ອຸດົມໄຊ ຮັບຮອງເອົາເມືອງແບງເປັນເມືອງຊາວໜຸ່ມ 4 ບຸກ ເມືອງທຳອິດ ຂອງແຂວງອຸດົມໄຊ

IMG_5462IMG_5499

IMG_5424ພິທີປະກາດຮັບຮອງເອົາເມືອງແບງ ແຂວງອຸດົມໄຊເປັນເມືອງຊາວໜຸ່ມ 4 ບຸກ ໄດ້ຈັດຂຶ້ນໃນຕອນເຊົ້າວັນທີ 9 ກຸມພາ 2017 ນີ້ ຢູ່ທີ່ຕໍ່ໜ້າອົງການຈັດຕັ້ງຂອງເມືອງ ໂດຍມີທ່ານ ໂອວາດ ຈັນທະວົງ ຄະນະປະຈຳພັກແຂວງ ປະທານອົງການແນວລາວສ້າງຊາດແຂວງ ຜູ່ຊີ້ນຳອົງການວຽກງານຈັດຕັ້ງມະຫາຊົນ, ມີບັນດາຄະນະປະຈຳພັກເມືອງ, ກຳມະການພັກເມືອງ ຄະນະບໍລິຫານງານຊາວໜຸ່ມ 7 ເມືອງ, ຄະນະໜ່ວຍຊາວໜຸ່ມຮາກຖານ, ອົງການຈັດຕັ້ງພາກສ່ວນທີ່ກ່ຽວຂ້ອງ, ສຳມະຊິກຊາວໜຸ່ມ ພາຍໃນເມືອງເຂົ້າຮ່ວມຢ່າງພ້ອມພຽງ.

        ຕະຫຼອດໄລຍະທີ່ຜ່ານມາທາງຄະນະພັກ, ຄະນະນຳ ແລະ ຄະນະບໍລິຫານງານຊາວໜຸ່ມເມືອງແບງ ໄດ້ເອົາໃຈໃສ່ການນຳເອົາເນື້ອໃນຈິດໃຈຂອງກອງປະຊຸມໃຫຍ່ຜູ່ແທນຊາວໜຸ່ມທົ່ວປະເທດ ຄັ້ງທີ່ VI ແລະ ການເປີດບັ້ນແຂ່ງຂັນວຽກງານ 4 ບຸກຂອງແຂວງໄປຈັດຕັ້ງປະຕິບັດ ແລະ ຜັນຂະຫຍາຍຢູ່ໃນແຕ່ລະໜ່ວຍ, ແຕ່ລະຂົງເຂດລວມທັງພ້ອມກັນອອກແຮງສ້າງຂະບວນການແຂ່ງຂັນຢ່າງເປັນຂະບວນຟົດຟື້ນ ແລະ ສະຫຼຸບຕີລາຄາລາຍງານໝາກຜົນອັນດີເດັ່ນຂອງແຕ່ລະໜ່ວຍ ເຊີ່ງເຮັດໃຫ້ເນື້ອໃນຈິດໃຈຂໍ້ແຂ່ງຂັນ 4 ບຸກໄດ້ຮັບການຂະຫຍາຍຕົວຢ່າງກວ້າງຂວາງ ແລະ ເລິກເຊິ່ງ ເຮັດໃຫ້ຊາວໜຸ່ມມີຄວາມໜັກແໜ້ນທາງດ້ານການເມືອງແນວຄິດ , ເຂັ້ມແຂງດ້ານການຈັດຕັ້ງ ໂດຍຕິດພັນກັບແຜນພັດທະນາເສດຖະກິດສັງຄົມ, ວຽກງານປ້ອງກັນຊາດ ປ້ອງກັນຄວາມສະຫງົບ ແລະ ທຸກຂົງເຂດວຽກງານ ເຊິ່ງຜົນງານດັ່ງກ່າວໄດ້ສະແດງອອກໃຫ້ເຫັນຄື : ບຸກຄົນດີເດັ່ນ, ຄອບຄົວຊາວໜຸ່ມຕົວແບບ ແລະ ໄດ້ຮັບໃບຢັ້ງຢືນເປັນໜ່ວຍຊາວໜຸ່ມ 4 ບຸກ ເພີ່ມຂຶ້ນ. ດັ່ງນັ້ນ ທາງຄະນະບໍລິຫານງານຊາວໜຸ່ມແຂວງອຸດົມໄຊ ຈື່ງໄດ້ເຫັນດີຕົກລົງປະກາດຮັບຮອງເອົາເມືອງແບງ ແຂວງອຸດົມໄຊ ເປັນເມືອງຊາວໜຸ່ມ 4 ບຸກ ເມືອງທຳອິດຂອງແຂວງ ໂດຍສົມທົບກັບຄະນະພັກ, ຄະນະນຳ ແລະ ຄະນະບໍລິຫານງານຊາວໜຸ່ມເມືອງ ຈັດພິທີປະກາດ ແລະ ຮັບຮອງ ເຊີ່ງໃຫ້ກຽດມອບໃບຢັ້ງຢືນໃນຄັ້ງນີ້ໂດຍແມ່ນທ່ານ ໂອວາດ ຈັນທະວົງ ຄະນະປະຈຳພັກແຂວງ ປະທານອົງການແນວລາວສ້າງຊາດແຂວງ ຜູ່ຊີ້ນຳອົງການວຽກງານຈັດຕັ້ງມະຫາຊົນແຂວງ ແລະ ຮັບໂດຍຄະນະບໍລິຫານງານຊາວໜຸ່ມເມືອງ.

        ໂອກາດດັ່ງກ່າວ ທ່ານ ໂອວາດ ຈັນທະວົງ ປະທານອົງການແນວລາວສ້າງຊາດແຂວງ ກໍໄດ້ມີຄຳເຫັນໂອ້ລົມ ແລະ ຮ່ວມກັບຄະນະຕັດແທບຜ້າ , ເປີດປ້າຍຮັບຮອງເປັນເມືອງຊາວໜຸ່ມ 4 ບຸກ ຢ່າງເປັນທາງການ.

ຂ່າວ: ສອນລະເພັດ ສຸກກະເສີມ