ຂະບວນການບໍລິຈາກເລືອດຂອງຊາວໜຸ່ມກະຊວງສາທາລະນະສຸກ

ເພື່ອຕອບສະໜອງເລືອດໃຫ້ພຽງພໍກັບຄວາມຕ້ອງການຊົມໃຊ້ຕົວຈິງຂອງສັງຄົມ ກໍຄືຊ່ວຍກອບກູ້ເອົາຊີວິດຄົນເຈັບທີ່ນອນປິ່ນປົວຢູ່ຕາມໂຮງໝໍແຫ່ງຕ່າງໆ ໃນຂອບເຂດທົ່ວປະເທດ ທີ່ເກີດຈາກອຸບັດຕິເຫດ, ການຜ່າຕັດ, ມະເຮັງຂາດເລືອດ, ແມ່ຍິງເກີດລູກຜິດປົກກະຕິ ແລະ ອື່ນໆ ທັງເປັນການແກ້ໄຂບັນຫາການຂາດແຄນເລືອດຂອງສູນເລືອດແຫ່ງຊາດ ອົງການກາແດງລາວ ຊຶ່ງປະສົບຢູ່ໃນຂະນະນີ້ ອັນເນື່ອງມາຈາກຄົນເຈັບທີ່ຕ້ອງການເລືອດທີ່ນັບມື້ນັບເພີ່ມຂຶ້ນໃນແຕ່ລະວັນ.
ບັນຫາການຂາດແຄນເລືອດຂອງສູນເລືອດໃນປັດຈຸບັນ ແມ່ນເນື່ອງມາຈາກຈຳນວນຜູ້ມາບໍລິຈາກເລືອດມີຂີດຈຳກັດໜ້ອຍຫລາຍ. ແຕ່ກົງກັນຂ້າມຈຳນວນຜູ້ຊົມໃຊ້ເລືອດຊໍ້າພັດເພີ່ມຂຶ້ນ ແລະ ໃນຂະນະທີ່ຊ່ວງມີງານເທບ ສະການຕ່າງໆ ມັກຈະມີການເກີດອຸປະຕິເຫດຕາມທ້ອງຖະໜົນ ຫຼື ໄລຍະການລະບາດຂອງພະຍາດໄຂ້ເລືອດອອກ ແບບນີ້ເປັນຕົ້ນ ຍິ່ງມີຄວາມຕ້ອງການເລືອດສູງ ສະນັ້ນ ຈິ່ງຮຽກຮ້ອງໃຫ້ທຸກພາກສ່ວນຢູ່ໃນສັງຄົມ ຈົ່ງພ້ອມກັນປະກອບສ່ວນບໍລິຈາກເລືອດເພື່ອການກຸສົນ ແລະ ຊ່ວຍເຫລືອສັງຄົມໃຫ້ຫລາຍຂຶ້ນ.

  ຍ້ອນເຫັນໄດ້ເຖິງຄວາມສຳຄັນຕໍ່ບັນຫາດັງກ່າວ ທາງຄະນະບໍລິຫານງານຊາວໜຸ່ມກະຊວງສາທາລະນະສຸກ ຮ່ວມກັບສູນເລືອດແຫ່ງຊາດ ໄດ້ຈັດຂະບວນການບໍລິຈາກເລືອດຂອງຊາວໜຸ່ມກະຊວງສາທາລະນະສຸກ ຂຶ້ນໃນວັນທີ 29 ມີນາ 2019 ທີ່ກະຊວງສາທາລະນະສຸກ ທັງເປັນການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ອົງຄະນະພັກກະຊວງສາທາລະນະສຸກ ຄັ້ງທີ IX ແລະກອງປະຊຸມໃຫ່ຍຂອງ 3 ອົງການຈັດຕັ້ງມະຫາຊົນ ກະຊວງສາທາລະນະສຸກ, ພິເສດແມ່ນເປັນການສ້າງຂະບວນການຕ້ອນຮັບວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 64 ປີ (14 ເມສາ 1955 ຫາ 14 ເມສາ 2019) ທີ່ຈະມາເຖິງ, ເປັນກຽດເຂົ້າຮ່ວມໃນພິທີມີ ທ່ານ ຮສ. ດຣ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ, ທ່ານ ດຣ ໄພວັນ ແກ້ວປະເສີດ ກຳມະການສູນກາງຊາວໜຸ່ມ, ເລຂາຊາວໜຸ່ມກະຊວງສາທາລະນະສຸກ, ຜູ້ອຳນວຍການໂຮງໝໍເສຖາທິລາດ, ທ່ານ ດຣ ຈັນທະລາ ສຸດສາຄອນ ກົວໜ້າສູນເລືອດແຫ່ງຊາດ ມີບັນດາສະມາຊິກຊາວໜຸ່ມອ້ອມຂ້າງກະຊວງສາທາລະນະສຸກເຂົ້າຮ່ວມເປັນຈຳນວນຫຼວງຫຼາຍ.

  ການຈັດຂະບວນການບໍລິຈາກເລືອດຂອງຊາວໜຸ່ມກະຊວງສາທາລະນະສຸກຄັ້ງນີ້ໄດ້ຮັບເລືອດຈາກອາສາສະໝັກຊາວໜຸ່ມອ້ອມຂ້າງກະຊວງທີ່ສະໝັກໃຈເຂົ້າມາບໍລິຈາກເລືອດໂດຍບໍ່ຮຽກຮ້ອງສິ່ງຕອບແທນ ໃນນັ້ນໄດ້ຮັບເລືອດຈຳນວນ 127 ຖົງ, ເຊິ່ງຕີລາຄາແມ່ນທະລຸເປົ້າໝາຍທີ່ຄາດໄວ້.

ໂດຍ: ສ.ສັນທະນາ

Leave a Reply

Your email address will not be published. Required fields are marked *