ກອງປະຊຸມການຮ່ວມມືການນຳຊາວໜຸ່ມ ກຳປູເຈຍ-ລາວ-ຫວຽດນາມ (CLV)

ກອງປະຊຸມການຮ່ວມມືການນຳຊາວໜຸ່ມ ກຳປູເຈຍ-ລາວ-ຫວຽດນາມ (CLV) ໄດ້ໄຂຂື້ນໃນວັນທີ 8 ກັນຍາ 2017 ທີ່ນະຄອນໂຮ່ຈິມິນ ສ.ສ ຫວຽດນາມ ໂດຍການເປັນປະທານຮ່ວມຂອງຄະນະນຳຊາວໜຸ່ມທັງ 3 ປະເທດ (ສສຫວຽດ-ລາດຊະອານາຈັກກຳປູເຈຍ-ສປປ ລາວ), ເຊິ່ງຄະນະຜູ້ແທນຊາວໜຸ່ມລາວ ນຳໂດຍສະຫາຍ ປອ ສອນທະນູ ທຳມະວົງ ກຳມະການສູນກາງພັກ, ເລຂາຄະນະບໍລິຫານງານສູນກາງ ຊປປລ, ຄະນະຜູ້ແທນຫວຽດນາມ ນຳໂດຍສະຫາຍ ເລ ກອ່ກ ຝອງ ກຳມະການສຳຮອງສູນກາງພັກ, ເລຂາທີ 1 ຄະນະບໍລິຫານງານຊາວໜຸ່ມກອມມູນິດໂຮ່ຈິມິນ ແລະ ຄະນະກຳປູເຈຍນຳໂດຍສະຫາຍ ຮຸ່ນມະນີ ສະມາຊິກສະພາແຫ່ງຊາດ, ປະທານສະຫະພັນຊາວໜຸ່ມແຫ່ງຊາດ, ປະທານສະຫະພັນຊາວໜຸ່ມແຫ່ງຊາດກຳປູເຈຍ, ມີບັນດາສະຫາຍການນຳ ແລະ ຜູ້ທີ່ກ່ຽວຂ້ອງທັງ 3 ປະເທດ ຫວຽດນາມ-ລາວ-ກຳປູເຈຍ ເຂົ້າຮ່ວມ.

ເພື່ອເສີມຂະຫຍາຍນ້ຳໃຈຮັກຊາດອັນດູດື່ມ ເພື່ອສືບທອດມູນເຊື້ອຕໍ່ສູ້ບໍ່ຍອມຈຳນົນຂອງບັນທະບູລຸດ ແລະ ປະຊາຊົນສາມຊາດອ້າຍນ້ອງ ຜ່ານການຕໍ່ສູ້ໃນແປວໄຟ ແຫ່ງການຕໍ່ສູ້ກູ້ຊາດອັ່ນທຸກຍາກລຳບາກໃນເມື່ອກ່ອນ, ເຊິ່ງກຳລັງແຮງຕົ້ນຕໍ່ກໍ່ແມ່ນຊາວໜຸ່ມພວກເຮົາ ເປັນກຳລັງປະຈັນບານເຂັ້ມແຂ່ງ ໄດ້ສ້າງວິລະກຳອັນລ້ຳເລີດ ຈາລຶກໄວ້ໃນໜ້າປະຫວັດສາດຂອງ 3 ປະເທດ ດັງແນວຄິດຂອງປະທານໂຮ່ຈິມິນທີ່ວ່າ ບໍ່ມີສິ່ງໃດທີ່ດີກວ່າເອກະລາດແຫ່ງຊາດ, ແຕ່ເອກະລາດແຫ່ງຊາດຕ້ອງຮັບປະກັນໃຫ້ປະຊາຊົນມີສິດເສລີພາບ ມີຄວາມອີ່ມໜຳສຳລານ ແລະ ມີຄວາມສຸກທີ່ແທ້ຈິງ. ໃນຍຸກໂລກາວິວັດ ແລະ ເຊື່ອມໂຍມ ຍິ່ງຕ້ອງເພີ່ມທະວີຄວາມສາມັກຄີ ແລະ ການຮ່ວມມືກັນລະຫວ່າງ 3 ປະເທດອ້າຍນ້ອງ ຫວຽດນາມ-ລາວ-ກຳປູເຈຍ ຢ່າງກ້ວາງຂວາງ ແລະ ຍືນຍົງຮອບດ້ານ, ເຊິ່ງໃນຊຸມປີທີ່ຜ່ານມາ ກໍ່ໄດ້ມີບົດບັນທຶກຮ່ວມມືກັນເປັນແຕ່ລະໄລຍະ ເຊິ່ງໃນນັ້ນໄດ້ລະບຸໄວ້ວ່າ ຊາວໜຸ່ມ 3 ປະເທດພວກເຮົາ ຈະໄດ້ເພີ່ມທະວີການຮ່ວມມືກັນແຕ່ຂັ້ນສູງກາງຈົ່ນຮອດທ້ອງຖິ່ນຮາກຖານ ໄດ້ມີການພົບປະຢ້ຽມຢາມ ແລະ ແລກປ່ຽນບົດຮຽນ ຊ່ວຍເຫຼືອເຊິ່ງກັນ ແລະ ກັນໃນດ້ານຕ່າງໆ ບໍ່ວ່າຈະດ້ານການເມືອງ, ເສດຖະກິດ ແລະ ວັດທະນະທຳ-ສັງຄົມ, ເປັນຕົ້ນແມ່ນການປົກປັກຮັກສາຄວາມສະຫງົບຕາມຊາຍເດນ, ຮັກສາສະພາບແວດລ້ອມ, ສົ່ງເສີມການຄ້າ-ການລົງທຶນ ແລະ ທ້ອງທ່ຽວ ເພື່ອໃຫ້ປະຊາຊົນ 3 ຊາດພວກເຮົາມີຄວາມຜາສຸກ ແລະ ໃຫ້ການຊ່ວຍເຫຼືອເຊິ່ງກັນ ແລະ ກັນ ຢ່າງໜັກແໜ້ນເລິກເຊິ່ງ. ກອງປະຊຸມການຮ່ວມມືການນຳຊາວໜຸ່ມ ກຳປູເຈຍ-ລາວ-ຫວຽດນາມ ທີ່ນະຄອນໂຮ່ຈິມິນຄັ້ງນີ້ ໄດ້ມີການພົບປະແລກປ່ຽນ, ຄົ້ນຄວ້າປຶກສາຫາລືກັນໃນ 3 ຫົວຂໍ້ໃຫ່ຍຄື: 1) ການສຶກສາອົບຮົມຊາວໜຸ່ມ 3 ປະເທດຮັບຮູ້ໄດ້ມິດຕະພາບ ແລະ ມູນເຊື້ອຄວາມສາມັກຄີອັນເປັນມູນເຊື້ອ, ຫົວຂໍ້ທີ 2) ຈຸລິເລີ່ມຂອງແຕ່ລະປະເທດ ແລກປ່ຽນປະສົບການໃນການພັດທະນາວຽກງານທຸລະກິດໜຸ່ມ 3 ປະເທດ ແລະ ຫົວຂໍ້ທີ 3) ເພີ່ມທະວີຊຸກຍູ້ກິດຈະກຳວຽກງານອາສາສະມັກ ເພື່ອພັດທະນາຊຸມຊົນ ແລະ ສັງຄົມ. ໃນແຕ່ລະຫົວຂໍ້ຄະນະຜູ້ແທນທັງ 3 ປະເທດ ກໍ່ໄດ້ມີການປະກອບຄຳເຫັນ ແລກປ່ຽນບົດຮຽນ ເຊິ່ງກັນ ແລະ ກັນຢ່າງພາວະວິໄສ.

ໃນໂອກາດທີ່ທາງຄະນະຜູ້ແທນຊາວໜຸ່ມປະຊາຊົນ ປະຕິວັດລາວ ໄດ້ມາເຄື່ອນໄຫວຢູ່ນະຄອນໂຮ່ຈິມິນໃນຄັ້ງນີ້ ກໍ່ໄດ້ມີການພົບປະສອງຝ່າຍກັບຄະນະຜູ້ແທນສະຫະພັນຊາວໜຸ່ມແຫ່ງຊາດລາດຊະອານາຈັກກຳປູເຈຍ ເພື່ອປຶກສາຫາລືຄວາມພ້ອມໃນການກ້າວໄປເຖິງການມີບົດບັນທຶກການຮ່ວມມືຊ່ວຍເຫຼືອ ແລະ ແລກປ່ຽນສງຝ່າຍລະຫວ່າງ ຄະນະຊາວໜຸ່ມປະຊາຊົນ ປະຕິວັດລາວ ແລະ ສະຫະພັນຊາວໜຸ່ມແຫ່ງຊາດລາດສະອານາຈັກກຳປູເຈຍ ເຊິ່ງຈະມີຂື້ນໃນບໍ່ດົນຂ້າງໜ້າ. ຈາກນັ້ນຄະນະຜູ້ແທນຈາກ ສປປ ລາວ  ກໍໄດ້ເຂົ້າຢ້ຽມຂຳນັບການນຳຄະນະພັກນະຄອນໂຮ່ຈິມິນ ໂດຍການຕ້ອນຮັບຂອງສະຫາຍ ເຕິດ ແທັງ ກາງ ກຳມະການສູນກາງພັກ, ຮອງເລຂາຄະນະພັກ ຜູ້ປະຈຳການນະຄອນໂຮ່ຈິມິນ ເພື່ອລາຍງານສະພາບການ ແລະ ຈຸດປະສົງໃນການມາເຄື່ອນໄຫວ ແລະ ເຮັດວຽກໃນຄັ້ງນີ້, ເຊິ່ງທັງສອງຝ່າຍກໍ່ໄດ້ຕີລາຄາສູງຕໍ່ສາຍພົວພັນ ແລະ ກໍ່ຄືໝາກຝົນຂອງ ການຮ່ວມມືແບບພິເສດຂອງສອງພັກ-ສອງລັດ ກໍ່ຄືປະຊາຊົນສອງຊາດ ລາວ-ຫວຽດນາມ, ເວົ້າສະເພາະກໍ່ຄືສອງຄະນະຊາວໜຸ່ມປະຊາຊົນ ປະຕິວັດລາວ ແລະ ຄະນະຊາວໜຸ່ມກອມມູນິດໂຮ່ຈິມິນ, ແລະສືບຕໍ່ຢ້ຽມຢາມ ແລະ ເຮັດວຽກກັບມະຫາວິທະຍາໄລນານາຊາດນະຄອນໂຮ່ຈິມິນ, ເຂດເຕັກໂນໂລຊີສູງນະຄອນໂຮ່ຈິມິນ ແລະ ກຸ່ມບໍລິສັດ ອຸດສາຫະກຳຢາງພາລາຫວຽດນາມ ນຳອີກ.

ຂ່າວແລະພາບ ໂດຍ: ສ.ສັນທະນາ

 

Leave a Reply

Your email address will not be published. Required fields are marked *