2 ສິລະປິນ ວາງສະແດງຜົນງານພາຍໃຕ້ຫົວຂໍ້ “ເຮົາຮັກສິລະປະກຳ ແຮງບັນດານໃຈປະດິດຄິດແຕ່ງແຕ້ມ”

ນັກສິລະປິນລາວ 2 ທ່ານ ຄື: ທ່ານ ປອ ໄມສິງ ຈັນບຸດດີ ຫົວໜ້າສະຖາບັນວິຈິດສິນແຫ່ງຊາດ, ປະທານສະມາຄົມວິຈິດສິນລາວ, ນັກສິລະປິນດີເດັ່ນ ແລະ ທ່ານ ປອ ກັນຫາ ສີກຸນນະວົງ ສິລະປິນຜູ້ຊົງຄຸນວຸດທິ ສາຂາດ້ານວິຈິດສິນ ໄດ້ນຳເອົາຜົນງານທີ່ສະສົມມາເປັນເວລາຫຼາຍປີ ນັບແຕ່ປີ 2015 ເປັນຕົ້ນມາ ເພື່ອອອກມາວາງສະແດງສູ່ສາຍຕາມວນຊົນໃຫ້ໄດ້ຮັບຮູ້ ແລະ ພົບເຫັນ ທັງມີຄວາມຫຼົງໄຫຼໃນງານສິລະປະ, ປະສົມປະສານກັບຈິນຕະນາການ ແລະ ແນວຄິດອັນລໍ້າເລີດຂອງນັກນັກສິລະປິນ ທີ່ໄດ້ອອກແບບມາ ໂດຍຜ່ານງານສິລະປະອັ່ນປານີດ, ລະອຽດອ່ອນຊ້ອຍ ແລະ ຈົບງາມ; ງານວາງສະແດງສິລະປະກຳຮ່ວມສະໄໝ ຄັ້ງນີ້ພາຍໃຕ້ຫົວຂໍ້ “ເຮົາຮັກສິລະປະກຳ ແຮງບັນດານໃຈປະດິດຄິດແຕ່ງແຕ້ມ”.
ທ່ານ ປອ ໄມສິງ ຈັນບຸດດີ ໄດ້ກ່າວວ່າ: ການຈັດງານວາງສະແດງສິລະປະຮ່ວມສະໄໝໃນຄັ້ງນີ້ ແມ່ນເພື່ອເປີດໂອກາດໃນການແລກປ່ຽນ ຄວາມຮູ້ດ້ານວິຊາການ ກັບບັນດານັກສິລະປິນທັງພາຍໃນ ແລະ ຕ່າງປະເທດ ເພື່ອນຳໄປພັດທະນາຕົນເອງ, ເຊິ່ງເປັນແຫຼ່ງຄວາມຮູ້ໃນການສຶກສາ ສາຂາວິຊາວິຈິດສິນຂອງນັກສຶກສາ, ນັກສິລະປິນ ຕະຫຼອດເຖິງພໍ່ແມ່ປະຊາຊົນຜູ້ມີຄວາມສົນໃຈດ້ານສິລະປະກຳໄດ້ຮຽນຮູ້ ແລະ ປູກຈິດສຳນຶກໃຫ້ຮູ້ຈັກວິຈິດສິນ, ສິລະປະລວດລາຍ, ສີໄມ້ລາຍມືຂອງຄົນລາວ ເພື່ອອະນຸຮັກ ແລະ ສົ່ງເສີມໃຫ້ກ້າວໜ້າຕໍ່ໄປ, ທັງຍັງເປັນການໂຄສະນາເຜີຍແຜ່ສິລະປະວັດທະນະທຳອັນດີງາມທີ່ເປັນມໍລະດົກທີ່ລໍ້າຄ່າຂອງຊາດລາວ, ເພື່ອດຶງດູດນັກທ່ອງທ່ຽວຈາກຕ່າງປະເທດເຂົ້າມາທ່ຽວ ສປປ ລາວ ຕື່ມອີກ ທັງເປັນການປະກອບສ່ວນສ້າງສີສັນ ສ້າງມູນຄ່າເພີ່ມ ເນື່ອງໃນໂອກາດເປີດປີທ່ອງທ່ຽວລາວ-ຈີນ ໃນປີ 2019 ນີ້ ອີກດ້ວຍ, ພິເສດແມ່ນເພື່ອເປັນການສ້າງຂະບວນການຂໍ່ານັບຮັບຕ້ອນ ຊົມເຊີຍວັນສ້າງຕັ້ງພັກປະຊາຊົນປະຕິວັດລາວຄົບຮອບ 64 ປີ ( 22 ມີນາ 1955-22 ມີນາ 2019). ຜົນງານສິລະປະຮ່ວມສະໄໝ ທີ່ນຳມາວາງສະແດງໃນຄັ້ງນີ້ ລວມມີຜົນງານຈິດຕະກຳ ແຕ້ມດ້ວຍສີນ້ຳ, ສີອັກຄີລິກ, ເຊິ່ງນຳໃຊ້ Cansep ແລະ ແນວຄິດເນື້ອຫາຕ່າງໆຂອງຮູບແຕ້ມ ແລະ ນຳໃຊ້ເຕັກນິກການແຕ້ມແບບໃໝ່ໃນການປະດິດແຕ່ງແຕ້ມທີ່ບໍ່ເໝືອນໃຜ. ເຊິ່ງໃນນັ້ນໄດ້ຈັດໃນປະເພດຮູບແຕ້ມແບບຮູບປະທຳ ເຊິ່ງເອີ້ນວ່າ (ແຕ້ມແບບຕາເຫັນ) ນອກນັ້ນຍັງມີຮູບແຕ້ມແບບນາມມະທຳ ແລະ ເຄິ່ງນາມມະທຳ ເຊິ່ງເອີ້ນວ່າ (ແຕ້ມແບບໃຈເຫັນ). ທັງສອງສິລະປິນໄດ້ມີຄວາມພະຍາຍາມຄົ້ນຄ້ວາຊອກຫາຄວາມຮັກຂອງຕົນເອງ, ຄວາມເຊື່ອ ແລະ ອຸດົມການ ຈິນຕະນາການທາງດ້ານເຕັກນິກ ທີ່ເປັນເອກະລັກສະເພາະຕົນເອງ, ໂດຍພວກເພິ່ນແມ່ນນຳໃຊ້ເວລາວ່າງທີ່ມີໃຫ້ເປັນປະໂຫຍດສູງທີ່ສຸຸດ ຄືພາຍຫຼັງທີ່ໄດ້ປະກອບສ່ວນວຽກງານທີ່ພັກ-ລັດມອບໝາຍໃຫ້ ໂດຍອາໃຊ້ນອກໂມງລັດທະການການ, ວັນເສົາ-ອາທິດ ຫຼື ວັນພັກໃນວັນທີ່ສຳຄັ້ນຕ່າງໆ ເປັນມື້ທີ່ພວກຕົນທຸ້ມເທອອກເຮື່ອເທແຮງ ແລະ ແນວຄວາມຄິດ ບວກກັບຈິດໃຈທີ່ມັກ ຮັກກັບງານສິລະປະຢາງເຕັມປ່ຽມ ຈຶ່ງໄດ້ສ້າງສັນຜົນງານ, ຢູ່ກັບງານສິລະປະກຳຂອງຕົນຢ່າງມີຄວາມສຸກ. ຜົນງານທີ່ນຳອອກມາວ່າງສະແດງຄັ້ງນີ້ ເປັນຜົນງານຂອງນັກສິລະປິນດີເດັ່ນ ທ່ານ ໄມ່ສິງ ຈັນບຸດດີ ມີຜົນງານຈິດຕະກຳ 42 ຜົນງານ ແລະ ສິລະປິນຜູ້ສົ່ງຄຸນວຸດທິ ທ່ານ ກັນຫາ ສີກຸນນະວົງ ມີຜົນງານຈິດຕະກຳ 47 ຜົນງານ, ນອກນີ້ຍັງມີຜົນງານປະຕິມະກຳແກະສະຫຼັກໄມ້ຈຳນວນໜຶ່ງ.
ງານດັງກ່າວໄດ້ຈັດຂຶ້ນໃນວັນທີ 20 ມີນາ 2019 ທີ່ທີ່ສະຖະບັນວິຈິດສິນແຫ່ງຊາດ (ຫຼັງເກົ່າ) ຄຸ້ມເຈົ້າອານຸວົງ, ບ້ານອານຸ, ເມືອງຈັນທະບູລີ, ນະຄອນຫຼວງວຽງຈັນ,  ໃຫ້ກຽດເຂົ້າຮ່ວມ ແລະ ເປີດງານດັງກ່າວມີ ທ່ານ ວັນສີ ກົວມົວ ຫົວໜ້າຫ້ອງການ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍບັນດາມີບັນດາທ່ານ ທູດ, ຕານຸທູດ ແລະ ອົງການຈັດຕັ້ງສາກົນ ຕະຫຼອດຮອດບັນດານັກສິລະປິນແຫ່ງຊາດ, ສິລະປິນດີເດັ່ນ, ສິລະປິນອິດສະຫຼະ, ຄູ-ອາຈານ, ນັກສຶກສາ ແລະ ມວນຊົນເຂົ້າຮ່ວມ.

# ໂດຍ: ສ.ສັນທະນາ

Leave a Reply

Your email address will not be published. Required fields are marked *