ 24 ພາກສ່ວນ, ປະກອບມີ 1 ພະແນກ, 9 ຄຊປປລ ຮາກຖານ, 14 ໜ່ວຍເອກະລາດ, ຂັ້ນເມືອງມີ 5 ເມືອງ ໃນນັ້ນ 3 ເມືອງ ຮັບຮອງເປັນ ຄຊປປລ ເມືອງ 4 ບຸກ ແລະ 2 ເມືອງ ກໍາລັງກວດກາປະເມີນຜົນ, ພ້ອມນັ້ນຍັງມີຂະບວນການຕ່າງໆທີ່ຄະນະຊາວໜຸ່ມຈັດຕັ້ງຂຶ້ນເພື່ອ ຂໍ່ານັບຮັບຕ້ອນວັນສຳຄັນທາງປະຫວັດສາດຂອງພັກ, ຂອງຊາດ.

      ຕອນທ້າຍກອງປະຊຸມຍັງໄດ້ເປັນກຽດຮັບຟັງການໂອ້ລົມ ແລະ ໃຫ້ທິດຊີ້ນຳຈາກທ່ານ                    ອາລຸນໄຊ ສູນນະລາດ ແລະ ທ່ານ ລຳສະໄໝ ວໍລະສານ ກ່ອນອື່ນພວກທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ໄຊຊະນະທີ່ຍາດມາໄດ້ໃນໄລຍະຜ່ານມາ, ທ່ານຍັງໄດ້ເໜັ້ນໜັກໃຫ້ຄະນະບໍລິ ຫານງານຊາວໜຸ່ມທຸກສະຫາຍ ຈົ່ງເອົາໃຈໃສ່ວຽກງານການສຶກສາອົບອົມການເມືອງ-ແນວຄິດໃຫ້ກັບຊາວໜຸ່ມ ແລະ ວຽກງານປ້ອງກັນຄວາມສະຫງົບສຸກ, ເພື່ອສະກັດກັ້ນກັບປະກົດການຍໍ້ທໍ້ທີ່ເກີດຂື້ນຢູ່ໃນສັງຄົມໃຫ້ຫຼຸດໜ້ອຍຖອຍລົງ, ເອົາໃຈໃສ່ປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມ, ພ້ອມກັນຊີ້ນຳ-ນຳພາສະມາຊິກຊາວໜຸ່ມ ພັດທະນາຕົນເອງ ແລະ ຄອບຄົວໃຫ້ຫຼຸດພົ້ນຈາກຄວາມທຸກຍາກ, ສຸມທຸກຄວາມພະຍາຍາມໃນການປັບປຸງວຽກງານການຈັດຕັ້ງຊາວໜຸ່ມໃຫ້ເຕີບໃຫຍ່ເຂັ້ມແຂງ ສາມາດດຳລົງບົດບາດປະ ຈັນບານເປັນເສນາທິການທີ່ຫ້າວຫັນ-ເຂັ້ມແຂງໃຫ້ແກ່ຄະນະພັກ.

                                                ຂ່າວ: ວິໄລພອນ ; ພາບ: ໄພວັນ