ນັກສຶກສາ 2 ພາກວິຊາຮຽນ ຂອງສະຖາບັນວິຈິດສິນແຫ່ງຊາດ ວາງສະແດງຜົນງານ

ອີງໃສແຜນການເຄື່ອນໄຫວປະຈຳປີຂອງ ສະຖາບັນວິຈິດສິນແຫ່ງຊາດ ສົກສຶກສາ 2018-2019 ແລະ ແຜນການເຄື່ອນໄຫວປະຈຳປີຂອງທັງ 2 ພາກວິຊາ ຄື: ພາກວິຊາຈິດຕະກຳ ແລະ ພາກວິຊາສິນລະປະພາບພິມ ເຊິ່ງເປັນພາກວິຊາທີ່ສຳຄັນຢູ່ໃນຫຼັກສູນການຮຽນການສອນຂອງສະຖາບັນ, ຫຼັງຈາກເສັງຈົບພາກຮຽນທີ 1 ແລ້ວ ຕ້ອງມີການປະເມີນຄຸນນະພາບຂອງການຮຽນ-ການສອນຂອງຄູ-ອາຈານ ແລະ ນັກສຶກສາ ນັບແຕ່ປີທີ 1 ຫາ ປີທີ 5, ຕ້ອງໄດ້ນຳເອົາຜົນງານ ກໍ່ຄືບົດຮຽນມາຈັດວາງສະແດງ ເພື່ອເຜີຍແຜ່ ແລະ ແລກປ່ຽນບົດຮຽນ ເຊິ່ງກັນ ແລະ ກັນ ພ້ອມທັງເປັນການວາງຈຳໜ່າຍ ຂາຍຜະຫຼິດຕະພັນ ເພື່ອເປັນທຶນຮອນໃນການສຶກສາຂອງນ້ອງໆອີກດ້ວຍ.

ງານວາງສະແດງໄດ້ຈັດຂຶ້ນໃນລະຫວ່າງວັນທີ 15-30 ພຶດສະພາ 2019 ນີ້ ທີ່ສະຖາບັນວິຈິດສິນ (ຫຼັງເກົ່າ) ຄຸ້ມເຈົ້າອານຸ ເມືອງຈັນທະບູລີ ນະຄອນຫຼວງວຽງຈັນ, ໂດຍໃຫ້ກຽດເຂົ້າຮ່ວມ ແລະ ເປີດງານໃນຄັ້ງນີ້ມີ ທ່ານ ປອ ໄມສິງ ຈັນບຸດດີ ຄະນະພັກກະຊວງຖະແຫຼງຂ່າວ ວັດທະນະທຳ ແລະ ທ້ອງທ່ຽວ, ຜູ້ອຳນວຍການສະຖາບັນວິຈິດສິນແຫ່ງຊາດ ທັງເປັນປະທານສະມາຄົມວິຈິດສິນແຫ່ງຊາດລາວ, ທ່ານ ປອ ບຸນທ່ຽງ ສິລິປະພັນ ທີ່ປຶກສາສະຖາບັນວິຈິດສິນ, ມີບັນດາສິນລະປິນແຫ່ງຊາດ-ສິນປິນດີເດັ່ນ, ສິນລະປິນອິດສະຫຼະ ຕະຫຼອດຮອດ ຄູ-ອາຈານ, ນັກຮຽນ-ສຶກສາ ແລະ ມວນຊົນທົ່ວໄປ ທັງພາຍໃນ ແລະ ຕ່າງປະເທດເຂົ້າຮ່ວມ. ຜົນງານທີ່ນັກສຶກສາຂອງ 2 ພາກວິຊາຮຽນ ຂອງສະຖາບັນວິດຈິດສິນແຫ່ງຊາດນຳມາວາງສະແດງໃນຄັ້ງນີ້ ທຸກໆຜົນງານ ກໍ່ຄືຮູບພາບນັ້ນ ແມ່ນແລ້ນແຕ່ມີ ຄວາມປານີດ ສວຍສົດງົດງາມ ເຊິ່ງມີເນື້ອໃນສະທ້ອນສ່ອງແສງເຖິງວັດທະນະທຳ-ສັງຄົມ, ວິຖີການດຳຊີວິດ, ທຳມະຊາດ, ສາດສະໜ້າ ແລະ ອື່ນໆ ມີທັງເປັນແບບຮູບມະທຳ, ນາມມະທຳ ແລະ ເຄິ່ງນາມມະທຳ, ສ່ວນເຕັກນິກຮູບແບບການສ້າງສັນ ກໍ່ມີແຕກຕ່າງກັນໄປ, ລວມຜົນງານທັງໝົດມີຈຳນວນ 350 ຜົນງານ, ໃນນັ້ນຜົນງານພາກວິຊາສິນລະປະພາບພິມມີ 200 ຜົນງານ ແລະ ຜົນງານຂອງນັກສຶກສາພາກຈິດຕະກຳ ມີທັງໝົດຈຳນວນ 150 ຜົນງານ.

 ຜົນງານທີ່ນຳມາວາງສະແດງໃນຄັ້ງນີ້ແມ່ນເພື່ອຕອບສະໜອງສັງຄົມ, ກໍ່ຄືບຸກຄົນທົວໄປ ທີ່ມີຄວາມສົນໃຈໃນງານສິນລະປະ, ຕ້ອງການຮູບພາບງາມໆນຳໄປຄອບຄອງ, ປະດັບປະດາ, ເປັນຂອງຂວັນ ຫຼື ເພືອເປັນການສະສົມງານສິນລະປະ… ອີກໜຶ່ງກໍ່ເພື່ອສະໜັບສະໜູນທຶນຮອນໃນການຊື້ອຸປະກອນການສຶກສາຂອງນ້ອງໆທີ່ກຳລັງສຶກສາ ແລະ ທັງເປັນການຊຸກຍູ້ໃຫ້ກຳລັງໃຈ ແກ່ພວກເຂົາເຈົ້າໄດ້ພັດທະນາທັດຊະ, ເຕັກນິກ, ແນວແນວຄວາມຄິດ, ສີມືຂອງເຂົາເຈົ້າເອງ ເວົ້າສະເພາະກໍ່ເພື່ອສົ່ງເສີມຂະແໜງການສິນລະປະລາວເຮົານີ້ ເພື່ອໃຫ້ມີຄວາມກ້າວໜ້າທຽບທັນກັບບັນດານາໆປະເທດໃນພາກພື້ນ ກໍ່ຄືສາກົນ.

# ໂດຍ: ສ.ສັນທະນາ

Leave a Reply

Your email address will not be published. Required fields are marked *