ເວທີສົນທະນາ “ຄັງປັນຍາ Think Tank” ຂອງຊາວໜຸ່ມ ກະຊວງພະລັງງານ ແລະ ບໍ່ແຮ່

ເພື່ອຕ້ອນຮັບກອງປະຊຸມໃຫຍ່ຂອງຊາວໜຸ່ມ ກະຊວງພະລັງງານ ແລະ ບໍ່ແຮ່ ທີ່ຈະມາເຖິງນີ້, ໃນວັນທີ 21 ເດືອນກຸມພາ 2020 ນີ້ ຢູ່ທີ່ລັດວິສາຫະກິດໄຟຟ້າລາວສໍານັກງານໃຫຍ່ຂອງຊາວໜຸ່ມກະຊວງພະລັງງານ ແລະ ບໍ່ແຮ່ ຫຼື ກະຊວງ ພບ ໄດ້ຈັດເວທີສົນທະນາໃນຫົວຂໍ້ “ຄັງປັນຍາ Think Tank” ຄັ້ງທີ່ 1 ຂຶ້ນ. ເປັນກຽດເຂົ້າຮ່ວມຂອງທ່ານ ປອ ຄໍາມະນີ ອິນທະລາດ ກໍາມະການສູນກາງພັກ ລັດຖະມົນຕີກະຊວງພະລັງງານ ແລະ ບໍ່ແຮ່ ທ່ານ ອາລຸນໄຊ ສູນນະລາດ ກໍາມະການສໍາຮອງສູນກາງພັກ ເລຂາຄະນະບໍລິຫານງານ ສູນກາງ ຊປລ ທ່ານ ປອ ສີມອນ ພິຈິດ ກໍາມະການສູນກາງ ຊປລ ເລຂາຊາວໜຸ່ມກະຊວງ ພບ ມີບັນດາຄະນະກົມ, ພະນັກງານຫຼັກແຫຼ່ງພ້ອມດ້ວຍສະມາຊິກຊາວໜຸ່ມອ້ອມຂ້າງກະຊວງເຂົ້າຮ່ວມ.

       ຈຸດປະສົງຂອງການຈັດເວທີສົນທະນາໃນຫົວຂໍ້ ຄັງປັນຍາ Think Tank ຄັ້ງນີ້ ເພື່ອລະດົມແນວຄວາມຄິດຂອງຊາວໜຸ່ມອ້ອມຂ້າງກະຊວງກ່ຽວກັບການພັດທະນາຂະແໜງການພັດທະນາພະລັງງານ ແລະ ບໍ່ແຮ່ວ່າມັນມີປະສິດທິພາບ ແລະ ມີປະສິດທິຜົນ ຫຼື ບໍ? ການສ້າງຂະບວນການດັ່ງກ່າວນັ້ນແມ່ນແຜນການເຄື່ອນໄຫວຂອງຊາວໜຸ່ມໃນການສ້າງຂະບວນການຂໍ່ານັບຮັບຕ້ອນກອງປະຊຸມ 3 ຂັ້ນ ຂອງກະຊວງ ພບ ແລະ ສະຫຼຸບຕີລາຄາຖອດຖອນບົດຮຽນໃນການຈັດຕັ້ງປະຕິບັດແຜນພັດທະນາ 5 ປີຂອງຂະແໜງການພະລັງງານ ແລະ ບໍ່ແຮ່, ເຊິ່ງໃນໂອກາດທີ່ທ່ານ ນາຍົກລັດຖະມົນຕີ ໄດ້ໂອລົມໃຫ້ທິດຊີ້ນໍາຕໍ່ກອງປະຊຸມຂະແໜງພະລັງງານ ແລະ ບໍ່ແຮ່ທ່ານໄດ້ກ່າວວ່າ: ການມາໂອລົມນີ້ເປັນຄັ້ງທີ 2  ແລະ ຈະສືບຕໍ່ຊີ້ນໍາອີກວ່າ: ການພັດທະນາຂະແໜງພະລັງງານ ແລະ ບໍ່ແຮ່ ແມ່ນໄດ້ປະຕິບັດຕາມຄໍາຊີ້ນໍາທີ່ວ່າ: ຄິດໃຫ້ເລິກ, ເບິ່ງໃຫ້ໄກ, ໄປໃຫ້ເຖິງ. ຈາກຄໍາຊີ້ນໍາດັ່ງກ່າວ ຄຊປປລ ກະຊວງ ພບ ຈຶ່ງໄດ້ສະດຸ້ງໃນການຂໍອະນຸຍາດຈາກຄະນະພັກກະຊວງ ພບ , ຂໍເອົາຈິດໃຈຊີ້ນໍາດັ່ງກ່າວມາຈັດຕັ້ງປະຕິບັດດ້ວຍການຈັດກອງປະຊຸມລະດົມແນວຄວາມຄິດ “ຄັງປັນຍາ” ຂອງຊາວໜຸ່ມຄັ້ງນີ້ຂຶ້ນ.

ໃນເວທີດັ່ງກ່າວຍັງໄດ້ມີການແລກປ່ຽນຄໍາຄິດເຫັນຂອງບັນດາຊາວໜຸ່ມກ່ຽວກັບວິໄສທັດຂອງການພັດທະນາຂະແໜງການພະລັງງານ ແລະ ບໍ່ແຮ່ຕິດພັນກັບສິ່ງແວດລ້ອມສີຂຽວ.

                                                  (ໂດຍ: ຄໍາສິງ ວິໄລຄໍາ)

Leave a Reply

Your email address will not be published. Required fields are marked *