ຊາວໜຸ່ມຫຼາຍກວ່າ 1000 ຄົນ ສະມັກໃຈເຂົ້າຮ່ວມບໍລິຈາກເລືອດຊ່ວຍເຫຼືອສັງຄົມ

ສູນກາງແນວລາວສ້າງຊາດ ຮ່ວມກັບກະຊວງຖະແຫຼງຂ່າວ ວັດທະນະທຳ ແລະ ທ້ອງທ່ຽວ, ສູນກາງຊາວໜຸ່ມປະຊາຊົນ ປະຕິວັດລາວ, ອົງການກາແດງລາວ ແລະ ແນວລາວສ້າງຊາດນະຄອນຫຼວງວຽງຈັນ ໄດ້ຈັດຂະບວນການບໍລິຈາກເລືອດຊ່ວຍເຫຼືອສັງຄົມ ໃນວັນສາມັກຄີປອງດອງທົ່ວປວງຊົນ ພາຍໃຕ້ຄຳຂວັນ: ບໍລິຈາກເລືອດແມ່ນຮັກຊາດ ແລະ ພັດທະນາ, ເພື່ອສະເຫຼີມສະຫຼອງວັນສ້າງຕັ້ງແນວລາວສ້າງຊາດ ແລະ ວັນສື່ມວນຊົນແຫ່ງຊາດ ຄົບຮອບ 67 ປີ (13 ສິງຫາ 1950 ຫາ 13 ສິງຫາ 2017), ພິທີດັ່ງກ່າວໄດ້ຈັດຂຶ້ນໃນວັນທີ 15 ສິງຫາ 2017 ທີ່ສູນຝຶກອົບຮົມວຽກງານແນວສ້າງຊາດ, ນະຄອນຫຼວງວຽງຈັນ, ໃຫກຽດເຂົ້າຮ່ວມມີ ທ່ານ ປອ ໄຊສົມພອນ ພົມວິຫານ  ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ທ່ານ ຄຳໃບ ດຳລັດ ກຳມະການສູນກາງພັກ, ຮອງປະທານສູນກາງແນວລາວສ້າງຊາດ, ຫົວໜ້າຄະນະຮັບຜິດຊອບການສະເຫຼີມສະຫຼອງວັນສ້າງຕັ້ງແນວລາວສ້າງຊາດຄົບຮອບ 67 ປີ, ທ່ານ ປອ ສອນທະນູ ທຳມະວົງ ກຳມະວົງ ກຳມະການສູນກາງພັກ, ກຳມະການສູນກາງແນວລາວສ້າງຊາດ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ, ມີບັນດາທ່ານກຳມະການສູນກາງແນວລາວສ້າງຊາດ, ຕາງໜ້າຈາກກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ, ອົງການກາແດງລາວ, ແນວລາວສ້າງຊາດນະຄອນຫຼວງວຽງຈັນ, ຄະນະຮັບຜິດຊອບຂະບວນການບໍລິຈາກເລືອດ, ຄະນະບໍລິຫານງານຊາວໜຸ່ມ, ກະຊວງ-ອົງການຂັ້ນສູນກາງ ແລະ ນະຄອນຫຼວງ, ຕະຫຼອດຮອດພະນັກງານ-ລັດຖະກອນ, ທະຫານ-ຕຳຫຼວດ ທີ່ເປັນກຳລັງແຮງຊາວໜຸ່ມຈຳນວນ 1000 ກວ່າຄົນ ເຂົ້າຮ່ວມເຂົ້າຮ່ວມບໍລິຈາກເລືອດໃນຄັ້ງນີ້.

ທ່ານ ປອ ສອນທະນູ ທຳມະວົງ ກ່າວວ່າ: ສູນກາງຊາວໝຸ່ມ ປະຊາຊົນ ປະຕິວັດລາວ ໄດ້ປຸກລະດົມຂົນຂວາຍ ແລະ ຮ້ອງຮຽກໃຫ້ບັນດາຊາວໜຸ່ມລາວບັນດາເຜົ່າ ແຕ່ລະພາກສ່ວນ ຜູ້ທີ່ມີເງື່ອນໄຂ ໃນຂອບເຂດທົ່ວປະເທດ ເຂົ້າຮ່ວມບໍລິຈາກເລືອດແບບສະມັກໃຈ ໂດຍບໍ່ຮຽກຮ້ອງສິ່ງຕອບແທນ ປະກອບສ່ວນຊ່ວຍເຫລືອສັງຄົມ ກໍຄື່ເພື່ອນມະນຸດດ້ວຍກັນ ເພື່ອສະແດງເຖິງຄວາມສາມັກຄີປອງດອງທົ່ວປວງຊົນທັງຊາດ, ເຖິ່ງແມ່ນວ່າການບໍລິຈາກເລືອດແບບສະໝັກໃຈ ໂດຍບໍ່ຮຽກຮ້ອງສິ່ງຕອບແທນໄດ້ຖືກຍອມຮັບຈາກສັງຄົມລາວ ແລະ ຈຳນວນຜູ້ເຂົ້າຮ່ວມບໍລິຈາກເລືອດໃນແຕ່ລະປີແມ່ນມີຈຳນວນເພີ່ມຂິຶ້ນ, ແຕ່ເຖິງຢ່າງໃດກໍຕາມ ໃນເງື່ອນໄຂສັງຄົມປັດຈຸບັນ ຍັງມີຄວາມຕ້ອງການເລືອດ ນັບມື້ນັບຫລາຍຂຶ້ນ ເຊິ່ງມີບາງໄລຍະຢູ່ສູນບໍລິຈາກເລືອດ ກໍຍັງມີເລືອດຈຳກັດ ບໍ່ສາມາດຕອບສະໜອງເລືອດເຂົ້າປິ່ນປົວຄົນເຈັບທີ່ຕ້ອງການເລືອດຢູ່ຕາມໂຮງໝໍແຫ່ງຕ່າງໆໄດ້ພຽງພໍ. ຄວາມສາມັກປອງດອງທົ່ວປວງຊົນ ແມ່ນປັດໃຈຕັດສິນການຄົງຕົວ ແລະ ຂະຫຍາຍຕົວຂອງຊາດຊາດໜຶ່ງ; ແນວລາວສ້າງຊາດຮູ້ເຖິງບົດບາດຂອງມະຫາຊົນ ແມ່ນຜູ້ຕັດສິນປະຫວັດສາດ ດັງນັ້ນ ໜຶ່ງຍົດເລືອດ ແມ່ນໜຶ່ງນ້ຳໃຈຂອງທ່ານ ເພື່ອຊ່ວຍກັນພັດທະນາຊາດ ກ້າວຂຶ້ນສູ່ຄວາມຮຸ່ງເຮືອງສີວິໄລ./

ໂດຍ: ສ.ສັນທະນາ

Leave a Reply

Your email address will not be published. Required fields are marked *