ທ່ານຮອງເລຂາຄະນະບໍລິຫານງານສູນກາງ ຊປປລ ເຄື່ອນໄຫວຢ້ຽມຢາມ ສປ ຈີນ

ເມື່ອບໍ່ດົນມານີ້ຜູ້ແທນຂັ້ນສູງຂອງ ສູນກາງ ຊປປລ ນໍາໂດຍ ທ່ານ ນາງ ວິລະວອນ ພັນທະວົງ ຮອງເລຂາຄະນະບໍລິຫານງານສູນກາງ ຊປປລ ພອມດ້ວຍຄະນະ ໄດ້ເດີນທາງເຄື່ອນໄຫວຢ້ຽມຢາມ ສປ ຈີນ ຢ່າງເປັນທາງການນັບຕັ້ງແຕ່ວັນທີ 19-25 ມັງກອນ 2018 ທີ່ຜ່ານມາ.

 ຈຸດປະສົງຂອງການເຄື່ອນໄຫວຢ້ຽມຢາມ ສປ ຈີນ ໃນຄັ້ງນີ້ເພື່ອຕອບສະໜອງຕາມການເຊີນຈາກສູນກາງຊາວໜຸ່ມກອມມູນິດຈີນ ທັງນີ້ກໍເພື່ອສືບຕໍ່ເສີມຂະຫຍາຍທິດຄູ່ຮ່ວມມືຍຸດທະສາດຮອບດ້ານຍາວນານຂອງສອງພັກ, ສອງລັດ ແລະ  ສອງອົງການຈັດຕັ້ງຊາວໜຸ່ມສອງປະເທດໃຫ້ກ້ວາງຂວາງ ແລະ ແໜ້ນແຟ້ນຍິ່ງຂຶ້ນ, ຕີລາຄາການຈັດຕັ້ງປະຕິບັດກິດຈະກໍາການຮ່ວມມືຂອງຄະນະຊາວໜຸ່ມລາວ-ຈີນ ໃນຊຸມປີຜ່ານມາ ແລະ ວາງແຜນການຈັດຕັ້ງປະຕິບັດການຮ່ວມມືໃນຕໍ່ໜ້າ, ແລກປ່ຽນບົດຮຽນໃນຂະແໜງການທ່າແຮງຂອງລາວ ແລະ ຊຸກຍູ້ການຮ່ວມມືໃນບັນດາຂະ  ແໜງການທີ່ມີທ່າແຮງ, ສ້າງຜົນປະໂຫຍດ ແລະ ສາມາດນໍາໃຊ້ໃຫ້ຍືນຍົງໂດຍໃຫ້ການສະໜັບສະໜູນຈາກຝ່າຍຈີນໃຫ້ແກ່ຝ່າຍ ສປປ ລາວ. ນອກຈາກນີ້, ບັນດາຄະນະຜູ້ແທນຍັງໄດ້ເຄື່ອນໄຫວຢ້ຽມຢາມນະຄອນຫຼວງປັກກິ່ງ, ແຂວງກວາງຊີ, ແຂວງກວາງຊູ ແລະ ສືບຕໍ່ຢ້ຽມຢາມແຂວງຍູນໜານ ເຊິ່ງໄດ້ຮັບການຕ້ອນຮັບຈາກຄະນະພັກແຂວງ ຍູນໜານ ທ່ານ ຫຼີ ຊຸນລິນ, ທ່ານ ຖາງຍວນ ເລຂາຊາວໜຸ່ມແຂວງຍູນໜານ ພົບປະແລກປ່ຽນບົດຮຽນນໍາຄະນະນໍາສູນກາງຊາວໜຸ່ມກອມມູນິດຈີນ, ຢ້ຽມກຸ່ມບໍລິສັດພັດທະນາກະສິກໍາເຂດພູພຽງ ແລະ ກຸ່ມບໍລິສັດພັດທະນາຄົບວົງຈອນ, ຢ້ຽມຢາມກຸ່ມບໍລິສັດຢ່າງພາລາ ແຂວງ ຍູນໜານ, ລົງທັດສະນະສຶກສາຢູ່ເຂດອຸດສະຫະກໍາສິ່ງປະດິດ 1865ຂອງເມືອງໜານຈິງ, ຢ້ຽມຢາມບັນດາວິສາຫະກິດຂະໜາດກາງ ແລະ ນ້ອຍ. ນອກຈາກນັ້ນ, ທັງສອງຝ່າຍຍັງເຫັນດີໃຫ້ຄະນະວິຊາການພົວພັນຕ່າງປະເທດໃນການປັບປຸງເນື້ອໃນບົດບັນທຶກການຮ່ວມມືສະບັບໃໝ່ໃນປີ 2018 ພາຍຫຼັງກອງປະຊຸມໃຫຍ່ຜູ້ແທນທົ່ວປະເທດຈີນຄັ້ງທີ່ 18 ສໍາເລັດ ແລະ ຜູ້ແທນຊາວໜຸ່ມຂັ້ງສູງ ສປ ຈີນ ຈະເດີນທາງມາຢ້ຽມຢາມ ສປປ ລາວ, ເຫັນດີສອງຝ່າຍໄດ້ປະສານສົມທົບກັນຢ່າງໃກ້ສິດໃນການສະໜັບສະໜູນໂຄງການກໍ່ສ້າງສູນກິດຈະກໍາຄົບວົງຈອນຊາວໜຸ່ມລາວ-ຈີນທີ່ນະຄອນຫຼວງວຽງຈັນໃຫ້ສໍາເລັດໂດຍໄວ, ເສີມຂະຫຍາຍການຮ່ວມມື ແລະ ແລກປ່ຽນບົດຮຽນດ້ານວິຊາການຂອງຄະນະຊາວໜຸ່ມ-ເຍົາວະຊົນສອງປະເທດໃຫ້   ໜັກແໜ້ນ, ຝ່າຍຈີນສະໜັບສະໜູນລາວໃນການສ້າງຕັ້ງສະຫະພັນຊາວໜຸ່ມລາວ ໂດຍຈະຊ່ວຍເຫຼືອທາງດ້ານຂໍ້ມູນສານ ແລະ ວິຊາການຕາມການສະເໜີຄວາມຕ້ອງການຂອງຝ່າຍລາວ, ສືບຕໍ່ການຈັດຊຸດຝຶກອົບຮົມໃຫ້ຊາວໜຸ່ມລາວ ແລະ ການຈັດສົ່ງອາສາສະໝັກຈີນມາປະຈໍາການຢູ່ລາວ ແລະ ຊຸກຍູ້ເພີ່ມທະວີການຮ່ວມມື ແລະ ຊ່ວຍເຫຼືອດ້ານວິຊາການຂອງຄະນະຊາວໜຸ່ມຕາມຊາຍແດນເຫຼົ່ານີ້ເປັນຕົ້ນ…//

 

 

[ໂດຍ: ຄໍາສິງ ວິໄລຄໍາ]

 

Leave a Reply

Your email address will not be published. Required fields are marked *