ກອງປະຊຸມຄົບຄະນະ ບໍລິຫານງານຊາວໜຸ່ມແຂວງອຸດົມໄຊ ຄັ້ງທີ 3 ສະໄໝ VII ວັນທີ 16 ມີນາ ປີ 2017

   IMG_5773IMG_5784IMG_5762

ກອງປະຊຸມຄົບຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ແຂວງອຸດົມໄຊ ຄັ້ງທີ 3 ສະໄໝທີ່ VII ໄດ້ໄຂຂື້ນໃນຕອນເຊົ້າ ຂອງວັນທີ 16 ມີນາ 2017 ນີ້ຢູ່ທີຫ້ອງປະຊຸມ 4 ອົງການຈັດຕັ້ງມະຫາຊົນ ໂດຍການເປັນປະທານຂອງ ທ່ານ ບຸນທັນ ສຸລິຍະວົງ ກໍາມະການພັກແຂວງ,ກໍາມະການສູນກາງຊາວໜຸ່ມ ປະຊາຊົນ ປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງ ເປັນກຽດເຂົ້າຮ່ວມກອງປະຊຸມໃນຄັ້ງນີ້ມີທ່ານ ພອນສະຫວັນ ພັນທະວິຈິດ ກຳມະການປະຈໍາພັກແຂວງ ຫົວໜ້າພະແນກ ຖະແຫຼ່ງຂ່າວ – ວັດທະນາທໍາ ແລະ ທ່ອງທ່ຽວ, ມີຄະນະປະຈໍາ,ຄະນະບໍລິຫານງານຊາວໜຸ່ມແຂວງ,ເລຂາຊາວໜຸ່ມ 7 ເມືອງ, ພ້ອມທັງແຂກຮັບເຊີນຈາກອົງການພາຄີເຂົ້າຮ່ວມ ທັງໝົດ 33 ສະຫາຍ; ຍິງ 10 ສະຫາຍ.

ຈຸດປະສົງຂອງການໄຂກອງປະຊຸມໃນຄັ້ງນີ້ ກໍ່ເພື່ອເປັນການສະຫຼຸບຕີລາຄາຄືນກ່ຽວກັບການຈັດຕັ້ງປະຕິບັດ ວຽກງານຊາວໜຸ່ມ – ເຍົາວະຊົນ – ອານຸຊົນ ໃນໄລຍະ 1 ປີ ຜ່ານມາ ແລະ ວາງທິດທາງແຜນການໃນ 1 ປີຕໍ່ໜ້າ.

1ໃນວາລະດໍາເນີນກອງປະຊຸມດັ່ງກ່າວ ທ່ານ ບຸນທັນ ສຸລິຍະວົງ ກໍາມະການພັກແຂວງ, ກໍາມະການສູນກາງຊາວໜຸ່ມ ປະຊາຊົນ ປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງອຸດົມໄຊ ໄດ້ກ່າວໄຂກອງປະຊຸມຢ່າງເປັນທາງການ ຈາກນັ້ນກອງປະຊຸມກໍ່ໄດ້ຮັບຟັງການຜ່ານບົດສະຫຼຸບການເຄື່ອນໄຫວວຽກງານຊາວໜຸ່ມ – ເຍົາວະຊົນ – ອານຸຊົນໃນໄລຍະສົກປີ 2015 – 2016 ແລະ ວາງທິດທາງແຜນການປະຈຳປີ 2017 ຈາກສະຫາຍ ນາງ ທຸມມາ ປັນຍາສິດ ຮອງເລຂາ ຄະນະບໍລິຫານງານຊາວໜຸ່ມແຂວງ.

ໃນສົກປີ 2015 – 2016 ແຂວງອຸດົມໄຊປະກອບມີຊາວໜຸ່ມອາຊີບທັງໝົດ 78 ສະຫາຍ  ຍິງ 26 ສະຫາຍ, ທົ່ວແຂວງອຸດົມໄຊ ມີໜ່ວຍຊາວໜຸ່ມທັງໝົດ 742 ໜ່ວຍ,ມີໄວໜຸ່ມທັງໝົດ 72,784 ສະຫາຍ; ຍິງ 36,318 ສະຫາຍ ສະມາຊິກຊາວໜຸ່ມ 26,826 ສະຫາຍ; ຍິງ 10,752 ສະຫາຍ. ວຽກງານການປັບປຸງອົງການຈັດຕັ້ງ ຊາວໜຸ່ມ-ເຍົາວະຊົນ – ອານຸຊົນ ຄະນະບໍລິຫານງານຊາວໜຸ່ມແຂວງ ກໍ່ໄດ້ລົງຕິດຕາມຊຸກຍູ້ວຽກງານຂະບວນການ 4 ບຸກ ຂອງຊາວໜຸ່ມ, ຂໍ້ແຂ່ງຂັນ 3 ດີ 4 ຮູ້ ຂອງນ້ອງນ້ອຍເຍົາວະຊົນ ຢ່າງເປັນປົກກະຕິ, ຈັດຕັ້ງນະໂຍບາຍໃບຍ້ອງຍໍໃຫ້ສະມາຊິກຊາວໜຸ່ມພາຍໃນໜ່ວຍ, ພະແນກ ແລະ ຂັ້ນເມືອງ ທີ່ມີຜົນງານດີເດັ່ນ: ປະເພດ 1 ໄດ້ 5,527 ສະຫາຍ; ຍິງ 2,108 ສະຫາຍ ແລະ ປະເພດ 2 ໄດ້ 2,872 ສະຫາຍ; ຍິງ 791 ສະຫາຍ. ໃນຂົງເຂດເສດຖະກິດ, ຄະນະບໍລິຫານງານຊາວໜຸ່ມແຂວງ ກໍ່ໄດ້ເອົາໃຈໃສ່ປຸກລະດົມຊາວໜຸ່ມກະສິກອນ, ພໍ່ແມ່ປະຊາຊົນ ໃຫ້

ສຸມໃສ່ເຂົ້າໃນການຜະລິດ, ປູກຝັງ, ລ້ຽງສັດໃຫ້ເປັນສິນຄ້າ. ນອກນັ້ນກໍຍັງມີການປຸກລະດົມຊຸກຍູ້ວຽກ

ງານຊາວໜຸ່ມໃນຂົງເຂດອື່ນໆອີກຫຼາຍດ້ານ.

ໃນຄະນະດຽວກັນກອງປະຊຸມ ກໍ່ຍັງໄດ້ຮັບຟັງ ທິດທາງແຜນການໃນຕໍ່ໜ້າເປັນຕົ້ນແມ່ນຈະໄດ້ສືບຕໍ່ວຽກງານການສຶກສາອົບຮົມການເມືອງແນວຄິດ, ວຽກງານຂະບວນການ, ການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມ ແລະ ຂໍ້ແຂ່ງຂັນ 3 ດີ 4 ຮູ້ ຂອງເຍົາວະຊົນ, ວຽກງານການສ້າງຂະບວນການ,ແລະ ອື່ນໆ ໃຫ້ແຖດເໝາະກັບໜ້າວຽກຕົວຈິງ,  ຈາກນັ້ນຜູ້ແທນກອງປະຊຸມກໍ່ໄດ້ປະກອບຄໍາຄິດຄໍາເຫັນໃສ່ບົດສະຫຼຸບ ແລະ ທິດທາງແຜນການຢ່າງກົງໄປກົງມາ ແລະ ໄດ້ຮັບຮອງເອົາມະຕິກອງປະຊຸມ ເຊິ່ງມີເນື້ອໃນດັ່ງນີ້ :

  • ຕ້ອງເພີ່ມທະວີສຶກສາອົບຮົມດ້ານການເມືອງ-ແນວຄິດ, ສະຕິຕໍ່ລະບຽບກົດໝາຍ ແລະ ຄວາມຮູ້ທົ່ວໄປທີ່ເປັນປະໂຫຍດໃຫ້ແກ່ຊາວໜຸ່ມ-ເຍົາວະຊົນ
  • ປັບປຸງ ແລະ ກໍ່ສ້າງການຈັດຕັ້ງຊາວໜຸ່ມ-ເຍົາວະຊົນໃຫ້ເຂັ້ມແຂງ ໂດຍສະເພາະແມ່ນ ສູ້ຊົນໃຫ້ບັນດາຂະແໜງການ, ໂຮງຮຽນ, ຫົວໜ່ວຍທຸລະກິດໃຫຍ່ ແລະ ອົງການຈັດຕັ້ງຕ່າງໆໃຫ້ມີການຈັດຕັ້ງຊາວໜຸ່ມ 25%ຂອງຂະແໜງການທີ່ຍັງໃນປະຈຸບັນ, ຂະຫຍາຍສະມາຊິກຊາວໜຸ່ມໃໝ່ໃຫ້ໄດ້ 1.500-2.000 ຄົນ, ເກັບເງິນບໍາລຸງປະຈໍາ ເດືອນຂັ້ນແຂວງໃຫ້ໄດ້ 100% ຂອງສະມາຊິກທັງໝົດ, ຂັ້ນເມືອງໃຫ້ໄດ້ 80% ຂອງສະມາຊິກທັງໝົດ, ສ້າງກອງເຍົາ ວະຊົນນຳໜ້າ ຕາມຂໍ້ແຂ່ງຂັນ 3 ດີ 4 ຮູ້ ໃຫ້ໄດ້ເມືອງລະ 2-4 ກອງ, ຂະຫຍາຍການຈັດຕັ້ງເຍົາວະຊົນ-ອານຸຊົນຢູ່ບັນດາໂຮງຮຽນນັບ ທັງພາກລັດ ແລະ ເອກະຊົນໃຫ້ໄດ້ 25% ຂອງໂຮງຮຽນທີ່ຍັງທັງໝົດໃນທົ່ວແຂວງ
  • ສ້າງຂະບວນການຕ່າງໆ ຕາມຄວາມສາມາດ ແລະ ເງື່ອນໄຂຕົວຈິງຂອງແຕ່ລະບ່ອນ ໂດຍສະເພາະ ແມ່ນການຈັດກິດຈະກຳຊ່ວງເຮືອ, ກິດຈະກຳຕອບບຸນແທນຄຸນ, ຂະບວນການຂອງຊາວໜຸ່ມຕະລຸມບອນ, ກິດຈະກຳ

 “ ມອບອາຍອຸ່ນໃຫ້ນ້ອງໃນຊົນນະບົດ ” ໃຫ້ເປັນຂະບວນຟົດຟື້ນ ແລະ ມີລັກສະນະຕໍ່ເນື່ອງ

  • ຕ້ອງເປັນເຈົ້າການໃນການຄົ້ນຄ້ວາ ແລະ ກຳແໜ້ນບັນດານິຕິກຳຕ່າງໆ ພ້ອມນັ້ນກໍ່ຕ້ອງໄດ້ຂຽນເປັນໂຄງ ການ ແລະ ກິດຈະກຳອັນລະອຽດ ໂດຍຖືເອົາບົດແນະນຳ ເລກທີ 096/ລຂ ລົງວັນທີ 22 ກຸມພາ 2012 ວ່າດ້ວຍການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມລາວເປັນບ່ອນອີງໃນການຈັດຕັ້ງປະຕິບັດ ເພື່ອເຮັດໃຫ້ບັນລຸໄດ້ຄາດ ໝາຍການສ້າງໜ່ວຍຊາວໜຸ່ມ 4 ບຸກຕາມແຕ່ລະສາຍດັ່ງນີ້:
  • ສາຍເມືອງ: ຕ້ອງໄດ້ຮັບຮອງເປັນເມືອງ 4 ບຸກ 2-4 ເມືອງ
  • ສາຍຂະແໜງການ: ຕ້ອງໃຫ້ໄດ້ເປີດເປັນໜ່ວຍ 4 ບຸກ 100% ແລະ ຮັບຮອງເປັນສາຍຂະແໜງການ 4 ບຸກ
  • ປຸກລະດົມເຍົາວະຊົນປະກອບສ່ວນເຂົ້າໃນການຊ່ວຍເຫຼືອສັງຄົມຕາມຄວາມສາມາດ ນຳພາເຍົາວະຊົນເຂົ້າ ພົບປະອວຍພອນອາດີດການນຳໃຫ້ໄດ້ຢ່າງນ້ອຍ 1-3 ຄັ້ງ, ຈັດການເຄື່ອນໄຫວກິດຈະກຳຂອງເຍົາວະຊົນຢູ່ໂຮງຮຽນໃຫ້ ໄດ້ 30% ຂອງໂຮງຮຽນທີ່ມີການຈັດຕັ້ງເຍົາວະຊົນ.
  • ຄະນະຊາວໜຸ່ມຂັ້ນແຂວງ ແລະ ຂັ້ນເມືອງສືບຕໍ່ເອົາໃຈໃສ່ໃນການຊ່ວຍຄະນະພັກຂັ້ນຂອງຕົນໃນການຈັດຕັ້ງປະຕິບັດວຽກງານ 3 ສ້າງຢ່າງມີຄວາມຮັບຜິດຊອບສູງ ໂດຍສະເພາະແມ່ນລົງຕິດຕາມຊຸກຍູ້ ແລະ ສ້າງທຸກເງື່ອນໄຂ ເພື່ອເຮັດໃຫ້ບ້ານເປົ້າໝາຍກາຍເປັນບ້ານພັດທະນາຕາມລະດັບຄາດໝາຍທີ່ຄະນະພັກໄດ້ກຳນົດໄວ້.
  • ເພີ່ມທະວີໃນການເຄື່ອນໄຫວຕາມພາລະບົດບາດ, ສິດ ແລະໜ້າທີ່ຂອງຕົນຢ່າງເຕັມສ່ວນ ໂດຍສຸມໃສ່ຫັນ ເອົາມະຕິກອງປະຊຸມໃຫຍ່ຂອງຕົນໃຫ້ເປັນແຜນການອັນລະອຽດ ແລະ ຈັດຕັ້ງປະຕິບັດໃຫ້ບັນລຸຕາມແຜນການ, ເອົາໃຈໃສ່ປັບປຸງການຈັດຕັ້ງຂອງຕົນໃຫ້ເຂັ້ມແຂງ ໂດຍຖືເອົາການລວມຊີວິດປະຈຳເດຶອນຂອງສະມາຊິກເປັນສຳຄັນ ແລະ ປັບປຸງບັນດານິຕິກຳຕ່າງໆຂອງສະມາຄົມໃຫ້ສອດຄ່ອງກັບສະພາບຄວາມເປັນຈິງໃນປະຈຸບັນ
  • ຄະນະຊາວໜຸ່ມທຸກຂັ້ນຕ້ອງເປັນເຈົ້າການ ໃນການຈັດຕັ້ງເຜີຍແຜ່, ເຊື່ອມຊືມມະຕິກອງປະຊຸມໃຫຍ່ຜູ່ ແທນຊາວໜຸ່ມທົ່ວປະເທດຄັ້ງທີ VII ແລະ ຈັດຕັ້ງຜັນຂະຫຍາຍມະຕິກອງປະຊຸມສາມັນຄັ້ງທີ 3 ສະໄໝທີ VII ໃຫ້ປະກົດຜົນເປັນຈິງ.

    ເພື່ອເຮັດໃຫ້ກອງປະຊຸມມີຄວາມໝາຍຄວາມສໍາຄັນ ແລະ ເຕັມໄປດ້ວຍໝາກຜົນອັນຈົບງາມນັ້ນ ກອງປະຊຸມກໍ່ຍັງໄດ້ຮັບຟັງການໂອ້ລົມຂອງທ່ານ ພອນສະຫວັນ ພັນທະວິຈິດ, ຄະນະປະຈໍາພັກແຂວງ, ຫົວໜ້າພະແນກ ຖະແຫຼ່ງຂ່າວ – ວັດທະນາທໍາ ແລະ ທ່ອງທ່ຽວ ເຊິ່ງກ່ອນອື່ນທ່ານກໍ່ໄດ້ກ່າວຍ້ອງຍໍຊົມເຊີຍເຖິງຄວາມສໍາເລັດ ແລະ ໝາກຜົນຂອງການຈັດຕັ້ງປະຕິບັດຂອງຊາວໜຸ່ມໃນໄລຍະ 1 ປີ ຜ່ານມາ ແມ່ນເຫັນວ່າມີຫຼາຍອັນທີ່ຊາວໜຸ່ມເຮົາສາມາດນໍາພາສະມາຊິກຊາວໜຸ່ມບັນດາເຜົ່າພ້ອມກັນຈັດຕັ້ງປະຕິບັດ ແລະ ເຄື່ອນໄຫວຕາມພາລະບົດບາດ ແລະ ສິດໜ້າທີຂອງຕົນຢ່າງຄຶກຄື້ນ ແລະ ເປັນຂະບວນ ມີຫຼາຍວຽກທີ່ຊາວໜຸ່ມເຮົາຍາດມາໄດ້ ບໍ່ວ່າຈະເປັນທາງດ້ານວຽກງານຂະບວນການ, ວຽກງານວິຊາສະເພາະ ແລະ ອື່ນໆພ້ອມນັ້ນທ່ານຍັງໄດ້ຮຽກຮ້ອງມາຍັງຖັນແຖວຊາວໜຸ່ມໂດຍສະເພາະກໍແມ່ນຄະນະຊາວໜຸ່ມທຸກຂັ້ນຈົ່ງເພີ່ມທະວິີຄວາມຫ້າວຫັນພ້ອມທັງການຈັດຕັ້ງປະຕິບັດໃຫ້ໄດ້ຮັບໝາກຜົນ, ອອກແຮງຕັ້ງໜ້າຕີຕ້ານ ແລະ ສະກັດກັ້ນທຸກປະກົດການຫຍໍ້ທໍ້ທີ່ເກີດຂຶ້ນກັບຖັນແຖວຊາວໜຸ່ມເປັນຕົ້ນແມ່ນບັນຫາການຊຸມແຊວ, ຂີ່ລົດໄວ, ຫຼີ້ນການພະນັນ, ຂີ້ລັກງັດແງະ, ເສບສິ່ງເສບຕິດ, ແລະ ອື່ນໆ. ໃຫ້ພ້ອມກັນພັດທະນາຊາວໜຸ່ມໃຫ້ກ້າວໄກໄປພ້ອມໆກັບການພັດທະນາປະເທດຊາດໃຫ້ນັບມື້ນັບຈະ   ເລີນຮຸ່ງເຮືອງ ແລະ ພ້ອມກັນຈັດຕັ້ງປະຕິບັດ ຂໍ້ແຂ່ງຂັນ 4 ບຸກຂອງຊາວໜຸ່ມໃຫ້ປະກົດຜົນເປັນຈິງ.

ຂ່າວ: ສອນລະເພັດ ສຸກກະເສີມ