ງານພົບປະ ຄຊປປລ ແຂວງຊຽງຂວາງ ກັບ ຄຊປປລ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ

14536955_1077855012333451_351645661_o-114572662_1077854409000178_1079842022_o-214536680_1077854339000185_1551112071_o

ຄະນະບໍລິຫານງານຊາວໜຸ່ມແຂວງຊຽງຂວາງ ຕ້ອນຮັບ ຄະນະບໍລິຫານງານຊາວໜຸ່ມ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ

ໃນວັນທີ 27-28 ກັນຍາ 2016 ຜ່ານມານີ້ ທີ່ແຂວງຊຽງຂວາງ ຄະນະບໍລິຫານງານຊາວໜຸ່ມແຂວງ ໄດ້ຕ້ອນຮັບການມາຢ້ຽມຢາມຂອງ ທ່ານ ດຣ ໄຊນະຄອນ ອິນທະວົງ ກຳມະການສູນກາງຊາວໜຸ່ມ, ເລຂາຄະນະບໍລິຫານງານຊາວໜຸ່ມກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມດ້ວຍຄະນະ 18 ທ່ານ ຍິງ 3 ທ່ານ, ເປັນກຽດຕ້ອນຮັບຕາງໜ້າໃຫ້ແກ່ຄະນະບໍລິຫານງານຊາວໜຸ່ມແຂວງໂດຍ ທ່ານ ບົວເງິນ ຫຸມໄຊຍະພົມ ກຳມະການສູນກາງຊາວໜຸ່ມ, ກຳມະການພັກແຂວງ, ເລຂາຄະນະບໍລິຫານງານຊາວໜຸ່ມແຂວງຊຽງຂວາງ, ມີຄະນະປະຈຳຊາວໜຸ່ມ ພ້ອມດ້ວຍພະນັກງານ ຄະນະບໍລິຫານງານຊາວໜຸ່ມແຂວງເຂົ້າຮ່ວມຢ່າງພ້ອມພຽງ. ການມາຢ້ຽມຢາມ ແລະ ພົບປະແລກປ່ຽນບົດຮຽນກັບຄະນະບໍລິຫານງານຊາວໜຸ່ມແຂວງຊຽງຂວາງດັ່ງກ່າວ ກໍ່ເພື່ອສ້າງສາຍພົວພັນຮ່ວມມືແບບພິເສດ ຫ່ວາງຄະນະບໍລິຫານງານຊາວໜຸ່ມແຂວງຊຽງຂວາງ ແລະ ຄະນະບໍລິຫານງານຊາວໜຸ່ມກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ເຊິ່ງໃນໄລຍະຜ່ານມາ ທັງສອງຝ່າຍແມ່ນໄດ້ສ້າງເປັນຊາວໜຸ່ມແຮກສ່ຽວ, ພົວພັນແລກປ່ຽນບົດຮຽນເຊິ່ງກັນ ແລະ ກັນ. ສະນັ້ນ, ໃນໂອກາດທີ່ມາຢ້ຽມຢາມ ຄະນະນຳຊາວໜຸ່ມທັງສອງຝ່າຍ ໄດ້ຈັດກອງປະຊຸມປຶກສາຫາລືຊາວໜຸ່ມແຮກສ່ຽວຂຶ້ນ ຢູ່ທີ່ຫ້ອງປະຊຸມສຳນັກງານປົກຄອງແຂວງຊຽງຂວາງ ໃນກອງປະຊຸມປຶກສາຫາລື ພົບປະແລກປ່ຽນບົດຮຽນໃນຄັ້ງນີ້ ທັງສອງຝ່າຍໄດ້ຕີລາຄາການຈັດຕັ້ງປະຕິບັດວຽກງານໃນໄລຍະຜ່ານມາ, ໄດ້ຮ່ວມກັນຄົ້ນຄ້ວາ ແລະ ຕົກລົງເຊັນສັນຍາຮ່ວມມືແລກປ່ຽນບົດຮຽນໃນຕໍ່ໜ້າ ບາງບັນດາວຽກງານດັ່ງນີ້

  1. ຄະນະຊາວໜຸ່ມກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຊ່ວຍປະສານງານກັບມະຫາວິທະຍາໄລແຫ່ງຊາດ ຊ່ວຍທຶນການສຶກສາໃຫ້ແກ່ຊາວໜຸ່ມ ຜູ້ທີ່ດ້ອຍໂອກາດຢູ່ແຂວງຊຽງຂວາງ ປະມານ 2 ທຶນຕໍ່ປີ.
  2. ຄະນະຊາວໜຸ່ມກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຊ່ວຍໃນການຝຶກອົບຮົມຄວາມຮູ້ພື້ນຖານໃນການຮັກສາສິ່ງແວດລ້ອມໃຫ້ແກ່ ຊາວໜຸ່ມເຍົາວະຊົນໃນໂຮງຮຽນເທດສະບານແຂວງຕາມເງື່ອນໄຂຕົວຈິງ.
  3. ສ້າງເງື່ອນໄຂໃຫ້ຄະນະຊາວໜຸ່ມທັງສອງຝ່າຍໃຫ້ມີການພົບປະແລກປ່ຽນບົດຽນເຊິ່ງກັນ ແລະ ກັນ ປີລະ 1 ຄັ້ງ (ຜັດປ່ຽນກັນເປັນເຈົ້າພາບ)
  4. ພ້ອມກັນສ້າງບ້ານຕົວແບບໃນການພັດທະນາແບບຍືນຍົງ ເອົາບ້ານແຮກສ່ຽວຂອງຊາວໜຸ່ມແຂວງ ຫຼື ບ້ານທີ່ມີຄວາມພ້ອມຢູ່ໃນແຂວງຊຽງຂວາງ.
  5. ສ່ວນການຈັດຕັ້ງປະຕິບັດແມ່ນອີງໃສ່ສະພາບແວດລ້ອມ ແລະ ເງື່ອນໄຂຕົວຈິງຂອງທັງສອງພາກສ່ວນ.