ເປີດຊຸດຝຶກອົບຮົມທິດສະດີການເມືອງ-ການປົກຄອງ ລະບົບ 45 ວັນ ແລະ ວຽກງານຊາວໜຸ່ມໄລຍະສັ້ນ 5 ວັນ

ສູນກາງ ຊປປລ ໄດ້ຈັດຝຶກອົບຮົມທິດສະດີການເມືອງ-ການປົກຄອງ ລະບົບ 45 ວັນຊຸດທີ III ແລະ ວຽກງານຊາວໜຸ່ມໄລຍະສັ້ນ 5 ວັນ ຊຸດທີ XIII  ໃຫ້ແກ່ພະນັກງານສູນກາງ ຊປປລ ແລະ ບັນດາກະຊວງ-ອົງການ ຂຶ້ນໃນວັນທີ 10 ກັນຍາ 2018 ທີ່ ສູນກາງ ຊປປລ, ໃຫ້ກຽດເຂົ້າຮ່ວມໃນພິທີມີ ທ່ານ ອາລຸນໄຊ ສູນນະລາດ ກຳມະການສຳຮອງສູນກາງພັກ, ເລຂາຄະນະພັກ, ເລຂາຄະນະບໍລິຫານງານ ສູນກາງ ຊປປລ, ສະມາຊິກສະພາແຫ່ງຊາດເຂດທີ 8, ທ່ານ ຮຈ.ສະໝຸດທອງ ສົມພານິດ ຄະນະພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີບັນດາຄະນະພັກ, ຫົວໜ້າຫ້ອງການ, ກົມ, ລັດວິສາຫະກິດໂຮງພິມໜຸ່ມລາວ ຕະຫຼອດຮອດຄູ-ອາຈານ ຈາກສະຖາບັນການເມືອງ ແລະ ການປົກຄອງແຫ່ງຊາດ, ນັກຝຶກອົບຮົມຈຳນວນ ແລະຄະນະຮັບຜິດຊອບ ເຂົ້າຮ່ວມພ້ອມພຽງ.

ການເປີດຝຶກອົບຮົມທິດສະດີການເມືອງ-ການປົກຄອງ ລະບົບ 45 ວັນຊຸດທີ III ແລະ ວຽກງານຊາວໜຸ່ມໄລຍະສັ້ນ 5 ວັນ ຂອງສູນກາງ ຊປປລ ໃນຄັ້ງນີ້ ໂດຍມີຈຸດປະສົງເພື່ອຍົກລະດັບຄວາມຮູ້ທາງດ້ານທິດສະດີໃຫ້ພະນັກງານຫຼັກແຫຼ່ງ ຜູ້ທີ່ນອນໃນເປົ້າໝາຍສ້າງເປັນພະນັກງານສືບທອດ ໄດ້ຮຽນຮູ້, ກຳແໜ້ນແນວທາງ, ແບບແຜນວິທີນຳພາ, ວິທີການບໍລິຫານ ແລະ ການປົກຄອງ ເພື່ອກຽມພ້ອມຮັບໃຊ້ໜ້າທີ່ການເມືອງທີ່ພັກ-ລັດ ກໍ່ຄືການຈັດຕັ້ງມອບໝາຍໃຫ້, ໃຫ້ມີປະສິດທິພາບ ແລະ ຜົນສຳເລັດ. ເຊິ່ງມີນັກຝຶກອົບຮົບຮົມເຂົ້າຝຶກຈຳນວນ 52 ສະຫາຍ, ໃນນັ້ນຈາກສູນການ ຊປປລ ຈຳນວນ 32 ສະຫາຍ ແລະ ມາຈາກກະຊວງ-ອົງການ ອ້ອມຂ້າງຈຳນວນ 20 ສະຫາຍ, ບົດຮຽນທີ່ນຳມາຝຶກປະກອບມີ ວິຊາປັດຊະຍາ ມາກ-ເລນິນ ມີ 8 ບົດ, ວິຊາກໍ່ສ້າງພັກ ມີ 5 ບົດ, ວິຊາການປົກຄອງມີ 8 ບົດ, ວິຊາລັດທິສັງຄົມນິຍົມ ວິທະຍາສາດ ມີ 6 ບົດ, ວິຊາເສດຖະສາດການເມືອງ ແລະ ຄຸ້ມຄອງເສດຖະກິດ  ມີ 10 ບົດ ແລະ ຍັງໄດ້ຝຶກອົບຮົມທິດສະດີວຽກງານຊາວໜຸ່ມໄລຍະສັ້ນ 5 ວັນອີກ. ໄລຍະເວລາການຝຶກແມ່ນເລີ່ມຕັ້ງແຕ່ວັນທີ 10 ກັນຍາ ຫາ ວັນທີ 16 ພະຈິກ 2018 ຈຶ່ງຈະສຳເລັດ.

Leave a Reply

Your email address will not be published. Required fields are marked *