img_2326img_2318img_2353img_2341

ເມືອງ ຫາດຊາຍຟອງ ໄດ້ຮັບນາມມະຍົດເປັນຄະນະຊາວໜຸ່ມ ປປລ ເມືອງ 4 ບຸກ.

         ເພື່ອປະຕິບັດຕາມມະຕິກອງປະຊຸມໃຫຍ່ຄັ້ງທີ VII ຂອງຜູ້ແທນຊາວໜຸ່ມທົ່ວປະເທດ ກໍ່ຄືມະຕິກອງປະຊຸມ ໃຫຍ່ ຄັ້ງທີ VII ຂອງຜູ້ແທນຊາວໜຸ່ມທົ່ວນະຄອນຫຼວງວຽງຈັນ ວ່າດ້ວຍການຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກໃຫ້ປະກົດຜົນເປັນຈິງ  ໃນຕອນເຊົ້າຂອງວັນທີ 31 ສິງຫາ 2016 ທີ່ຜ່ານມາ ຄະນະຊາວໜຸ່ມ ປປລ ເມືອງ ຫາດຊາຍຟອງ, ນະຄອນຫຼວງວຽງຈັນ ໄດ້ຈັດພິທີປະກາດ ຄຊປປລ ເມືອງຫາດຊາຍຟອງ ເປັນເມືອງຊາວໜຸ່ມ 4 ບຸກ,  ເຊິ່ງພິທີປະກາດນາມມະຍົດດັ່ງກ່າວ ແມ່ນໄດ້ຈັດຂຶ້ນຢູ່ທີ່ສະໂມສອນ ເມືອງປົກຄອງເມືອງຫາດຊາຍຟອງ, ໃຫ້ກຽດເຂົ້າຮ່ວມຂອງສະຫາຍ ບຸນທາມ ພຸດທະວົງສາ ເລຂາພັກເມືອງ – ເຈົ້າເມືອງຫາດຊາຍຟອງ, ສະຫາຍ ໄຊຍະບັດ ຊຸ່ມມະນີວົງ ຮອງເລຂາຄະນະຊາວໜຸ່ມ ປປລ ນະຄອນຫຼວງວຽງຈັນ, ພ້ອມດ້ວຍຄະນະບໍລິຫານງານ ຊາວໜຸ່ມເມືອງ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.

      ໃນພິທີສະຫາຍ ສອນປະສິດ ສຸວັນນະເມືອງ ເລຂາຄະນະບໍລິຫານງານຊາວໜຸ່ມ ປປລ ເມືອງຫາດຊາຍຟອງ ກໍ່ໄດ້ລາຍງານການຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ແລະ ວາງແຜນການທິດທາງໃນຕໍ່ໜ້າ ເຊິ່ງສະຫາຍ ກໍ່ໄດ້ລາຍງານໃຫ້ເຫັນການເຄື່ອນໄຫວຂອງຄະນະຊາວໜຸ່ມເມືອງໃນໄລຍະທີ່ຜ່ານມາ ມີບັນດາຈຸດດີ, ຈຸດອ່ອນ ແລະ ຂໍ້ຄົງຄ້າງ, ໃນໄລຍະຜ່ານມາຄະນະຊາວໜຸ່ມ ປປລ ເມືອງຫາດຊາຍຟອງ, ນະຄອນຫຼວງວຽງຈັນ ຍາມໃດກໍ່ ໄດ້ເອົາໃຈໃສ່ສຶກສາອົບຮົມການເມືອງ – ແນວຄິດໃຫ້ຊາວໜຸ່ມ – ໄວໜຸ່ມພາຍໃນເມືອງ ເພື່ອສ້າງເງື່ອນໄຂ ໃຫ້ສະມາຊິກຊາວໜຸ່ມທຸກສະຫາຍ ໃຫ້ໄດ້ຮັບການສຶກສາອົບຮົບບົ່ມສອນທາງດ້ານການເມືອງ – ແນວຄິດຢ່າງ ເປັນປະຈໍາເຮັດໃຫ້ບັນດາສະມາຊິກຊາວໜຸ່ມ ມີທັດສະນະຫຼັກໝັ້ນການເມືອງໝັກແໜ້ນ, ມີຄວາມຈົ່ງຮັກພັກ ດີ ແລະ ເຊື່ອໝັ້ນຕໍ່ແນວທາງນະໂຍບາຍຂອງພັກ ຍາມໃດກໍ່ມີສະຕິຕໍ່ການຈັດຕັ້ງລະບຽບວິໃນຢ່າງເຂັ້ມງວດ ມີແນວຄິດອຸ່ນອຽງທຸ່ນທ່ຽງຕໍ່ການນຳພາຂອງລັດ, ເຊິ່ງໃນໄລຍະຜ່ານມາທົ່ວເມືອງຫາດຊາຍຟອງ ສາມາດຮັບ ມະຫາຊົນກ້າວໜ້າ ແລະ ເລື່ອນສະມາຊິກເຍົາວະຊົນເຂົ້າໃນການຈັດຕັ້ງຊາວໜຸ່ມ ປປລ ໄດ້ທັງໝົດ 1,683  ສະຫາຍ, ຍິງ 910 ສະຫາຍ ເທົ່າກັບ 57,99%, ພ້ອມນັ້ນກໍ່ໄດ້ຄັດເລືອກເອົາສະມາຊິກຊາວໜຸ່ມຜູ້ທີ່ມີຜົນງານດີ ເດັ່ນ ແລະ ຫ້າວຫັນກ້າວໜ້າ ສະເໜີເຂົ້າໃນອົງການຈັດຕັ້ງພັກ ປປລ ຈຳນວນ 15 ສະຫາຍ, ຍິງ 06 ສະຫາຍ, ຜ່ານການກວດກາໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງຊາວໜຸ່ມໃນໄລຍະຜ່ານມາ ແມ່ນສາມາດຕີ ລາຄາໄດ້ດ້ານແນວຄິດການເມືອງໄດ້ 88 %  ດ້ານການຝຶກຝົນຫຼໍ່ຫຼອມຕົນເອງໄດ້ 86 % ດ້ານການຈັດຕັ້ງ 87 % ດ້ານການສ້າງວິຊາຊີບ ແລະ ສ້າງວຽກເຮັດງານທຳ 85 % ສາມາດຈັດໄດ້ປະເພດແຂງ.

        ໃນໂອກາດດັ່ງກ່າວສະຫາຍ ບຸນທາມ ພຸດທະວົງສາ ເລຂາພັກເມືອງ-ເຈົ້າເມືອງຫາດຊາຍຟອງ ກໍ່ໄດ້ມີຄໍາ ເຫັນເພື່ອເປັນການຊີ້ທິດເຍືອງທາງໃຫ້ແກ່ຄະນະຊາວໜຸ່ມເມືອງ, ໂດຍເນັ້ນໜັກໃຫ້ຄະນະຊາວໜຸ່ມແຕ່ລະຂັ້ນ ຈົ່ງສືບຕໍ່ເຄື່ອນໄຫວຈັດຕັ້ງເຜີຍແຜ່ແນວທາງນະໂຍບາຍຂອງພັກ, ມູນເຊື້ອປະຫວັດສາດຂອງຊາດ, ມູນເຊື້ອ ຂອງຄະນະຊາວໜຸ່ມ ປປລ, ປັບປຸງການຈັດຕັ້ງ ຄຊປປລ ໃຫ້ໜັກແໜ້ນເຂັ້ມແຂງ, ເຮັດວຽກຕາມຫຼັກການ ລວມສູນປະຊາທິ ປະໄຕ, ຊຸກຍູ້ການຈັດຕັ້ງປະຕິບັດຂໍ້ແຂ່ງຂັນ 4 ບຸກ, ພ້ອມນັ້ນ ສະຫາຍກໍ່ຍັງຮຽກຮ້ອງມາຍັງ ຄະນະພັກ, ອຳນາດການປົກຄອງ ແລະ ການຈັດຕັ້ງສັງຄົມໃນທົ່ວ ເມືອງຫາດຊາຍຟອງຈົ່ງສືບຕໍ່ສະໜັບສະໜູນ ແກ່ຄະນະຊາວໜຸ່ມໃນແຕ່ລະຂົງເຂດໃຫ້ສາມາດປະຕິບັດຕາມພະລະບົດບາດຂອງຕົນໃຫ້ມີຄວາມເຂັ້ມແຂງໃນແຕ່ລະດ້ານ.

 

                                                                                                               ຂຽນໂດຍ: ວຽງໄຊ ນວນທະວົງ

 ບັນນາທິການ: ນ. ສຸມາລີ ທຳມະວົງ