ຜັນຂະຫຍາຍມູນເຊື້ອ ຄຊປປລ ຄົບຮອບ 64 ປີ

 ເພື່ອເປັນການຜັນຂະຫຍາຍມູນເຊື້ອອັນດີງາມ ລະອິດລະອ້ຽວຂອງ ຄຊປລ ໃຫ້ຊາວໜຸ່ມ ໄດ້ຮັບຮູ້ເຂົ້າໃຈຢ່າງ ເລີກເຊິ່ງ ດັ່ງນັ້ນ ໃນວັນທີ 2 ເມສາ 2019 ນີ້ຄະນະບໍລິຫານງານຊາວໜຸ່ມສານປະຊາຊົນສູງສຸດ ຈຶ່ງໄດ້ຈັດພິ ທີປາຖະກະຖາວັນສັ້ງຕັ້ງ ຄຊປລ ຄົບຮອບ 64 ປີຂຶ້ນ ໃຫ້ກຽດເປັນປະທານ ແລະ ປາຖະກະຖາໂດຍ ທ່ານ ຄຳພັນ ສິດທິດຳພາ ກຳມະການສູນກາງພັກ, ປະທານສານປະຊາຊົນສູງສຸດ, ມີ ທ່ານ ບຸນຂວາງ ທະວີສັກ ເລຂາຄະນະບໍລິຫານງານຊາວໜຸ່ມສານປະຊາຊົນສູງສຸດ ທັງເປັນຮອງປະທານສານປະຊາຊົນສູງສຸດ ພ້ອມດ້ວຍບັນດາສະມາຊິກຊາວໜຸ່ມເຂົ້າຮ່ວມຢ່າງຫຼວງຫຼາຍ.

ໂອກາດອັນມີຄວາມໝາຍສຳຄັນນີ້ ທ່ານ ຄຳພັນ ສິດທິດຳພາ ກຳມະການສູນກາງພັກ, ປະທານສານປະຊາຊົນ ສູງສຸດ ໄດ້ຍົກໃຫ້ເຫັນວ່າພວກເຮົາຍາມໃດກໍຕ້ອງຄິດສະເໝີວ່າ: ມີອະດີດຈຶ່ງມີປັດຈຸບັນ, ມີປັດຈຸບັນຈຶ່ງມີອະນາຄົດ, ມີມື້ວານຈຶ່ງມີມື້ນີ້, ມີມື້ນີ້ຈຶ່ງມີມື້ອື່ນ, ມີພໍ່ເຖົ້າມີປູ່ມີຍ່າຈຶ່ງມີພໍ່ແມ່, ມີພໍ່ແມ່ຈຶ່ງມີພວກເຮົາ, ມີປ້າລຸງ ອາວອາອ້າຍເອື້ອຍທີ່ໄດ້ຕໍ່ສູ້ ແລະ ຍອມເສຍສະຫຼະທຸກສິ່ງທຸກຢ່າງເພື່ອແລກມາເຊິ່ງຄວາມເປັນເອກະລາດແຫ່ງຊາດ ອິດສະຫຼະພາບ ແລະຄວາມສົມບູນພູນສຸກ ຈຶ່ງເຮັດໃຫ້ຊາວໜຸ່ມພວກເຮົາໄດ້ຮໍ່າຮຽນ ໄດ້ອອກແຮງງານ ໄດ້ມ່ວນຊື່ນເບີກບານຄືດັ່ງທຸກມື້ນີ້. ສະນັ້ນ, ໄດ້ກິນເຂົ້າຢ່າລືມນາ ໄດ້ກິນປາຢ່າລືມນ້ຳ ໄດ້ກິນນ້ຳຢ່າລືມບໍ່ ໄດ້ກິນໝາກຢ່າລືມຜູ້ປູກຕົ້ນ ໄດ້ເປັນຄົນມີຄວາມຮູ້ ໄດ້ສຶກສາຮໍ່າຮຽນ ໄດ້ເຮັດວຽກງານທຸກມື້ນີ້ ຢ່າລືມພໍ່ແມ່ ປ້າລຸງອາວອາ ທີ່ໄດ້ຕໍ່ສູ້ກັບຈັກກະພັດ ແລະ ພວກສັດຕູຜູ້ຮຸກຮານໃນເມື່ອກ່ອນ. ນອກນັ້ນທ່ານຍັງ ໄດ້ເນັ້ນໜັກໃຫ້ຊາວໜຸ່ມຄື: 1).ຈົ່ງສືບທອດມູນເຊື້ອຂອງຄົນຮຸ່ນກ່ອນທີ່ມີຄວາມອົງອາດກ້າຫານ ເດັດດ່ຽວໜຽວແໜ້ນທີ່ໄດ້ຕໍ່ສູ້ເພື່ອຍາດມາເຊິ່ງຄວາມເປັນເອກະລາດ ອິດສະຫຼະພາບ ປະຊາທິປະໄຕ ແລະ ຄວາມສົມບູນພູນສຸກ; 2).ຄົນຮຸ່ນໜຸ່ມຕ້ອງອົດທົນຄົ້ນຄ້ວາຮໍ່າຮຽນໃຫ້ມີຄວາມຮູ້ຫຼາຍດ້ານ ມີຄວາມຮູ້ຈິງ  ເພື່ອນຳມາພັດທະນາປະເທດຊາດ ໃຫ້ຫຼຸດພົ້ນອອກຈາກຄວາມດ້ອຍພັດທະນາ ແລະຢາກພັດທະນາປະເທດຊາດໃຫ້ກ້າວໜ້າທັນສະໄໝ ຕ້ອງມີຄວາມຮູ້ດ້ານວັດທະນະທຳ, ວິຊາສະເພາະ, ທິດສະດີການເມືອງ, ວິທະຍາສາດເຕັກນິກ, ເຕັກໂນໂລຊີທີ່ທັນສະໄໝ. ດັ່ງທ່ານ ປະທານ ໄກສອນ ພົມວິຫານ ໄດ້ກ່າວໄວ້ວ່າ “ປະເທດຊາດຈະບໍ່ມອບທຶນຮອນອັນປະເສີດໄວ້ໃຫ້ຄົນທີ່ບໍ່ມີຄວາມຮູ້, ຂາດຄຸນສົມບັດ”. 3)ຄົນຮຸ່ນໜຸ່ມຕ້ອງມີຫຼັກໝັ້ນອັນໜັກແໜ້ນ ມີອຸດົມການຢ່າງຈະແຈ້ງ ເພື່ອກ້າວໄປຕາມເສັ້ນທາງສັງຄົມນິຍົມ ເພາະແມ່ນເສັ້ນທາງທີ່ດີເລີດກ່ວາໝູ່ ຢ່າໄປຜິດເສັ້ນທາງທີ່ຊາວໜຸ່ມຮຸ່ນກ່ອນໄດ້ສ້າງໄວ້. 4)ຄົນຮຸ່ນໜຸ່ມຍາມໃດກໍຕ້ອງສ້າງຕົນເອງໃຫ້ມີຄຸນສົມບັດສິນທຳປະຕິວັດ, ຄຸນສົມບັດຍາມໃດກໍຕ້ອງຮັກຊາດ, ຮັກລະບອບໃໝ່, ຮັກຕົນເອງ, ຮັກປະຊາຊົນ ແລະເຮັດວຽກດ້ວຍຄວາມຫ້າວຫັນ, ມີຄວາມຮັບຜິດຊອບສູງ, ຊື່ສັດບໍລິສຸດ, ຜ່ານຜ່າທຸກອຸປະສັກ, ຮັບໃຊ້ຊາດຮັບໃຊ້ປະຊາຊົນຢ່າງສຸດໃຈ, ມີສະຕິລະວັງຕົວຕໍ່ກົນອຸບາຍຂອງສັດຕູເປັນຕົ້ນ. 5)ຕ້ອງຊອກຮູ້ຮໍ່າຮຽນພາສາຕ່າງປະເທດ ເພື່ອສະດວກໃນການເຄື່ອນໄຫວວຽກງານພົບປະ, ຮູ້ຍາດແຍ່ງການພົວພັນຮ່ວມມື, ຮູ້ເລືອກເຟັ້ນເອົາຂໍ້ມູນຂ່າວສານຈາກຕ່າງປະເທດ ແລະ ຮູ້ນຳໃຊ້ເຂົ້າໃນວຽກງານທີ່ຕົນເອງຮັບຜິດຊອບ. 6)ຕ້ອງຮູ້ບັນຫາການເມືອງ, ມີຫຼັກໝັ້ນ, ມີທັດສະນະຖືກຕ້ອງ, ມີອຸດົມການສັງຄົມນິຍົມ, ຮູ້ເບິ່ງບັນຫາ, ຮູ້ວິເຄາະວິໄຈບັນຫາ, ຮູ້ສະພາບການບ້ານເມືອງ, ຊອກຮູ້ຜົນງານການຊີ້ນຳໆພາຂອງພັກ-ລັດ, ປຸກລະດົມຊາວໜຸ່ມ-ເຍົາວະຊົນໃຫ້ເຂົ້າໃຈຖືກຕ້ອງຕາມແນວທາງນະໂຍບາຍຂອງ ພັກ-ລັດ, ມີອຸດົມການຢາກໃຫ້ປະຊາຊນຫຼຸດພົ້ນອອກຈາກຄວາມທຸກຍາກ. 7)ຕ້ອງຮູ້ຮັກສາສຸຂະພາບຕົນເອງຈຶ່ງສາມາດເຮັດລ້ອນໜ້າທີ່ວຽກງານທີ່ຖືກມອບໝາຍ ແລະ ສາມາດປະກອບສ່ວນສ້າງສາ ແລະ ພັດທະນາປະເທດຊາດ. 8) ພະນັກງານໜຸ່ມຕ້ອງຫັນທິດລົງຮາກຖານ ເພື່ອສ້າງຕົນເອງໃນຂະບວນການວຽກງານຕົວຈິງຢູ່ຂັ້ນຮາກຖານພິທີດັ່ງກ່າວໄດ້ດຳເນີນເປັນເວລາເຄິ່ງວັນຈຶ່ງສຳເລັດ.

Leave a Reply

Your email address will not be published. Required fields are marked *