ງານພົບປະມິດຕະພາບຊາວໝຸ່ມລາວ-ຫວຽດນາມ ປີ 2017

ງານພົບປະມິດຕະພາບຊາວໝຸ່ມລາວ-ຫວຽດນາມ ປີ 2017 ຕິດພັນກັບການສະເຫຼີມສະຫຼອງວັນເຊັນສົນທິສັນຍາມິດຕະພາບ ແລະ ການຮ່ວມມືຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 55 ປີ ເຊິ່ງໄດ້ມີພິທີ່ເປີດຢ່າງເປັນທາງການໃນວັນທີ 6 ກັນຍາ 2017 ທີ່ ນະຄອນຫຼວງຮ່າໂນ້ຍ, ສສ ຫວຽດນາມ ໂດຍການເຂົ້າຮ່ວມຂອງສະຫາຍ ນາງ ຕົ້ງ ທີ້ ຟອງ, ກຳມະການກົມການເມືອງສູນກາງພັກ ຮອງປະທານ, ຜູ້ປະຈຳການສະພາແຫ່ງຊາດ ສສ ຫວຽດນາມ, ສະຫາຍ ປອ ສອນທະນູ ທຳມະວົງ ກຳມະການສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ, ສະຫາຍ ເລ ກວັກ ຟອງ ກຳມະການສຳຮອງສູນກາງພັກ, ເລຂາທີ 1 ຄະນະບໍລິຫານງານຊາວໜຸ່ມກອມມູນິດໂຮ່ຈິມິນ, ທ່ານ ເອກອັກຄະລັດຖະທູດ ສປປ ລາວ ປະຈໍາ ສສ ຫວຽດນາມ, ຄະນະນຳຊາວໜຸມປະຊາຊົນປະຕິວັດລາວທີ່ມາຈາກ ສູນກາງ ຊປປລ, ນະຄອນຫຼວງ, ແຂວງ, ກະຊວງ-ອົງການ ໃນຂອບເຂດທົ່ວປະເທດ ຈຳນວນ 190 ສະຫາຍ ແລະ ເພື່ອນສະຫາຍຊາວໝຸ່ມກອມມູນິດ ສສ ຫວຽດນາມ, ແຂກທີ່ຖືກເຊີນເຂົ້າຮ່ວມຈຳນວນຫຼວງຫຼາຍ.

ສະຫາຍ ປອ ສອນທະນູ ທໍາມະວົງ ໄດ້ໃຫ້ກຽດມີຄໍາເຫັນໃນພິທີເປີດງານພົບປະຊາວໝຸ່ມສອງຊາດໃນຄັ້ງນີ້ວ່າ: ຄະນະບໍລິຫານງານສູນກາງຊາວໝຸ່ມ ປະຊາຊົນ ປະຕິວັດລາວ ກໍຄືຊາວໝຸ່ມ-ເຍົາວະຊົນລາວບັນດາເຜົ່າ ຮູ້ສຶກພາກພູມໃຈເປັນຢ່າງຍິ່ງທີ່ໄດ້ເຂົ້າຮ່ວມ ແລະ ກ່າວເປີດງານພົບປະມິດຕະພາບຊາວໝຸ່ມລາວ-ຫວຽດນາມ ປີ 2017 ເຊິ່ງຖືວ່າເປັນກິດຈະກຳໜຶ່ງທີ່ມີຄວາມໝາຍ, ຄວາມສຳຄັນ ຕິດພັນກັບຂະບວນການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ແລະ ການຮວ່ມມື ຄົບຮອບ 40 ປີ (18 ກໍລະກົດ 1977 – 18 ກໍລະກົດ 2012) ແລະ ວັນສ້າງຕັ້ງສາຍພົວພັນການທູດ ຄົບຮອບ 55 ປີ (5 ກັນຍາ 1962 – 5 ກັນຍາ 2017) ຂອງລາວ-ຫວຽດນາມ, ຫວຽດນາມ-ລາວ. ພ້ອມດຽວກັນ ກໍຂໍນຳເອົາຄວາມສາມັກຄີ ຮັກແພງອັນສະໜິດສະໜົມຖານເພື່ອນມິດຍຸດທະສາດ ທີ່ເຕັມໄປດ້ວຍນ້ຳໃຈມິດຕະພາບດູດດື່ມ, ຄວາມສາມັກຄີແບບພິເສດ ແລະ ການຮ່ວມມື ແບບຮອບດ້ານ ລາວ-ຫວຽດນາມ, ແມ່ນກິດຈະກຳໜຶ່ງທີ່ສຳຄັນໃນຈຳນວນກິດຈະກຳຂອງຊາວໝຸ່ມຂອງສອງຊາດ ທີ່ໄດ້ມີການແລກປ່ຽນເຊິ່ງກັນ ແລະ ກັນ ໂດຍໄດ້ເລີ່ມຈັດຕັ້ງປະຕິບັດມາແຕ່ປີ 2000 ແລະ ປີນີ້ພໍດີຄົບຮອບ 17 ປີ. ເຊິ່ງກິດຈະກຳດັ່ງກ່າວໄດ້ສ່ອງແສງເຖິງມູນເຊື້ອຮ່ວມສຳພັນສູ້ຮົບ ກໍຄືມູນເຊື້ອມິດຕະພາບ, ຄວາມສາມັກຄີແບບພິເສດ, ການຮ່ວມມືແບບຮອບດ້ານ ແລະ ຍັງຊີ້ໃຫ້ເຫັນລັກສະນະຍຸດທະສາດອັນພິເສດແບບຍາວນານ ຂອງສອງພັກ-ສອງລັດ, ປະຊາຊົນສອງຊາດ ກໍຄືຂອງສອງຊາວໝຸ່ມ ຢ່າງມີຊີວິດຊີວາ. ພິເສດງານພົບປະຄັ້ງນີ້ ໄດ້ໄຂຂຶ້ນໃນບັນຍາກາດທີ່ ສອງພັກ-ສອງລັດ, ປະຊາຊົນ 2 ຊາດລາວ-ຫວຽດນາມ ອ້າຍນ້ອງ ພວມຈັດຕັ້ງການສະເຫລີມສອງວັນປະຫວັດສາດຢ່າງຍິ່ງໃຫຍ່, ໃນລະດັບສູນກາງຈົນຮອດຮາກຖານ. ສະເພາະສອງອົງການຈັດຕັ້ງຊາວໝຸ່ມລາວ-ຫວຽດນາມ ພວກເຮົາແລ້ວແມ່ນພວມຈັດຕັ້ງກິດຈະກຳໃນຫຼາຍຮູບຫຼາຍສີທັງທາງກວ້າງ ແລະ ທາງເລິກ ເພື່ອສະເຫຼີມສະຫຼອງ ປີສາມັກຄີມິດຕະພາບລາວ-ຫວຽດນາມ.

ລາວ-ຫວຽດນາມ ແມ່ນສອງປະເທດທີ່ມີຊາຍແດນຕິດຈອດກັນ ດ້ວຍສາຍພູ ແລະ ແມ່ນ້ຳລຳເຊ, ປະຊາຊົນສອງປະເທດໄປມາຫາສູ່,  ແລກປ່ຽນຊື້-ຂາຍ ເຊິ່ງກັນ ແລະ ກັນ, ມີສາຍພົວພັນແບບພິເສດອັນເປັນມູນເຊື້ອມາແຕ່ດົນນານແລ້ວ. ເມື່ອຫວນຄືນເຖິງປະຫວັດສາດທີ່ຜ່ານມາເຫັນວ່າ ປະຊາຊົນສອງຊາດລາວ-ຫວຽດນາມ ໂດຍສະເພາະສອງຊາວໝຸ່ມລາວ-ຫວຽດນາມ ເຄີຍໄດ້ຮ່ວມຂຸມຄອງດຽວກັນ, ຄຽງບ່າ, ຄຽງໄລ່ ໃນພາລະກິດຕໍ່ສູ້ປົດປ່ອຍຊາດ ຕ້ານກັບ ສັດຕູໂຕດຽວກັນ ກໍ່ຄືໃນພາລະກິດປົກປັກຮັກສາ ແລະ ສ້າງສາພັດທະນາ ປະເທດຊາດໃນໄລຍະໃໝ່ ຕາມທິດສັງຄົມນິຍົມ ເຊິ່ງໄດ້ກາຍເປັນຂີດໝາຍປະຫວັດສາດ ແຫ່ງສາຍພົວພັນສາກົນທີ່ຫາໄດ້ຍາກທີ່ສຸດໃນໂລກ, ເປັນມໍລະດົກອັນລ້ຳຄ່າ, ເປັນກົດເກນການຄົງຕົວ ແລະ  ຂະຫຍາຍຕົວຂອງ 2 ຊາດ ລາວ- ຫວຽດນາມ  ແລະ ໄດ້ຮັບການຖະນຸຖະໜອມຈາການນຳລຸ້ນກ່ອນໆກໍຄືປະຊາຊົນ 2 ຊາດ ມາຮອດປະຈຸບັນ ຊາວໝຸ່ມສອງຊາດ ລາວ-ຫວຽດນາມພວມຖະນຸຖະໜອມ, ປົກປັກຮັກສາ ແລະ ເສີມຂະຫຍາຍໝາກຜົນດັ່ງກ່າວຢ່າງຕັ້ງໜ້າ ແລະ ນັບມື້ນັບເກີດດອກອອກຜົນ ເພື່ອໃຫ້ສົມກັບຄວາມມຸ້ງຫວັງອັນແຮງກ້າ ຂອງປະທານ ໂຮ່ຈິມິນ ຜູ້ນຳທີ່ຍິ່ງໃຫ່ຍຂອງປະຊາຊົນຫວຽດນາມ ແລະ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກ ກໍຄືບັນດາຜູ້ນຳຮຸ້ນທຳອິດຂອງ 2 ຊາດລາວ-ຫວຽດນາມ ອ້າຍນ້ອງ ເຊິ່ງພວກເຮົາກໍຮັບຮູ້ນຳກັນແລ້ວວ່າ: ມິດຕະພາບອັນຍິ່ງໃຫ່ຍ ແລະ ຄວາມສາມັກຄີພິເສດ ລະຫວ່າງ ລາວ-ຫວຽດນາມນັ້ນ ແມ່ນໄດ້ມາຈາກການທຸ້ມເຫື່ອເທແຮງ, ເລືອດເນື້ອ ແລະ ຢາດນ້ຳຕາບໍ່ຈັກເທົ່າໃດຈົນໄດ້ມີຄຳເວົ້າຂອງ ປະທານ ໄກສອນ ພົມວິຫານ ທີ່ກ່າວວ່າ: “ຕາບໃດສາຍນ້ຳຂອງບໍ່ເຫືອດແຫ້ງ ເຂີນຂາດເປັນຊາຍ, ສາຍພູຫຼວງແສນສູງ ບໍ່ຕ່ຳເປັນຄັງຫຍ້າຮົ່ງຮ່າວັງເວີນກວ້າງ ບໍ່ແປນດິນກະທ້າງໄຂ່ ສອງຫົວໃຈລາວ-ຫວຽດນາມ ພີ່ນ້ອງ ບໍ່ໄກຂ້າງຫ່າງກັນ”

ໃນໂອການທີ່ຄະນະນໍາສູນກາງ ຊປປລ ມາເຄື່ອນໄຫວເຮັດວຽກທີ່ນະຄອນຫຼວງຮ່າໂນ້ຍ ສສ ຫວຽດນາມຄັ້ງນີ້, ຄະນະຜູ້ແທນຍັງໄດ້ມີພິທີ່ພົບປະປຶກສາຫາລືສອງຝ່າຍ ລະຫວາງ ຄະນະນຳຂັ້ນສູງຂອງ ສູນກາງ ຊປປລ ແລະ ຄະນະນຳຂັ້ນສູງຂອງ ສູນກາງຊາວໜຸ່ມກອມມູນິດໂຮ່ຈີມິນ, ຈາກນັ້ນກໍ່ໄດ້ມີພິທີເຊັນບົດບັນທຶກການພົວພັນຮ່ວມມືກັນໃນຕໍ່ໜ້າ ໄລຍະປີ 2017-2022, ໄດ້ເຂົ້າຢ້ຽມເຂົ້າຢ້ຽມການນຳຂັ້ນສູງຂອງ ສສ ຫວຽດນາມ ໂດຍການຕ້ອນຮັບຂອງ ສະຫາຍ ຝາມບິ່ງມິ່ງ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ເພື່ອລາຍງານສະພາບການ ແລະ ຈຸດປະສົງຂອງການມາເຄື່ອນໄຫວຄັ້ງນີ້ ຈາກນັ້ນກໍ່ສືບຕໍ່ຢ້ຽມຢາມ ແລະ ເຮັດວຽກກັບກຸ່ມບໍລິສັດວຽດເທວເຊິ່ງເປັນບໍລິສັດສື່ສານໂທລະຄົມທີ່ໃຫຍ່ຂອງຫວຽດນາມ, ຢ້ຽມຢາມຫໍພິທິຕະພັນ ແລະ ອາຄານສະພາແຫ່ງຊາດ ສສ ຫວຽດນາມ ນຳອີກດ້ວຍ.

#ໂດຍ: ສ.ສັນທະນາ

Leave a Reply

Your email address will not be published. Required fields are marked *