ກອງປະຊຸມໃຫຍ່ຜູ້ແທນຊາວໜຸ່ມກະຊວງຍຸຕິທຳ ຄັ້ງທີ XI

 ໃນວັນທີ 31 ມັງກອນ 2020 ນີ້, ທີ່ກະຊວງຍຸຕິທຳ ຄະນະບໍລິຫານງານຊາວໜຸ່ມກະຊວງຍຸຕິທຳໄດ້ຈັດກອງປະຊຸມໃຫຍ່ຜູ້ແທນຊາວໜຸ່ມກະຊວງຍຸຕິທຳ ຄັ້ງທີ XI ຂຶ້ນ, ພາຍໃຕ້ການເປັນປະທານຂອງສະຫາຍ ສຸລິຍາ ສີດາວົງ ເລຂາຄະນະບໍລິຫານງານຊາວໜຸ່ມກະຊວງຍຸຕິທຳ, ໂດຍໃຫ້ກຽດເຂົ້າຮ່ວມຂອງສະຫາຍ ໄຊສີ ສັນຕິວົງ ກຳມະການສູນກາງພັກ, ລັດຖະມົນຕີກະຊວງຍຸຕິທຳ, ສະຫາຍ ບຸນຕາ ເທບພະວົງ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ມີຄະນະພັກອ້ອມຂ້າງກະກະຊວງ, ຜູ້ແທນກອງປະຊຸມ ແລະ ແຂກຖືກເຊີນເຂົ້າຮ່ວມ.

 

  ກອງປະຊຸມສະຫາຍ ຄຳເສີດ ວະລະພັນ ຮອງເລຂາຄະນະບໍລິຫານງານຊາວໜຸ່ມ ກະຊວງຍຸຕິທຳໄດ້ຂຶ້ນຜ່ານບົດລາຍງານການເມືອງທັງສອງພາກ ເຊິ່ງໄດ້ຕີລາຄາຕໍ່ຜົນງານ ແລະ ບົດຮຽນຮຽນທີ່ຖອດຖອນໄດ້ຕະຫຼອດໄລຍະ 5 ປີທີ່ຜ່ານມາ ແລະ ຜ່ານແຜນການທິດທາງໃນຕໍ່ໜ້າ ແຕ່ນີ້ຮອດປີ 2025; ຕະຫຼອດໄລຍະທີ່ຜ່ານມາຄະນະບໍລິຫານງານຊາວໜຸ່ມກະຊວງຍຸຕິທຳ ໄດ້ມີຄວາມຕັ້ງໜ້າປະຕິບັດໜ້າທີ່ການເມືອງຂອງຕົນດ້ວຍຄວາມຮັບຜິດຊອບສູງ, ໄດ້ເປັນກຳລັງແຮງພື້ນຖານໃຫ້ແກ່ອົງຄະນະພັກ, ຄະນະນຳກະຊວງ ໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII, ເປັນເຈົ້າໃນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດຄັ້ງທີ VII, ມະຕິກອງປະຊຸມໃຫຍ່ສະມາຊິກຊາວໜຸ່ມກະຊວງຍຸດຕິທຳ ຄັ້ງທີ X ໂດຍສຸມໃສ່ການຈັດຕັ້ງປະຕິບັດວຽກງານວິຊາສະເພາະ ຕິດພັນກັບຂໍ້ແຂ່ງຂັນ 4 ບຸກ ຊາວໜຸ່ມ, ຂໍ້ແຂ່ງຂັນຮັກຊາດ ແລະ ພັດທະນາ, ດ້ວຍຈິດໃຈບຸກທະລຸຢ່າງແຂງແຮງ ແລະ ຕໍ່ເນື່ອງ, ສາມາດຍາດໄດ້ຜົນສຳເລັດທີ່ສຳຄັນຫຼາຍດ້ານ ເຮັດໃຫ້ຄະນະບໍລິຫານງານຊາວໜຸ່ມກະຊວງຍຸຕິທຳໄດ້ມີການຫັນປ່ຽນໃນທຸກດ້ານຢ່າງເປັນຮູບປະທຳຕາມທິດ ແລະ ຈຸດໝາຍທີ່ວາງໄວ້.  ເຖິ່ງວ່າຈະມີຜົນງານ ແລະ ໄຊຊະນະທີ່ສາມາດຍາມາດໄດ້ນັ້ນ ກໍ່ບໍ່ສາມາດປະສະຈາກຕໍ່ສິ່ງທີ່ຂາດຕົກປົກຜ່ອງເປັນຕົ້ນແມ່ນບັນຫາປະກົດການຫຍໍ້ທໍ້ທີ່ເກີດຂຶ້ນໃນໜ່ວຍຮາກຖານຊາວໜຸ່ມ ກໍຄືຖັນແຖວສະມາຊິກຊາວໜຸ່ມຈຳນວນໜຶ່ງ ທີ່ຈະຕ້ອງໄດ້ເອົາໃຈໃສ່ປັບປຸງແກ້ໄຂໃນຕໍ່ໜ້າ. ປະຈຸບັນຄະນະບໍລິຫານງານຊາວໜຸ່ມກະຊວງຍຸຕິທຳ ມີທັງໝົດ 9 ສະຫາຍ, ຍິງ 1 ສະຫາຍ, ຄະນະປະຈຳ 5 ສະຫາຍ, ຄະນະກວດກາ 2 ສະຫາຍ, ມີ 11 ໜ່ວຍ ແລະ 1 ຮາກຖານຂຶ້ນກັບ, ມີສະມາຊິກທັງໝົດ 1822 ສະຫາຍ, ຍິງ 777 ສະຫາຍ, ໃນນັ້ນສະມາຊິກເປັນພະນັກງານ  317 ສະຫາຍ, ຍິງ131 ສະຫາຍ, ສະມາຊິກທີ່ເປັນນັກສຶກສາ 1.505 ສະຫາຍ, ຍິງ 646 ສະຫາຍ.

 ຜູ້ແທນກອງປະຊຸມຍັງໄດ້ໃຊ້ສິດປະຊາທິປະໄຕບອນບັດເລືອກຕັ້ງເອົາຄະນະບໍລິຫານງານຊາວໜຸ່ມກະຊວງຍຸຕິທຳ ຊຸດໃໝ່ ເຊິ່ງມີຜູ້ລົງສະໝັກເລືອກຕັ້ງຈຳນວນ 19 ສະຫາຍ ແລະ ເລືອກເອົາ 15 ສະຫາຍເຂົ້າຢູ່ໃນຄະນະບໍລິຫານງານຊາວໜຸ່ມກະຊວງ, ກອງປະຊຸມຄັ້ງປະຖົມມະລຶກເປັນເອກະສັນເລືອກເອົາສະຫາຍ ສຸລິຍາ ສີດາວົງ ເປັນເລຂາຄະນະບໍລິຫານງານຊາວໜຸ່ມກະຊວງຍຸຕິທຳ ອີກຕື່ມສະໄໝ, ເລືອກເອົາສະຫາຍ ບຸນມີ ບຸບຜາລີວັນ ເປັນຮອງເລຂາ, ສະຫາຍ ໄຊຍະສັກ ແກ້ວມະນີວົງ ເປັນຮອງເລຂາ ພ້ອມທັງເປັນປະທານກວດກາ, ສະຫາຍ ນາງ ເພັດສະໄໝ ໄຊມຸງຄຸນ ແລະ ສະຫາຍ ມິດລະຄອນ ສົງຄຳຈັນ ເປັນຄະນະ, ກອງປະຊຸມຍັງໄດ້ເລືອກເອົາຄະນນຳປະຈຳ ຈຳນວນ 5 ສະຫາຍ, ເລືອກເອົາປະທານ ແລະ ຮອງປະທານກວດກາ, ເລືອກເອົາຜູ້ແທນທີ່ຈະເຂົ້າຮ່ວມກອງປະຊຸມໃຫຍ່ຊາວໜຸ່ມທົ່ວປະເທດ ຄັ້ງທີ VIII ຈຳນວນ 3 ສະຫາຍ ຕື່ມອີກ.

 

Leave a Reply

Your email address will not be published. Required fields are marked *