ປາຖະກະຖາວັນສ້າງຕັ້ງ ຄຊປລ ຄົບຮອບ 64 ປີ

ໃນວັນທີ 3 ເມສາ 2019 ນີ້ຢູ່ທີ່ສະໂມສອນໃຫຍ່ຂອງກະຊວງປ້ອງກັນປະເທດ ໄດ້ຈັດພິທີປາຖະກະຖາວັນສ້າງ ຕັ້ງ ຄະນະຊາວໜຸ່ມ ປະຊາຊົນ ປະຕິວັດລາວ ຂຶ້ນໂດຍການໃຫ້ກຽດເຂົ້າຮ່ວມ ແລະ ປາຖະກະຖາຂອງ ສະຫາຍ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງ ຊາວໜຸ່ມ ປະຊາຊົນ ປະຕິວັດລາວ, ສະຫາຍ ພັອ ສົມພົງ ແພງປັນຍາ ເລຂາຄະນະບໍລິຫານງານຊາວໜຸ່ມກະຊວງປ້ອງກັນປະເທດ, ມີບັນດາຄະນະກົມອ້ອມ ຂ້າງສູນກາງ ຊປລ, ກົມກອງຕ່າງໆພາຍໃນກະຊວງປ້ອງກັນປະເທດພ້ອມດ້ວຍສະມາຊິກຊາວໜຸ່ມເຂົ້າຮ່ວມ.ໃນພິທີ ສະຫາຍ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງ ຊາວໜຸ່ມ ປະຊາຊົນ ປະຕິວັດລາວ ໄດ້ໃຫ້ເລົ່າເຖິງມູນເຊື້ອແຫ່ງການຕໍ່ສູ້ຢ່າງພິລະອາດຫານຂອງຊາວໜຸ່ມໂດຍສະເພາະແມ່ນການເຕົ້າໂຮມ, ການປົກ ປັກຮັກສາ ແລະ ສ້າງສາພັດທະນາປະເທດຊາດ ເຊິ່ງໄດ້ເຮັດໃຫ້ຊາວໜຸ່ມຈຳນວນບໍ່ໜ້ອຍໄດ້ເສຍສະຫຼະຊີວິດ ເລືອດເນື້ອ ເພື່ອປົກປັກຮັກສາເອກະລາດ ແລະ ຜືນແຜ່ນດີນອັນແສນຮັກຂອງຕົນໄວ້ ແລະ ຜ່ານຂະບວນ ການດັ່ງກ່າວນັ້ນໄດ້ເກີດມີບັນດາບັນພະບູລຸດທີ່ມີຊື່ສຽງເຊັ່ນ: ເຈົ້າຂຸນບູລົມ, ເຈົ້າຟ້າງຸ່ມ, ເຈົ້າສຸລິຍະວົງສາ, ເຈົ້າໄຊເສດຖາທິລາດ, ເຈົ້າອານຸວົງ, ທ່ານໄກສອນ ພົມວິຫານ…ເຊິ່ງໄດ້ນຳພາປະຊາຊົນຕໍ່ສູ້ການຮຸກຮານ ພາຍນອກ ໄດ້ນຳພາປະເທດຊາດຜ່ານພົ້ນພາຍຸລົມແດງແຕ່ລະຍຸກແຕ່ລະສະໄໝ ແລະ ສາມາດຮັກສາດີນແດນ ໄວ້ຢ່າງໝັ້ນຄົງ. ນອກນັ້ນສະຫາຍຍັງໄດ້ເນັ້ນໜັກໃຫ້ຊາວໜຸ່ມຮຸ່ນປັດຈຸບັນຈົ່ງອອກແຮງປົກປັກຮັກສາ ແລະ ເສີມຂະ ຫຍາຍມູນເຊື້ອອັນດີງາມຂອງຊາວໜຸ່ມຮຸ່ນກ່ອນໂດຍຄວນເອົາໃຈໃສ່ສຶກສາອົບຮົມການເມືອງ-ແນວຄິດ ແລະ ປູກຈິດສຳນຶກໃຫ້ຊາວໜຸ່ມ, ເຍົາວະຊົນ-ອະນຸຊົນທັນວາໃຫ້ມີນ້ຳໃຈຮັກຊາດ ຮັກບ້ານເກີດເມືອງນອນ, ມີມານະ ຈິດອົດທົນ, ມີຄຸນສົມບັດສິນທຳປະຕິວັດ ແລະ ຮັກການຄົ້ນຄ້ວາ-ສຶກສາຮຽນຮູ້; ເອົາໃຈໃສ່ປຸກລະດົມເຕົ້າ ໂຮມຄວາມສາມັກຄີຊາວໜຸ່ມລາວບັນດາເຜົ່າ ໃຫ້ເປັນປຶກແຜ່ນແໜ້ນໜາຢູ່ອ້ອມຂ້າງພັກ, ຮູ້ເສີມຂະຫຍາຍມູນເຊື້ອ ຄວາມສາມັກຄີໃຫ້ກ້ວາງຂວາງ-ໜັກແໜ້ນ; ເອົາໃຈໃສ່ຊີ້ນຳໆພາການຈັດຕັ້ງ ແລະ ການເຄື່ອນໄຫວຂອງຊາວໜຸ່ມ, ເຍົາວະຊົນ-ອະນຸຊົນໃຫ້ມີຄວາມໜັກແໜ້ນເຂັ້ມແຂງທາງດ້ານປະລິມານ ແລະ ຄຸນະພາບ; ເອົາໃຈໃສ່ປົກປ້ອງສິດ ແລະ ຜົນປະໂຫຍດອັນຊອບທຳຂອງຊາວໜຸ່ມ, ເຍົາວະຊົນ-ອະນຸຊົນທັນວາ ໂດຍການສ້າງໂອກາດໃຫ້ ໄດ້ເຂົ້າຮ່ວມເປັນກຳມະການ, ຄະນະຮັບຜິດຊອບສ້າງກົດໝາຍ, ນິຕິກຳຕ່າງໆ ແລະ ເປີດໂອກາດໃຫ້ຊາວໜຸ່ມ-ເຍົາວະຊົນໄດ້ເຂົ້າຮ່ວມການປະກອບຄຳຄິດຄຳເຫັນໃນກອງປະຊຸມຕ່າງໆ; ເອົາໃຈໃສ່ເພີ່ມທະວີການສຶກສາອົບຮົມ ໃຫ້ຊາວໜຸ່ມ, ເຍົາວະຊົນ-ອະນຸຊົນທັນວາ ຮູ້ປົກປັກຮັກສາ ແລະ ເສີມຂະຫຍາຍມູນເຊື້ອນ້ຳໃຈອັນພິລະອາດຫານ, ມີຄວາມເສຍສະຫຼະ, ດຸໝັ່ນຂະຫຍັນພຽນ, ຮັກການອອກແຮງງານ, ມີແບແຜນການດຳລົງຊີວິດທີ່ຖືກຕ້ອງ, ປະຢັດມັດທະຍັດ, ສັດຊື່ບໍລິສຸດ ແລະຮັກສາຮີດຄອງປະເພນີອັນດີງາມໄວ້ໃຫ້ຄຽງຄູ່ກັບຊາດລາວຕະຫຼອດໄປ.

# ໂດຍ: ເຄນອ່ອນ ພອນວິໄລ

Leave a Reply

Your email address will not be published. Required fields are marked *