ຄະນະຊາວໜຸ່ມແຂວງບໍລິຄຳໄຊ ຈັດພິທີຍ່າງມາລາທອນເຍົາວະຊົນ ຂໍ່ານັບຮັບຕ້ອນວັນສຳຄັນຕ່າງໆຂອງພັກຂອງຊາດ

img_3179img_3182

ຄະນະຊາວໜຸ່ມແຂວງບໍລິຄຳໄຊ ຈັດພິທີຍ່າງມາລາທອນເຍົາວະຊົນ

ຂໍ່ານັບຮັບຕ້ອນວັນສຳຄັນຕ່າງໆຂອງພັກຂອງຊາດ

***********

      ເພື່ອຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 41 ປີ, ວັນສ້າງຕັ້ງເຍົາວະຊົນທັນວາ ຄົບຮອບ 61 ປີ ແລະ ວັນຄ້າຍວັນເກີດຂອງທ່ານປະທານ ໄກສອນ ພົມວິຫານ ຄົບຮອບ 96 ປີ ໃຫ້   ເປັນຂະບວນຟົດຟື້ນ ແລະ ມີຄວາມໝາຍ, ຄວາມສໍາຄັນ.

      ໃນວັນທີ 29 ພະຈິກ 2016 ຢູ່ທີ່ເດີ່ນຫ້ອງການຄະນະບໍລິຫານງານຊາວໜຸ່ມແຂວງບໍລິຄຳໄຊ ໄດ້ສ້າງຂະ ບວນການຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 41 ປີ ( 2 ທັນວາ 1975 – 2 ທັນວາ 2016 ), ສ້າງ ຕັ້ງເຍົາວະຊົນທັນວາ ຄົບຮອບ 61 ປີ( 2 ທັນວາ 1955 – 2 ທັນວາ 2016) ແລະ ວັນຄ້າຍວັນເກີດຂອງທ່ານ ປະທານ ໄກສອນ ພົມວິຫານ ຄົບຮອບ 96 ປີ (13 ທັນວາ 1920 – 13 ທັນວາ 2016 ) ຂຶ້ນຢ່າງເປັນທາງການ ໂດຍການຍ່າງມາລາທອນລຸ້ນເຍົາວະຊົນ ເປັນກຽດເຂົ້າຮ່ວມພິທີໃນຄັ້ງນີ້ມີທ່ານ ກວນເພັດ ພວງມາລາ ກໍາ ມະການສູນກາງຊາວໜຸ່ມ, ເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ ພ້ອມພະນັກງານຊາວໜຸ່ມ ແຂວງ, ຄູອາຈານ ແລະ ນ້ອງນ້ອຍເຍົາວະຊົນ 4 ໂຮງຮຽນຄື: ໂຮງຮຽນປະຖົມແຕ່ງທອງ, ຮຸ່ງອາລຸນ, ປາກ ຊັນໃໝ່, ໂພສີ. ເຂົ້າຮ່ວມທັງໝົດ1,500 ກວ່າຄົນ. ໃນພິທີ  ທ່ານ ກວນເພັດ ພວງມາລາ ກຳມະການສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ ກໍໄດ້ກ່າວເປີດພິທີຢ່າງເປັນທາງການ ແລະ ນຳພາຂະບວນຍ່າງມາລາທອນອອກສູ່ເສັ້ນທາງທີ່ກຳນົດໄວ້ຢ່າງເປັນຂະບວນການຟົດຟື້ນ ເຊິ່ງເລີ່ມແຕ່ຫ້ອງການຄະນະບໍລິຫານງານຊາວໜຸ່ມແຂວງບໍລິຄຳໄຊ ໄປຕາມເສັ້ນທາງຕະຫຼາດເກົ່າ, ອອກສູ່ 4 ແຍກໄຟແດງສີວິໄລ, ລ້ຽວຊ້າຍຂຶ້ນຕາມທາງເລກທີ 13ໃຕ້, ຮອດ 3 ແຍກໄປສະນີ, ລ້ຽວຊ້າຍ ກັບເຂົ້າມາຫາຫ້ອງການຄະນະບໍລິຫານງານຊາວໜຸ່ມແຂວງ ລວມໄລຍະທາງ 5 ກິໂລແມັດ.

ການຍ່າງມາລາທອນໃນຄັ້ງນີ້ ນອກຈາກຈະເປັນການສ້າງຂະບວນການຂໍ່ານັບຮັບຕ້ອນວັນທີ່ມີຄວາມໝາຍ, ຄວາມສໍາຄັນຂອງພັກ, ຂອງຊາດແລ້ວຍັງເປັນການສ້າງຄວາມສາມັກຄີຮັກແພງລະ ຫວ່າງນ້ອງນ້ອຍເຍົາວະ ຊົນ ໄດ້ພົບປະແລກປ່ຽນ ແລະ ທັງເປັນການສົ່ງເສີມເຍົາວະຊົນໃຫ້ຫັນມາສ້າງກິດຈະກໍາດ້ານກິລາເພື່ອຫ່າງ ໄກຢາເສບຕິດ.

                                                                         ຂ່າວ: ວິໄລພອນ ສີວິໄຊ; ຊາວໜຸ່ມແຂວງບໍລິຄຳໄຊ;

                                                                              020 55653639