ງານພົບປະເຍົາວະຊົນລາວ-ຫວຽດນາມ ຄັ້ງທີ່1

ໃນໂອກາດເປັນປີມິດຕະພາບທີ່ສຳຄັນຂອງ 2 ຊາດ ລາວ-ຫວຽດນາມ ທີ່ກຳລັງສະເຫຼີມສະຫຼອງ 2 ວັນປະຫວັດສາດ ຄື ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດ ຄົບຮອບ 55 ປີ

ເຍົາວະຊົນ 2 ຊາດ ລາວ-ຫວຽດນາມ ໄດ້ຈັດງານພົບປະມິດຕະພາບ ຄັ້ງປະຫວັດສາດຂອງຕົນ ຂື້ນໃນລະຫວ່າງວັນທີ່ 13-17 ສີງຫາ 2017 ຢູ່ທີ່ແຂວງ ກອນຕູມ, ແຂວງ ຢາຫຼ່າຍ, ແຂວງ ດາຫຼັກ ແລະ ແຂວງ ແຄ໋ງຮວ່າ ສສ ຫວຽດນາມ

ຄະນະຜູ້ແທນເຍົາວະຊົນລາວຈໍານວນ 58 ສະຫາຍ ນຳໂດຍ ສະຫາຍ ບໍລິລັກ ດວງສະຫວັນ ຮອງຫົວໜ້າກົມເຍົາວະຊົນ ສູນກາງ ຊປປລ ໄດ້ນຳພາເຍົາວະຊົນລາວເດີນທາງເຂົ້າຮ່ວມເຄື່ອນໄຫວແລກປ່ຽນຢ້ຽມຢາມກັບເຍົາວະຊົນຫວຽດນາມ ຜ່ານທາງດ່ານສາກົນພູເກືອ ແຂວງອັດຕະປື ເຂົ້າສູ່ແຂວງ ກອນຕູມ ສ.ສ ຫວຽດນາມ ໂດຍໄດ້ຮັບການຕ້ອນຮັບຢ່າງອົບອຸ່ນຈາກສະຫາຍ ຫງວຽນຖາຍອານ ຮອງຫົວໜ້າກົມເຍົາວະຊົນ ສູນກາງຊາວໜຸ່ມ ກອມມູນິດໂຮ່ຈິມີ່ນ ພ້ອມດ້ວຍຄະນະເຍົາວະຊົນຫວຽດນາມ ເພື່ອເຄື່ອນໄຫວພົບປະ ແລກປ່ຽນ ບົດຮຽນເຊິ່ງກັນແລະກັນ ທັງເປັນການປູກຈິດສຳນຶກໃຫ້ຄົນຮຸ້ນໃໝ່ ໂດຍສະເພາະແມ່ນນ້ອງນ້ອຍເຍົາວະຊົນທັງສອງປະເທດໄດ້ຮັບຮູ້ ແລະເຂົ້າໃຈ ເຖິງມູນເຊື້ອສາຍພົວພັນອັນພິເສດ ທີ່ເປັນ​ມໍ​ລະ​ດົກ​ອັນ​ລໍ້າຄ່າ ໃນພາລະກິດປົກປັກຮັກສາ ແລະ ສ້າງສາພັດທະນາຂອງແຕ່ລະປະເທດໃນປະຈຸບັນ, ເຊິ່ງໄດ້ເປັນການສະແດງໃຫ້ເຫັນເຖິງ ຄວາມມີຊີວິດຊີວາຂອງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມ ເຊິ່ງຖືວ່າເປັນສາຍພົວພັນທີ່ຫາໄດ້​ຍາກໃນການພົວພັນສາກົນ ແລະ ເປັນສາຍພົວພັນແບບໜຶ່ງດຽວໃນໂລກນີ້

ເຍົາ​ວະ​ຊົນ​ລາວ​ບັນ​ດາ​ເຜົ່າ​ໃນ​ທົ່ວ​ປະ​ເທດ ມີ​ຄວາມ​ພາກ​ພູມ​ໃຈ​ເປັນ​ຢ່າງ​ຍິ່ງທີ່​ເຫັນ​ວ່າ​ ສາ​ຍ​ພົວ​ພັນ​ມິດ​ຕະ​ພາບ​ອັນ​ເປັນ​ມູນ​ເຊື້ອ, ຄວາມ​ສາ​ມັກ​ຄີ​ແບບ​ພິ​ເສດ ແລະ ການ​ຮ່ວມ​ມື​ຮອບ​ດ້ານ​ລະ​ຫວ່າງ​ ສອງ​ພັກ, ສອງ​ລັດ ແລະ ປະ​ຊາ​ຊົນ​ສອງ​ຊາດ​ພວກ​ເຮົາ ເວົ້າ​ລວມ, ເວົ້າ​ສະ​ເພາະ​ ແມ່ນ​ການ​ພົ​ວ​ພັນ​ຮ່ວມ​ມື ລະ​ຫວ່າງ ​ສອງອົງ​ການ​ຈັດ​ຕັ້ງ​ຊາວ​ໜຸ່ມ​ພວກ​ເຮົາ ທີ່ໄດ້ຮັບ​ການ​ເພີ່ມພູນຄູນ​ສ້າງ ແລະ ​ເສີມ​ຂະ​ຫຍາຍ​​ ໂດຍ​ບັນ​ດາ​ການ​ນຳ​ລຸ້ນ​ຕ່າງໆ, ນັກ​ຮົບ​ປະ​ຕິ​ວັດ​ ແລະ ປະ​ຊາ​ຊົນສອງ​ຊາດຕະ​ຫຼອດ​ມາ ​ແລະໄດ້​​ຮັບ​ການເພີ່ມ​ທະ​ວີ​ດ້ວຍ​ຄຸນນະ​ພາບໃໝ່.

ນອກຈາກນີ້ ເຍົາວະຊົນຂອງສອງຊາດ ຍັງໄດ້ມີການແລກປ່ຽນສີລະປະວັດທະນະທຳຮ່ວມກັນ ໂດຍຜ່ານບົດຟ້ອນ ແລະສຽງຂັບລຳຂອງເຍົາວະຊົນ ຢູ່ທີ່ວັງເຍົາວະຊົນນະຄອນຍາຈາງ ແຂວງແຄ໋ງຮົ່ວ ໂດຍການໃຫ້ກຽດເຂົ້າຮ່ວມຮັບຊົມຂອງ ສະຫາຍ ຫງຽນເຕີນຕວນ ຮອງເລຂາປະຈຳພັກແຂວງ ປະທານສະພາປະຊາຊົນແຂວງແຄ໋ງຮົ່ວ, ສະຫາຍ ອາລຸນໄຊ ສູູນນະລາດ ກຳມະການສຳຮອງສູນກາງພັກ ຮອງເລຂາຄະນະບໍລິຫານງານ ສູນກາງ ຊປປລ ພ້ອມດ້ວຍການນຳເຍົາວະຊົນຂອງລາວ ແລະຫວຽດນາມເຂົ້າຮ່ວມ ໃນໂອກາດດຽວກັນນີ້ ທາງການນຳສອງຝ່າຍ ຂອງລາວ ແລະ ຫວຽດນາມ ຍັງໄດ້ມອບທືນການສຶກສາໃຫ້ແກ່ເຍົາວະຊົນນັກຮຽນຜູ້ທີ່ດີເດັ່ນ, ຮຽນດີຮຽນເກັ່ງ ຂອງແຕ່ລະຝ່າຍ, ຝ່າຍລະ 5 ນ້ອງ ລວມມູນຄ່າຫຼາຍກວ່າ 10 ລ້ານກີບ ໃຫ້ແກ່ນ້ອງນ້ອຍເຍົາວະຊົນ ທີ່ເປັນຕົວແທນໃຫ້ແກ່ເຍົາວະຊົນຂອງສອງປະທດ ທີ່ໄດ້ເຂົ້າຮ່ວມເຄື່ອນໄຫວໃນງານຕັ້ງຄ້າຍພົບປະເຍົາວະຊົນໃນຄັ້ງນີ້.

ຈາກນັ້ນກໍ່ເລີ່ມເຂົ້າສູ່ພິທີແຄ້ມໄຟ ອັນເປັນສັນຍາລັກຂອງງານຕັ້ງຄ້າຍທີ່ໝາຍເຖີງການຮັດແໜ້ນຄວາມສາມັກຄີມິດຕະພາບ ລະຫວ່າງເຍົາວະຊົນ 2 ຊາດ ລາວ-ຫວຽດນາມ ແປວໄຟທີ່ລຸກໄໝ້ຂື້ນ ໝາຍເຖີງກຳລັງແຮງຂອງເຍົາວະຊົນ 2 ຊາດ ທີ່ກຳລັງເປັ່ງແສງຢ່າງເຈີດຈ້າ ພ້ອມທີ່ຈະລຸກຂື້ນມາແທນທີ່ຂອງຊາວໜຸ່ມ  ໃນການເປັນກຳລັງແຮງຂອງຊາດ ເພື່ອກາຍເປັນຜູ້ສືບທອດທີ່ດີຂອງພັກ. ເຍົາວະຊົນໃນວັນນີ້ ຄືໜໍ່ແໜງທີ່ດີຂອງຊາດໃນວັນຫນ້າ ຖ້າພວກເຮົາໃຫ້ຄວາມເອົາໃຈໃສ່, ໃຫ້ຄວາມໃກ້ສິດ, ຖະນຸຖະໜອມເມັດພັນອັນສຳຄັນນີ້ໄວ້ ແລະໃຫ້ຄວາມຮູ້ທີ່ຖືກຕ້ອງແກ່ ເຂົາເຈົ້າ ເຊື່ອແນ່ວ່າຄວາມມັ່ງຄັ່ງເຂັ້ມແຂງ, ຄວາມຈະເລີນສີວິໄລ ແລະຄວາມສົມບູນພູນສຸກຂອງຊາດ ແມ່ນຢູ່ບໍ່ໄກເກີນຝັນທີ່ຕ້ອງການ.

ຊົມເຊີຍງານພົບປະມິດຕະພາບເຍົາວະຊົນລາວຫວຽດນາມ ຄັ້ງປະຫວັດສາດ ແລ້ວພົບກັນໄດ້ໃໝ່ໃນຄັ້ງໜ້າ ທີ່ ສປປ ລາວຂອງພວກເຮົາຈະເປັນເຈົ້າພາບໃນຄັ້ງຕໍ່ໄປ.

Leave a Reply

Your email address will not be published. Required fields are marked *