ປ່ອຍປາເນື່ອງໃນໂອກາດວັນປ່ອຍປາ ແລະ ວັນອະນຸລັກສັດນໍ້າ-ສັດປ່າແຫ່ງຊາດ

​ເພື່ອ​​ເປັນ​ການສະ​ເຫຼີມສະຫຼອງວັນ​ຄ້າຍ​ວັນ​ເກີດ​ທ່ານ ປະທານ​ ສຸ​ພານຸວົງ ຄົບຮອບ 109 ປີ ​ແລະ ວັນ​ອະນຸລັກ​ສັດ​ນໍ້າ-​ສັດປ່າ ພ້ອມ​ທັງ​ເປັນ​ການ​ຫວນ​ຄືນ​ມູນ​ເຊື້ອ​ຂອງ​ຊາວໜຸ່ມ-​ເຍົາວະ​ຊົນ ​ຕະລຸມບອນຂຸດ​ຄອງ​ເໝືອງຝາຍ​ຊົນລະປະທານ​ອ່າງ​ນໍ້າ​ຫຸມ​ຄົບຮອບ 40 ປີ ພ້ອມ​ດຽວກັນ​ນີ້​ກໍ່​ເພື່ອ​ເປັນ​ການ​ຈົດ​ຈໍາ​ລໍ້າ​ລຶກ​ເຖິງ​ຄຸນງາມຄວາມດີ ​ແລະ ຜົນງານ​ອັນ​ໃຫຍ່ຫຼວງຂອງ​ປະທານ ສຸພາ​ນຸວົງ ທີ່​ໄດ້​ອຸທິດ​ໃຫ້​ແກ່​ພາລະກິດ​ແຫ່ງ​ການ​ຕໍ່ສູ້​ກູ້​ຊາດ​ກໍ່ຄື​ການ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດ. ນອກ​ນັ້ນ, ຍັງ​ເປັນ​ການ​ປູກ​ຈິດ​ສຳນຶກ​ໃຫ້​ແກ່​ອະນຸຊົນ, ​ເຍົາວະ​ຊົນ​ ກໍ່ຄື​ລູກຫຼານທີ່​ເກີດ​ໃໝ່​ໃຫຍ່​ລຸນ​ໃຫ້​ມີ​ສະຕິ​ຮັກ ຫວງ​ແຫນ​ສັດ​ນໍ້າ ສັດປ່າ ​ແລະ ທັງ​ເປັນ​ການ​ປຸກລະດົມ​ທົ່ວປວງ​ຊົນ​ໃຫ້​ເຂົ້າ​ຮ່ວມ​ໃນ​ການ​ຄຸ້ມ​ຄອງ ປັກ​ປັກ​ຮັກສາ ພັດທະນາ  ​ແລະ ການ​ນໍາ​ໃຊ້​ສັດ​ນໍ້າ-​ສັດປ່າ​ໃຫ້​ມີ​ຄວາມ​ຍືນ​ຍົງ ​ເພື່ອ​ເປັນ​ການ​ເຮັດ​ໃຫ້​ຊັບພະຍາກອນສັດ​ໃຫ້​ນັບ​ມື້ມີ​ຄວາມ​ອຸດົມສົມບູນ ​ແລະ ກາຍ​ເປັນ​ທ່າ​ແຮງ​ໃນ​ການ​ຄໍ້າປະກັນ​ດ້ານ​ສະບຽງອາຫານ, ​ໂພ​ສະນາ​ການກໍ່ຄື​ຊີວິດ​ການເປັນຢູ່ຂອງປະຊາຊົນນັບມື້ດີຂຶ້ນ ເຊິ່ງການປ່ອຍປາໃນຄັ້ງນີ້ຈະມີລູກປາປະມານ 350.000 ໂຕ ແລະ ສັດປ່າຈໍານວນໜຶ່ງ ພ້ອມນີ້ຍັງເປັນການສືບສານຮີດຄອງປະເພນີໃນຊ່ວງໄລຍະເຂົ້າພັນສາອີກດ້ວຍ . ດັ່ງ​ນັ້ນ; ໃນ​ວັນ​ທີ 13 ກໍລະກົດ 2018 ນີ້​ຢູ່​ທີ່​ອ່າງ​ນໍ້າ​ຫຸມ ​ເມືອງ​ນາ​ຊາຍ​ທອງ ນະຄອນຫຼວງວຽງຈັນກະຊວງ​ກະສິກຳ-ປ່າ​ໄມ້ຮ່ວມ​ກັບນະຄອນຫຼວງວຽງຈັນ ​ແລະ ສູນ​ກາງ ຊປລ ​​ໂດຍ​ການ​ປະສານ​ສົມທົບ​ກັບ​ຄະນະ​ຊາວໜຸ່ມອ້ອມ​ຂ້າງ ໄດ້​ພ້ອມ​ກັນ​ຈັດ​ພິທີ​ປ່ອຍ​ປາ​ຂຶ້ນ​ໂດຍ​ການ​ເປັນ​ປະທານ​ຂອງ ທ່ານ ປອ ລຽນ ທິ​ແກ້ວ ກຳມະ ການ​ສູນ​ກາງ​ພັກ, ລັດຖະມົນຕີ​ກະຊວງ​ກະ​ສິ​ກຳ ​ແລະ ປ່າ​ໄມ້, ທ່ານ ອາ​ລຸນ​ໄຊ ສູນ​ນະລາດ ​ເລຂາ​ຄະນະ​ບໍລິຫານ​ງານ​ສູນ​ກາງ ຊປລ, ​ໃຫ້ກຽດ​ເຂົ້າ​ຮ່ວມ​ພິທີ​ມີພະນະ ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ​ແຫ່ງ ສປປລາວ, ທ່ານ ສິນ​ລະ​ວົງ ຄຸດ​ໄພ​ທູດ ​ເຈົ້າ​ຄອງ​ນະຄອນຫຼວງວຽງຈັນ, ບັນດາ​ລັດຖະມົນຕີ, ຮອງ​ລັດຖະມົນ​ຈາກ​ກະຊວງ ອົງການ​ອ້ອມ​ຂ້າງ, ບັນດາ​ທູດທຸ​ຕາ​ນຸທູດ, ບັນດາ​ຜູ້ຕາງໜ້າຈາກ​ອົງການ​ສາກົນ​ປະ​ຈໍາ ສປປ ລາວ, ບັນດາ​ພະ​ແນ​ກການ, ກົມ​ກອງອ​ອ້ມຂ້າງ ຕະຫຼອດຮອດ​ອຳນາດ​ການ​ປົກຄອງ​ບ້ານ ພໍ່​ແມ່​ປະຊາຊົນ ​ແລະ ສະມາຊິກ​ຊາວໜຸ່ມ​ເຂົ້າ​ຮ່ວມ 400 ກ່ວາ​ຄົນ.

Leave a Reply

Your email address will not be published. Required fields are marked *