ໜ່ວຍຊາວໜຸ່ມຮາກຖານ ກົມເຕັກໂນໂລຊີຂໍ້ມູນຂ່າວສານສະຫຼຸບບັ້ນແຂ່ງຂັນ 4 ບຸກ

img_9070img_9071img_9054img_9078img_9084ໜ່ວຍຊາວໜຸ່ມຮາກຖານ ກົມເຕັກໂນໂລຊີຂໍ້ມູນຂ່າວສານ

ສະຫຼຸບບັ້ນແຂ່ງຂັນ 4 ບຸກ

ເພື່ອຜັນຂະຫຍາຍຂໍ້ແຂ່ງຂັນ 4 ບຸກຂອງຄະນະບໍລິຫານງານ ຊປປລ ວາງອອກ, ຕິດຕາມວຽກງານການເຄື່ອນ ໄຫວໃນໄລຍະຜ່ານມາ, ໜ່ວຍຊາວໜຸ່ມຮາກຖານກົມເຕັກໂນໂລຊີຂໍ້ມູນຂ່າວສານ (ກຕຂ), ກະຊວງວິທະ ຍາສາດ ແລະ ເຕັກໂນໂລຊີ (ກວຕ) ໄດ້ຈັດກອງຊຸມ ສະຫຼຸບບັ້ນແຂ່ງຂັນ 4 ບຸກຂຶ້ນ ໃນຕອນເຊົ້າຂອງວັນທີ 08 ຕຸລາ 2015 ທີ່ຜ່ານມາ ໂດຍການເປັນປະທານຂອງ ສະຫາຍ ສຸລິຍາ ແສງດາລາວົງ, ເລຂາໜ່ວຍຊາວໜຸ່ມຮາກຖານ ກຕຂ, ມີບັນດາຮອງເລຂາໜ່ວຍຊາວໜຸ່ມຮາກຖານ ແລະ ສະມາຊິກຊາວໜຸ່ມ ພາຍໃນກົມເຂົ້າຮ່ວມຢ່າງພ້ອມພຽງ.

ຈຸດປະສົງການຈັດກອງປະຊຸມຄັ້ງນີ້ ກໍເພື່ອປະຕິບັດຕາມທິດທາງແຜນການຂອງວຽກງານຊາວໜຸ່ມກົມ ໄອທີ ທີ່ໄດ້ເຄື່ອນໄຫວມາຈົນເຖິງປັດຈຸບັນ ຊຶ່ງສາມາດຍາດແຍ່ງຜົນງານຫຼາຍດ້ານ ສະແດງອອກຄື: ໄດ້ປະກອບສ່ວນ ສຳເລັດການຄົ້ນຄວ້າ, ກຳນົດຕຳແໜ່ງງານ, ສິດ, ໜ້າທີ່ຂັ້ນພະແນກ ແລະ ສູນ ພາຍໃນກົມເຕັກໂນໂລຊີຂໍ້ມູນ ຂ່າວສານ ສຳລັບປີ 2015-2020; ການສ້າງຮ່າງລະບຽບວ່າດ້ວຍກອງທຶນ ເພື່ອນຊ່ວຍເພື່ອນ ຂອງໜ່ວຍຊາວ ໜຸ່ມຮາກຖານ ກົມໄອທີ; ການຄົ້ນຄວ້າ, ພັດທະນາ ແລະ ນຳໃຊ້ ຊອບແວຣ/ໂປຣແກຣມ ຄອມພິວເຕີ ຈຳນວນ 04 ໂປຣແກຣມ ຄື: ໂປຣແກຣມ ຄຸ້ມຄອງບຸກຄະລາກອນ “e-Personnel”, ຄຸ້ມຄອງຊັບສິນ “e-Inventory”, ຄຸ້ມຄອງເອກະສານ “e-Document”, ບໍລິຫານຂໍ້ມູນໃນເຄື່ອຂ່າຍ “File Server”; ສຶກສາຄົ້ນຄວ້າການນໍາໃຊ້ ຊອບແວຣ PMB ໃນການສ້າງຖານຂໍ້ມູນ ເພື່ອເກັບກໍາຂໍ້ມູນຂ່າວສານ ແລະ ບໍລິການຄົ້ນຫາຂໍ້ມູນຂ່າວສານ ໃຫ້ແກ່ນັກສຶກສາ, ນັກຄົ້ນຄວ້າ ແລະ ປັນຍາຊົນທົ່ວສັງຄົມ; ເຂົ້າຮ່ວມອອກແຮງງານ ອານາໄມ ແລະ ປ້ອງກັນເວນຍາມໃນວັນສໍາຄັນຂອງຊາດຢ່າງເປັນຂະບວນການຟົດຟືນ; ພ້ອມກັນນັ້ນ ກໍພົວພັນຮ່ວມມືກັບ ຕ່າງປະເທດ ເຊັ່ນ: ສສ. ຫວຽດນາມ, ເກົາຫຼີໃຕ້, ສປ ຈີນ, ຍີ່ປຸ່ນ ແລະ ອົງການສາກົນອື່ນໆ, ຕາມລະບຽບຫຼັກ ການ ຂອງພັກ-ລັດ ວາງອອກ; ຮ່ວມມືກັບມູນນິທິ Asia Foundation, ອົງການ Room to Read, ສະຖານທູດອາເມລິກາ ແລະ ສະຖານທູດລັດເຊຍ ປະຈໍາລາວ ໃນການແລກປ່ຽນຂໍ້ມູນຂ່າວສານ ແລະ ບົດຮຽນຮ່ວມກັນ. ໃນກອງປະຊຸມຄັ້ງນີ້ ຍັງໄດ້ຍົກໃຫ້ເຫັນເປີເຊັນຜົນສໍາເລັດຂອງການເຄື່ອນໄຫວແຕ່ລະຄົນ ເຊັ່ນ: ດ້ານແນວຄິດ 95%; ດ້ານການຝຶກຝົນຫຼໍ່ຫຼອມຕົນເອງ 85%, ດ້ານການຈັດຕັ້ງ 92%, ດ້ານການສ້າງວິຊາຊີບ ແລະ ວຽກເຮັດງານທຳ 85%, ເຊິ່ງອີງຕາມເປີເຊັນດັ່ງກ່າວ ທາງໜ່ວຍຊາວໜຸ່ມດັ່ງກ່າວ ໄດ້ຕີລາຄາ ແລະ ຈັດປະເພດຂອງໜ່ວຍເປັນໜ່ວຍຊາວໜຸ່ມແຂງ.

ໃນຕອນທ້າຍ ສະຫາຍ ສຸລິຍາ ແສງດາລາວົງ, ເລຂາໜ່ວຍຊາວໜຸ່ມຮາກຖານກົມ ເຕັກໂນໂລຊີຂໍ້ມູນຂ່າວ ສານ ຍັງໄດ້ຮຽກຮ້ອງບັນດາສະມາຊິກພາຍໃນໜ່ວຍ ໃຫ້ບຸກບືນຕໍ່ວຽກງານວິຊາສະເພາະ ມີຄວາມຫ້າວຫັນ ແລະ ກາຍເປັນສະມາຊິກຊາວໜຸ່ມທີ່ເຂັ້ມແຂງກ້າວໜ້າອີກດ້ວຍ.

 

ຮູບພາບ ແລະ ຂ່າວ: ບຸນຄົງ ຈະເລີນສຸກ