ຊາວໜຸ່ມອາສາສະໝັກ“ອ້າຍ-ເອື້ອຍ ສອນນ້ອງ”ຄັ້ງທີ 2 ຈັດກິດຈະກໍາສອນໜັງສືໃຫ້ນ້ອງໆ ທີ່ແຂວງສາລະວັນ

ໃນວັນທີ 11 ກໍລະກົດ 2019 ທີ່ຜ່ານມານີ້, ຊາວໜຸ່ມອາສາສະໝັກ ຈາກມະຫາວິທະຍາໄລແຫ່ງຊາດ ໄດ້ເດີນທາງໄປສອນໜັງສືໃຫ້ນ້ອງໆ ທີ່ແຂວງສາລະວັນ ພາຍໃຕ້ກິດຈະກໍາ “ອ້າຍ-ເອື້ອຍ ສອນນ້ອງ”ຄັ້ງທີ 2, ນໍາໂດຍ ສະຫາຍ ພຽງສະນິດ ຈັນທະວີໄຊ ເລຂາຄະນະບໍລິຫານງານຊາວໜຸ່ມ ມະຫາວິທະຍາໄລແຫ່ງຊາດ, ເຊິ່ງພິທີມອບ-ຮັບກິດຈະກຳຄັ້ງນີ້  ເປັນກຽດເຂົ້້າຮ່ວມພິທີຂອງ  ສະຫາຍ ຈັນສີລອນ ສີສົມບູນ ກຳມະການພັກແຂວງ, ເລຂາຄະນະບໍລິຫານງານຊາວໜຸ່ມແຂວງ ສາລະວັນ, ສະຫາຍ ນາງ ນວນໃສ ແກ້ວເມກ ຄະນະປະຈຳພັກ ຮອງເຈົ້າເມືອງ ເມືອງສາລະວັນ, ມີບັນດາແຂກທີ່ຖືກເຊີນຈາກພະແນກການອ້ອມຂ້າງ, ພ້ອມດ້ວຍ ຄູ – ອາຈານ ແລະ ຊາວໜຸ່ມອາສາສະໝັກເຂົ້າຮ່ວມ.

ຈຸດປະສົງຂອງກິດຈະກໍາຄັ້ງນີ້ ເພື່ອປະຕິບັດຕາມສັນຍາແຮກສ່ຽວ ລະຫວ່າງ ຊາວໜຸ່ມມະຫາວິທະຍາໄລ  ແຫ່ງຊາດ ກັບ 4 ສ່ຽວ, ໂດຍສະເພາະ ຊາວໜຸ່ມແຂວງສາລະວັນ  ໃຫ້ໄດ້ຮັບການຈັດຕັ້ງປະຕິບັດຢ່າງຕໍ່ເນື່ອງ ແລະ ໄດ້ຮັບຜົນດີ, ທັງນີ້ກໍເພື່ອ ຫັນເອົາສະມາຊິກຊາວໜຸ່ມ ໄດ້ລົງສູ່ຮາກຖານ ແລະ ເຄື່ອນໄຫວທາງດ້ານວັດທະນະທຳ – ສັງຄົມ ຂອງຊາວໜຸ່ມ – ເຍົາວະຊົນ ໃນການຈັດຕັ້ງຜັນຂະຫຍາຍໃຫ້ປະກົດຜົນເປັນຈິງ, ໂດຍແນໃສ່ປູກຈິດສຳນຶກໃຫ້ຊາວໜຸ່ມ ກໍ່ຄືເຍົາວະຊົນ ໃຫ້ຮູ້ຈັກຮັກປະເທດຊາດ, ບ້ານເກີດເມືອງນອນ, ຫັນມາເອົາໃຈໃສ່ໃນການສຶກສາຮໍ່າຮຽນ,ຍົກລະດັບຄວາມຮູ້ ຄວາມສາມາດ, ໝູນໃຊ້ຄວາມຮູ້ທີ່ໄດ້ຮຽນມາ ໄປຖ່າຍທອດແກ່ສັງຄົມ, ນຳໃຊ້ເວລາຫວ່າງໃຫ້ເປັນປະໂຫຍດ ແລະ ຫຼີກລ້ຽງປະກົດການຫຍໍ້ທໍ້ ຈາກສິ່ງເສບຕິດຕ່າງໆ ໃນຊ່ວງໄລຍະພັກແລ້ງ, ຄະນະບໍລິຫານງານ     ຊາວໜຸ່ມແຂວງສາລະວັນ ຮ່ວມກັບ ຄະນະຊາວໜຸ່ມມະຫາວິທະຍາໄລແຫ່ງຊາດ ໄດ້ຮ່ວມກັນຈັດກິດຈະກຳ

ອ້າຍ – ເອື້ອຍສອນນ້ອງ ຂຶ້ນເລີ່ມແຕ່ປີ 2018 – 2019 ເຊິ່ງປີນີ້ເປັນປີທີ 2 ຂອງກິດຈະກໍາດັ່ງກ່າວ

ຊາວໜຸ່ມອາສາສະໝັກ ຈາກມະຫາວິທະຍາໄລແຫ່ງຊາດ ທີ່ເຂົ້້າຮ່ວມກິດຈະກໍາຄັ້ງນີ້ ມີຈໍານວນ 16 ສະຫາຍ, ຍິງ 07 ສະຫາຍ, ຈາກ 6 ຄະນະວິຊາ ( ຄສວ, ຄສສ, ຄນລ, ຄສບ, ຄອສ ແລະຄປມ) ແລະບົດຮຽນທີ່ນໍາໄປສິດສອນຄັ້ງນີ້ປະກອບມີ: ວິຊາພາສາອັງກິດ, ວິຊາພາສາລາວ, ວິຊາຄະນິດສາດ ແລະ ວິຊາຟີຊິກສາດ ໃນລະດັບປະຖົມ ແລະຊັ້ນມັດທະຍົມ, ເຊິ່ງກິດຈະກໍາດັ່ງກ່າວ ແມ່ນເລີ່ມແຕ່ເດືອນ ກໍລະກົດ – ເດືອນສິງຫາ 2019 ນີ້  ( 2 ເດືອນ).

Leave a Reply

Your email address will not be published. Required fields are marked *