ສະຫະພັນແມ່ຍິງ ສວຊ ວາງສະແດງຜົນງານວິຈິດສິນ

ເພື່ອເປັນການຊົມເຊີຍວັນແມ່ຍິງສາກົນ ທີ 8 ມີນາ ທີ່ໝູນວຽນມາບັນຈົບຄົບຮອດ 109 ປີ, ວັນສ້າງຕັ້ງພັກປະຊາຊົນປະຕິວັດລາວ 22 ມີນາ ຄົບຮອບ 64 ປີ ທີ່ຈະມາເຖິງ ສະຫະພັນແມ່ຍິງສະຖາບັນວິຈິດສິນແຫ່ງຊາດ (ສວຊ) ໄດ້ຈັດວາງສະແດງຜົນງານວິຈິດສິນ ເຊິ່ງແມ່ນຜົນງານທີ່ເອື້ອຍ-ນ້ອງ ກໍ່ສະມາຊິກສະຫະພັນແມ່ຍິງໄດ້ປະດິດ ຄິດສ້າງຂຶ້ນ, ພິທີເປີດງານໄດ້ໄຂຂຶ້ນຢ່າງເປັນທາງການໃນຕອນຄໍ່າຂອງວັນທີ 6 ມີນາ 2019 ທີ່ສະຖະບັນວິຈິດສິນແຫ່ງຊາດ (ຫຼັງເກົ່າ) ຄຸ້ມເຈົ້າອານຸວົງ, ບ້ານອານຸ, ເມືອງຈັນທະບູລີ, ນະຄອນຫຼວງວຽງຈັນ,  ໃຫ້ກຽດເຂົ້າຮ່ວມ ແລະ ເປີດງານດັງກ່າວມີ ທ່ານ ນ. ບົວມະນີ ໄຊທິລາດ ຮອງປະທານສະຫະພັນແມ່ຍິງ, ຫົວໜ້າກົມວັດທະນະທຳມະຫາຊົນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ໄມສິງ ຈັນບຸດດີ ຫົວໜ້າສະຖາຊັນວິຈິດສິນແຫ່ງຊາດ, ມີບັນດາທ່ານ ທູດ, ຕານຸທູດ ແລະ ອົງການຈັດຕັ້ງສາກົນ ຕະຫຼອດຮອດບັນດານັກສິລະປິນແຫ່ງຊາດ, ສິລະປິນດີເດັ່ນ, ສິລະປິນອິດສະຫຼະ, ຄູ-ອາຈານ, ນັກສຶກສາ ແລະ ມວນຊົນເຂົ້າຮ່ວມເປັນຈຳນວນຫຼວງຫຼາຍ.

ທ່ານ ນ. ວັນທະວີ ທາວົງໄຊ ປະທານສະຫະພັນແມ່ຍິງ ສະຖາບັນວິຈິດສິນແຫ່ງຊາດ ໄດ້ລາຍງານໃຫ້ຊາບວ່າ: ງານດັ່ງກ່າວແມ່ນໄດ້ຈັດຂຶ້ນເປັນຄັ້ງທີ XIII ແລ້ວ, ເຊິ່ງຄັ້ງນີ້ພາຍໃຕ້ຫົວຂໍ້ “ສິລະປະກຳ” ສັງລວມໄດ້ທັງໝົດ 210 ຜົນງານ, ໃນນັນເປັນຮູບແຕ້ມ 72 ຜົນງານ, ຮູບພາບພິມ 73 ຜົນງານ, ແກະສະຫຼັກໄມ້ 60 ຜົນງານ. ເຊິ່ງມຜົນງານທັງໝົດເຫຼົານີ້ແມ່ນໄດ້ມາຈາກການປະດິດຄິດສ້າງຂຶ້ນຂອງເອື້ອຍນ້ອງ ກໍ່ສະມາຊິກສະຫະພັນແມ່ຍິງພາຍໃນສະຖາບັນວິຈິດສິນແຫ່ງຊາດ, ສິລະປິນອິດສະຫຼະ,ຮ່ວມກັບເອື້ອຍນ້ອງແມ່ຍິງ ຜູ້ມີຄວາມສາມາດ ທາງດ້ານສິລະປະກຳຈາກກົມກອງຕ້າງໆສ້າງຂຶ້ນດ້ວຍຄວາມປານີດ ແລະ ພາກພຽນພະຍາຍາມອົດທົນ. ພິເສດການວາງສະແດງຜົນງານໃນຄັ້ງນີ້ຍັງໄດ້ມີການປະກອບສ່ວນຜົນງານສິລະປະຂອງໜ່ວຍຊາວໜຸ່ມ ແລະ ສະຫະພັນກຳມະບານ ສະຖາບັນວິຈິດສິນແຫ່ງຊາດ ເຂົ້າຮ່ວມວາງສະແດງນຳອີກ. ທຸກໆສິ້ນຜົນງານທີ່ນຳມາສະແດງລ້ວນແຕ່ໄດ້ສະທ້ອນໃຫ້ເຫັນເຖິງເອກະລັກຂອງສິລະປະວັດທະນະທຳອັ່ນລໍ້າຄ່າຂອງຊາດລາວ, ວິຖີການດຳລົງຊີວິດແບບລຽບງ່າຍ, ຮີດຄອງປະເພນີອັ່ນດີງາມ ທີ່ພໍ່ແມ່ປະຊາຊົນຄົນລາວເຮົາເຄີຍປະຕິບັດກັນມາແຕ່ບູຮານນະການ. ພ້ອມນັ້ນ ສິລະປິນຍັງໄດ້ຖ່າຍທອດຜົນງານອອກມາທີ່ສະແດງໃຫ້ເຫັນການນຳເອົາຄວາມອຸດົມຮັ່ງມີ, ຄວາມຫຼາກຫຼາຍສີສັນຂອງມໍລະດົກທາງສິລະປະວັດທະນະທຳຂອງລາວເຮົາ ປະກອບເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນໄລຍະໃໝ່ພາຍໃຕ້ການນຳພາຂອງພັກປະຊາຊົນປະຕິວັດລາວ.

ງານດັງກ່າວຈະວາງສະແດງໄປຈົ່ນເຖິງວັນທີ 16 ມີນາ 2019 ຈຶ່ງປິດລົງ, ຂໍຮຽນເຊີນມາຍັງບັນດາທ່ານ ຜູ້ທີ່ມີຄວາມສົນໃຈໃນງານສິລະປະທັງຫຼາຍທັງພາຍໃນ ກໍ່ຄືຕ່າງປະເທດ ເຂົ້າຮ່ວມທ່ຽວຊົມ, ໃຫ້ກຳລັງໃຈ, ຊ່ວຍກັນອະນຸລັກຮັກສາ, ສະໜັບສະໜູນ ວົງການສິລະປະດ້ານວິຈິດສິນຂອງປະເທດລາວເຮົາໃຫ້ຍືນຍົງຢູ່ຄູ່ກັບຄົນລາວເຮົາຕະຫຼອດໄປ ແລະ ມີຄວາມເຕີມໃຫ່ຍຂະຫຍາຍຕົວ ທຽບເທົາກັບປັນດາປະເທດຕ່າງໆໃນພາກພື້ນ ກໍ່ຄືສາກົນ.

ໂດຍ: ສ. ສັນທະນາ

 

Leave a Reply

Your email address will not be published. Required fields are marked *