ພິທີພົບປະຊາວໜຸ່ມລະຫວ່າງສູນກາງ ຊປປລ ແລະ ວິທະຍາຄານປ້ອງກັນຄວາມສະຫງົບແຫ່ງຊາດ

ໃນວັນທີ 7 ກຸມພາ 2018 ນີ້ ທີ່ສະໂມສອນຂອງວິທະຍາຄານປ້ອງກັນຄວາມສະຫງົບແຫ່ງຊາດ (ເວີນຄຳ) ໄດ້ມີພິທີພົບປະແລກປ່ຽນວຽກງານຊາວໜຸ່ມແລະ ເຮັດກິດຈະກຳຮ່ວມກັນ ລະຫວ່າງຄະນະບໍລິຫານງານສູນກາງ ຊປປລ ກັບຄະນະບໍລິຫານງານຊາວໜຸ່ມວິທະຍາຄານປ້ອງກັນຄວາມສະຫງົບແຫ່ງຊາດ ເພື່ອເປັນການສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມສະຫງົບຄົບຄອບ 57 ປີ ແລະ ວັນສ້າງຕັ້ງວິທະຍາຄານປ້ອງກັນຄວາມສະຫງົບແຫ່ງຊາດ ຄົບຮອບ 22 ປີ

ໃຫ້ກຽດເຂົ້າຮ່ວມໃນພິທີມີ ສະຫາຍ ອາລຸນໄຊ ສູນນະລາດ ກໍາມະການສຳຮອງສູນກາງພັກ, ສະມາຊິກສະພາແຫ່ງຊາດ, ເລຂາຄະນະບໍລິຫານງານສູນກາງ ຊປປລ, ສະຫາຍ ພັອ ປອ ບຸນລ້ຳ ພະໄຊສົມບັດ, ຮອງຜູ້ອຳນວຍການວິທະຍາຄານປ້ອງກັນຄວາມສະຫງົບແຫ່ງຊາດ, ມີບັນດາສະຫາຍ ຄະນະກົມ, ອົງການຈັດຕັ້ງມະຫາຊົນ ແລະ ສະມາຊິກຊາວໜຸ່ມອ້ອມຂ້າງສູນກາງ ຊປປລ ແລະ ຄູ-ອາຈານ ຕະຫຼອດຮອດນັກສຶກສາທີ່ເປັນສະມາຊິກຊາວໜຸ່ມອ້ອມຂ້າງວິທະຍາຄານປ້ອງກັນຄວາມສະຫງົບແຫ່ງຊາດ ເຂົ້າຮ່ວມຈຳນວນ 300 ກວ່າສະຫາຍ. ໃນພິທີສະຫາຍ ເລຂາຄະນະບໍລິຫານງານສູນກາງ ຊປປລ ກໍ່ໄດ້ໄດ້ຂຶ້ນໂອ້ລົມ ຊີ້ທິດເຍືອງທາງຕໍ່ກັບການຈັດຕັ້ງປະຕິບັດວຽກງານຊາວໜຸ່ມໃນຂົເຂດກຳລັງປ້ອງກັນຄວາມສະຫງົບເວົ້າລວມ, ເວົ້າສະເພາະສະມາຊິກຊາວໜຸ່ມວິທະຍາຄານປ້ອງກັນຄວາມສະຫງົບແຫ່ງຊາດ ໃຫ້ມີຄວາມໜັກແໜ້ນເຂັ້ມແຂງ, ຮັບປະກັນໃນການເປັນເສນາທິການທີ່ດີໃຫ້ກັບຄະນະພັກ, ເປັນກຳລັງສືບທອດ, ເປັນທີ່ໄວ້ເນື້ອເຊື່ອໃຈຂອງພັກ ແລະ ສະຫາຍ ຍັງໄດ້ເນັ້ນບາງບັນຫາເຊັ່ນ ຕ້ອງຍົກສູງພາລະບົດບາດຂອງຊາວໜຸ່ມໃນນາມທີ່ເປັນແຂນຂວາຂອງພັກ, ຄະນະບໍລິຫານງານຊາວໜຸ່ມ ຕ້ອງໄດ້ເອົາໃຈໃສ່ວຽກງານສຶກສາອົບຮົມແນວຄິດ, ບຸກລະດົມແນວຄິດຂອງມະຫາຊົນເຂົ້າຮ່ວມຂະບວນການ, ຮຽກຮ້ອງ ອອກແຮງໃນການສ້າງຂະບວນການ ໃຫ້ມີຄວາມຟົດຟື້ນ ເພື່ອຊອກໃຫ້ເຫັນໄດ້ວຽກດີຄົນເດັ່ນ ວຽກຈິງຄົນແທ້ ເພື່ອມາເປັນຜູ້ສືບທອດທີ່ດີຂອງພັກ.

ໃນການມາພົບປະຄັ້ງນີ້ສູນກາງ ຊປປລ ຍັງໄດ້ນໍາເອົາເຄື່ອງຄອມພິວເຕີ້ ຈຳນວນ 1 ຊຸດ ແລະ ເຄື່ອງກິລາຈຳນວນໜຶ່ງລວມມູນຄ່າເປັນເງິນຈຳນວນ 8,000,000 ກີບ ມອບໃຫ້ວິທະຍາຄານປ້ອງກັນຄວາມສະຫງົບແຫ່ງຊາດ, ຈາກນັ້ນຄະນະນຳຈາກສູນກາງ ຊປປລ ຍັງໄດ້ຝຶກຊ້ອມໃນການຍິງປືນ ແລະ ຮ່ວມກັນຫຼີ້ນກິລາບານເຕາະ ສາມັກຄີ ມິດຕະພາບຮ່ວມກັນນຳອີກ.

ໂດຍ: ສ.ສັນທະນາ

 

Leave a Reply

Your email address will not be published. Required fields are marked *