ກອງປະຊຸມໃຫຍ່ ຄັ້ງທີ່ II ຂອງໜ່ວຍຊາວໜຸ່ມພະແນກພາຍໃນ ແຂວງອຸດົມໄຊ.

IMG_5779IMG_5786

ໃນຕອນເຊົ້າ ຂອງວັນທີ 17 ເດືອນ ມີນາ ປີ 2017 ນີ້ ຢູ່ທີ່ຫ້ອງປະຊຸມຂອງພະແນກພາຍໃນ ແຂວງອຸດົມໄຊ ໜ່ວຍຊາວໜຸ່ມຂອງພະແນກ ດັ່ງກ່າວກໍໄດ້ຈັດກອງປະຊຸມໃຫ່ຍ ຄັ້ງທີ  II  ຂອງ ຕົນຂຶ້ນຢ່າງເປັນທາງການ.

ໂດຍການເປັນປະທານ ຂອງ ສະຫາຍ ນ.ສຸກມີໄຊ ສຸອໍາໄພ ເລຂາໜ່ວຍ ຊາວໜຸ່ມພະແນກພາຍໃນ ເຂົ້າຮ່ວມກອງປະຊຸມຄັ້ງນີ້ ມີ ທ່ານ ນາງ ທຸມມາ ປັນຍາສິດ ຮອງເລຂາຄະນະບໍລິຫານງານຊາວໜຸ່ມແຂວງອຸດົມໄຊ, ມີ ທ່ານ ຄໍາພອນ ພີມມະລາດ ເລຂາໜ່ວຍພັກ ຫົວໜ້າພະແນກພາຍໃນແຂວງ, ມີຕາງໜ້າຄະນະໜ່ວຍຊາວໜຸ່ມອ້ອມຂ້າງ, ຄະນະໜ່ວຍຊາວໜຸ່ມແຮກສ່ຽວ, ຕາງໜ້າອົງການຈັດຕັ້ງມະຫາຊົນ ຢູ່ພາຍໃນພະແນກ ພ້ອມສະມາຊິກຊາວໜຸ່ມພາຍໃນໜ່ວຍເຂົ້າຮ່ວມ 31 ສະຫາຍ, ຍິງ 9 ສະຫາຍ.

          ໃນໂອກາດໄຂກອງປະຊຸມດັ່ງກ່າວ ສະຫາຍ ນ.ສຸກມີໄຊ ສຸອໍາໄພ ຄະນະໜ່ວຍຊາວໜຸ່ມພະແນກພາຍໃນແຂວງ, ປະທານ ກອງປະຊຸມກໍໄດ້ຂຶ້ນຜ່ານບົດ ລາຍງານການເມືອງ ທັງສອງພາກຄື: ພາກສະຫຼຸບສັງລວມການຈັດຕັ້ງປະຕິບັດວຽກງານຊາວໜຸ່ມໃນໄລຍະ 3 ປີ ຜ່ານມາ ແລະ ທິດທາງແຜນການ 3 ປີໃນຕໍ່ໜ້າ. ເຊິ່ງບົດສະຫຼຸບໄດ້ຍົກໃຫ້ເຫັນຈຸດດີ, ຜົນງານທີ່ພົ້ນເດັ່ນ ແລະ ຈຸດອອ່ນ – ຂໍ້ຂົງຄ້າງ ເພື່ອຊອກຫາວິທີແກ້ໄຂໃນຕໍ່ໜ້າ ໂດຍສະເພາະກໍແມ່ນວຽກງານການເມືອງແນວຄິດ, ວຽກງານການເຄື່ອນໄຫວ ສ້າງຂະບວນການຕ່າງໆກໍຄື ວຽກງານການເຄື່ອນໄຫວປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມກັນນັ້ນ ໜວ່ຍຊາວໜຸ່ມພະແນກ ດັ່ງກ່າວ ກໍຍັງໄດ້ວາງທິດທາງແຜນການໃນ 3 ປີຕໍ່ໜ້ານຳອີກ.

   ຈາກນັ້ນກອງປະຊຸມກໍຍັງໄດ້ປ່ອນບັດຄັດເລືອກເອົາຄະນະໜວ່ຍຊາວໜຸ່ມຊຸດໃໝ່ເຊິ່ງມີຜູ້ເຂົ້າສະໝັກຈຳນວນ 5 ສະຫາຍ, ຍິງ 2 ສະຫາຍ, ຜົນການລົງຄະແນນສຽງ ແມ່ນເລືອກໄດ້ 3 ສະຫາຍຍິງ 1 ດັ່ງນີ້:

  1. ສະຫາຍ  ກອງຄໍາ ໄຊພົມປັນ ເປັນເລຂາໜ່ວຍ.
  2. ສະຫາຍ ນ.ສຸກມີໄຊ ສຸອໍາໄພ ຮອງເລຂາ.
  3. ສະຫາຍ ກົວເນັງ ຢ່າງຈົວລົງ ເປັນຄະນະ.

  ຈາກນັ້ນກອງປະຊຸມຍັງໄດ້ເປີດຂະບວນແຂງຂັນ 4 ບຸກ ປີທີ່ 2 ຂັ້ນໜ່ວຍຂອງຕົນຂຶ້ນ ໂດຍແມ່ນສະຫາຍ

ນ.ສຸກມີໄຊ ສຸອໍາໄພ ຄະນະໜ່ວຍຊາວໜຸ່ມ ກໍໄດ້ຂຶ້ນຜ່ານ ທິດທາງແຜນການໃນຕໍ່ໜ້າ  ຂອງໜວ່ຍຊາວໜຸ່ມພະແນກພາຍໃນ ແຂວງ ໃນນັ້ນແຜນການຍັງໄດ້ ສະແດງໃຫ້ເຫັນເຖິ່ງໜ້າວຽກຕົວຈິ່ງຫຼາຍອັນທີ່ສະມາຊິກພາຍໃນໜ່ວຍຈະຕ້ອງໄດ້ພ້ອມພຽງຮຽງໜ້າກັນຈັດຕັ້ງປະຕິບັດ. ພ້ອມດຽວກັນນັ້ນໜ່ວຍຊາວໜຸ່ມ ພະແນກພາຍໃນ ແຂວງ ຍັງໄດ້ຮັບໃບຢັ້ງຢື່ນ ເປັນໜວ່ຍ 4 ບຸກ ແລະ ໃບຍ້ອງຍໍໃຫ້ບຸກຄົນ 4 ບຸກຈຳນວນໜຶ່ງ ໂດຍແມ່ນທ່ານ ນາງ ທຸມມາ ປັນຍາສິດ ຮອງເລຂາຄະນະບໍລິຫານງານຊາວໜຸ່ມແຂວງອຸດົມໄຊ ເປັນຜູ້ມອບ ແລະ ເພື່ອເຮັດໃຫ້ແຜນການບັນລຸຕາມຄາດໝາຍທີ່ວາງໄວ້ນັ້ນຄະນະໜ່ວຍພ້ອມດ້ວຍສະມາຊິກກໍໄດ້ພ້ອມກັນຂຶ້ນຈັບມືແຂ່ງຂັນ ແລະ ປະຕິຍານຕົນຕໍ່ກອງປະຊຸມວ່າ: ຈະທຸ້ມເທແຮງກາຍແຮງໃຈ, ທຸ້ມເທສະຕິປັນຍາຈົນສຸດຄວາມສາມາດໃນການຈັດຕັ້ງປະຕິບັດແຜນການທີ່ວາງໄວ້ນັ້ນໃຫ້ປະສົບຜົນສຳເລັດຢ່າງແທ້ຈິ່ງ.

ໃນຕອນທ້າຍກອງປະຊຸມກໍຍັງໄດ້ຮັບຟັງການໂອ້ລົມຂອງທ່ານ ນາງ ທຸມມາ ປັນຍາສິດ ຮອງເລຂາຄະນະບໍລິຫານ

ງານຊາວໜຸ່ມແຂວງອຸດົມໄຊ. ກ່ອນອື່ນທ່ານກໍໄດ້ ກ່າວຄຳຍ້ອງຍໍຊົມເຊີຍເຖິ່ງຜົນສຳເລັດຫຼາຍໆດ້ານທີ່ໜ່ວຍຊາວໜຸ່ມດັ່ງກ່າວຍາດມາໄດ້ໃນໄລຍະ 3 ປີ ຜ່ານມາ, ນອກນັ້ນທ່ານໄດ້ເໜັ້ນໜັກໃຫ້ຄະນະໜ່ວຍຊາວໜຸ່ມພ້ອມດ້ວຍສະມາຊິກທຸກສະຫາຍຈົ່ງເອົາໃຈໃສ່ຕໍ່ກັບວຽກງານອົງການຈັດຕັ້ງພາຍໃນຂອງຕົນເອງໃຫ້ເຂັ້ມແຂງເປັນຕົ້ນແມ່ນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຄື: ບຸກທາງດ້ານແນວຄິດ, ບຸກທາງດ້ານການສຶກສາຮ່ຳຮຽນ, ບຸກທາງດ້ານອົງການຈັດຕັ້ງ ແລະ ບຸກທາງດ້ານວິຊາອາຊີບສ້າງວຽກເຮັດງານທຳ, ຊາວໜຸ່ມຈົ່ງພ້ອມກັນດຸໝັ່ນເຂັ້ມແຂງໃນທຸກຂະບວນການບໍ່ວ່າຈະເປັນວຽກງານປັບປຸງການຈັດຕັ້ງ, ວຽກງານ ການພັດທະນາເສດຖະກິດ – ສັງຄົມ ກໍຄື ການຈັດຕັ້ງປະຕິບັດໜ້າທີ່ວຽກງານຂອງຊາວໜຸ່ມຕາມພາລະບົດບາດ, ສິດ ແລະ ໜ້າທີ່ທີ່ພັກ-ລັດ ມອບໝາຍໃຫ້ ໃຫ້ປະສົບຜົນສຳເລັດ.

                                                                                             ຂ່າວ: ສອນລະເພັດ ສຸກກະເສີມ