ງານແຂ່ງຂັນຮ້ອງເພງ ເຍົາວະຊົນສຽງດີ ປີ 2017

   ກົມເຍົາວະຊົນ ສູນກາງ ຊປປລ ຮ່ວມກັບພາກສ່ວນຕ່າງໆ ທີ່ກ່ຽວຂ້ອງໄດ້ຈັດການແຂ່ງຂັນຮ້ອງເພງ ເຍົາວະຊົນສຽງດີ ປະຈຳປີ 2017, ເຊິ່ງຮອບຊີງຊະນະເລີດ ໄດ້ຈັດຂື້ນ ໃນຄ່ຳຄືນຂອງວັນທີ 4 ທັນວາ 2017 ນີ້, ທີ່ສູນການຄ້າລາວໄອເຕັກ ນະຄອນຫຼວງວຽງຈັນ, ໂດຍການໃຫ້ກຽດເຂົ້າຮ່ວມຂອງ ທ່ານ ນາງ ວິລະວອນ ພັນທະວົງ, ຮອງເລຂາ ຄະນະບໍລິຫານງານສູນກາງ ຊປປລ, ທ່ານ ນາງ ແກ້ວອຸດອນ ແສງມະນີວົງ, ຫົວຫ້າກົມເຍົາວະຊົນ ສູນກາງ ຊປປລ, ມີບັນດາທ່ານຕາງໜ້າຈາກຄະນະບໍລິຫານງານຊາວໜຸ່ມນະຄອນຫຼວງ, ບັນດາກົມອ້ອມຂ້າງ ຈາກສູນກາງ ຊປປລ ຕະຫຼອດຮອດພໍ່-ແມ່ຜູ້ປົກຄອງ, ຄູ-ອາຈານ, ນ້ອງນ້ອຍເຍົາວະຊົນ ທີ່ເປັນກອງຊົມ-ກອງເຊຍ   ແລະ ມວນຊົນ ເຂົ້າຮ່ວມໃນງານຢ່າງມີບັນຍາກາດຟົດຟື້ນ.

 ການແຂ່ງຂັນຮ້ອງເພງເຍົາວະຊົນສຽງດີ ປີ 2017 ຄັ້ງນີ້ຂື້ນ ເນື່ອງໃນໂອກາດສະເຫຼີມສະຫຼອງວັນຊາດ ທີ 2 ທັນວາ ຄົບຮອບ 42 ປີ, ວັນສ້າງຕັ້ງກອງເຍົາວະຊົນທັນວາ ທີ 2 ທັນວາ ຄົບຮອບ 62 ປີ ແລະ ວັນຄ້າຍວັນເກີດ ປະທານໄກສອນ ພົມວິຫານ ທີ 13 ທັນວາ ຄົບຮອບ 97 ປີ………….

ລາຍລະອຽດອ່ານຢູ່ໜັງສືພິມ ຊາວໜຸ່ມລາວ

ໂດຍ: ສ.ສັນທະນາ

ກອງປະຊຸມແລກປ່ຽນບົດຮຽນວຽກງານຫ້ອງການ ຄຊປປລ ທົ່ວປະເທດຄັ້ງທີ III

ໃນວັນທີ 28 ພະຈິກ 2017 ນີ້, ທີ່ສູນກາງ ຊປປລ ໄດ້ຈັດກອງປະຊຸມແລກປ່ຽນບົດຮຽນວຽກງານຫ້ອງການ ຄະນະຊາວໜຸ່ມ ປະຊາຊົນ ປະຕິວັດລາວ ທົ່ວປະເທດຄັ້ງທີ III ຂຶ້ນ ໃຫ້ກຽດເຂົ້າຮ່ວມເປັນປະທານໂດຍ ທ່ານ ສົມກ້ຽວ ກິ່ງສະດາ, ຮອງຫົວໜ້າຫ້ອງການສູນກາງ ຊາວໜຸ່ມ ປະຊາຊົນ ປະຕິວັດລາວ, ເຂົ້າຮ່ວມມີຕາງໜ້າກົມອ້ອມຂ້າງສູນກາງ ຊປປລ, ຫ້ອງການຊາວໜຸ່ມທີ່ມາຈາກບັນດາກະຊວງ, ອົງການທຽບເທົາ, ຂັ້ນສູນກາງ, ຂັ້ນພະແນກ-ຮອງພະແນກ ຕະຫຼດຮອດພະນັກງານວິຊາການທີ່ເຮັດວຽກງານ ຫ້ອງການເຂົ້າຮ່ວມພ້ອມພຽງ.

ຈຸດປະສົງກໍ່ເພື່ອເປັນການແລກປ່ຽນບົດຮຽນວຽກງານຫ້ອງການຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວບັນສູນກາງກັບຂັ້ນກະຊວງ, ອົງການທຽບເທົ່າ ອ້ອມຂ້າງສູນກາງ, ໃນກອງປະຊຸມໄດ້ຜ່ານ ບົດສະເໜີວຽກງານຄົ້ນຄ້ວາ-ສັງລວມ ແລະ ເລຂານຸການ, ຮ່າງບົດສະຫຼຸບວຽກງານຫ້ອງການ/ກອງເລຂາ, ຮ່າງບົດສະຫຼຸບການຈັດຕັ້ງປະຕິບັດວຽກງານ ຄຊປປລ, ຮ່າງບົດລາຍງານການເມືອງກອງປະຊຸມໃຫ່ຍຜູ້ແທນ ຊາວໜຸ່ມ, ຮ່າງບົດສະຫຼຸບການຈັດຕັ້ງປະຕິບັດແຜນງານພັດທະນາຊາວໜຸ່ມ-ເຍົາວະຊົນລາວຄັ້ງທີ 1, ມະຕິຄະນະ ບໍລິຫານງານສູນກາງ ຊປປລ ສະໄໝທີ VI ວ່າດ້ວຍການເພີ່ມທະວີການປັບປຸງກົນໄກການປະສານງານ ຄຊປປລ ແຕ່ລະຂັ້ນ ສະບັບເລກທີ 197/ລຂ, ລົງວັນທີ 5 ເມສາ 2013, ບົດສະເໜີໂຄງການສູນໄອທີ ແລະ ຄວາມຄືບໜ້າຂອງເວບໄຊ໌ ແລະ ບົດສະເໜີວຽກງານພົວພັນ ແລະ ຮ່ວມມືກັບຕ່າງປະເທດ.

ກອງປະຊຸມແລກປ່ຽນບົດຮຽນວຽກງານຫ້ອງການໃນຄັ້ງນີ້ເປັນການສ້າງຄວາມເຂັ້ມແຂງໃຫ້ແກ່ ກົງຈັກການຈັດຕັ້ງ ທີ່ມີພາລະບົດບາດ, ວຽກງານຫ້ອງການເປັນໜຶ່ງໃນບັນດາກົງຈັກເສນາທິການຂອງຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວ, ມີບົດບາດຕັດສິນໃນລະດັບໃດໜຶ່ງທີ່ແນ່ນອນ, ເພາະຫ້ອງການເປັນ ຜູ້ເຮັດວຽກເສນາທິການຄົ້ນຄົ້ວ, ວາງແຜນວຽກງານຕ່າງໆໃຫ້ຄະນະນຳ, ເປັນຜູ້ບໍລິຫານ ວຽກງານຕົວຈິງ ທັງຮັບໃຊ້ຄະນະນຳ, ທັງກະຈາຍວຽກງານໄປຫາບັນດາກົມວິຊາການ ແລະ ທ້ອງຖິ່ນ, ຮັບເປັນຜູ້ປະ ສານງານຕິດຕໍ່ພົວພັນ, ອຳນວຍຄວາມສະດວກໃຫ້ທົ່ວລະບົບການຈັດຕັ້ງຊີ້ນຳ-ນຳພາ ແລະ ກົງຈັກການຈັດຕັ້ງວິຊາ ການຊ່ວຍວຽກ. ກອງປະຊຸມໄດ້ດຳເນີໄປເປັນເວລາເຄິ່ງວັນຈຶ່ງອັດລົງດ້ວຍຜົນສຳເລັດທີ່ຈົບງາມ.

ໂດຍ: ສ.ສັນທະນາ

ສະຫຼຸບການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງສູນກາງ ຊປປລ ສົກ ປີ 2017

ກອງປະຊຸມສະຫຼຸບຜົນສຳເລັດການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງສູນກາງ ຊປປລ ສົກ ປີ 2017 ແລະ ເປີດບັ້ນແຂ່ງຂັນຂະບວນການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງສູນກາງ ຊປປລ ປະຈຳ

ປີ 2017, ໄດ້ຈັດຂຶ້ນໃນວັນທີ 20 ພະຈິກ 2017 ທີ່ຫ້ອງປະຊຸມສູນກາງ ຊປປລ ໃຫ້ກຽດເຂົ້າຮ່ວມ ແລະ ເປັນ

ປະທານໂດຍທ່ານ ອາລຸນໄຊ ສູນນະລາດ ກຳມະການສຳຮອງສູນກາງພັກ ຮອງເລຂາຄະນະ ບໍລິຫານງານສູນກາງ ຊປປລ , ເຂົ້າຮ່ວມມີຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ, ພະນັກງານວິຊາການ, ຕະຫຼອດຮອດ ສະມາຊິກແມ່ຍິງພາຍໃນສູນກາງ ຊປປລ ເຂົ້າຮ່ວມຢ່າງພ້ອມພຽງ.

#  ລາຍລະອຽດອ່ານຢູ່ໜັງສືພິມ ຊາວໜຸ່ມລາວ…… 

 

 

ຄະນະຊາວໜຸ່ມເດີນທະເລ ອາຊຽນ-ຍີ່ປຸ່ນ ເຄື່ອນໄຫວທີ່ ສປປ ລາວ

ໃນລະຫວ່າງວັນທີ 17-19 ພະຈິກ 2017 ນີ້ ຄະນະຜູ້ແທນຊາວໜຸ່ມເດີນທະເລ ອາຊຽນ-ຍີ່ປຸ່ນ ຄັ້ງທີ 44 ປະຈຳປີ 2017, ໄດ້ເດີນທາງມາຢ້ຽມຢາມ ເຄື່ອນໄຫວແລກປ່ຽນວັດທະນະທຳຢູ່ ສປປ ລາວ. ນຳພາຄະນະໂດຍ ທ່ານ ໂກມາກາຕະ, ຜູ້ບໍລິຫານໂຄງການຊາວໜຸ່ມເດີນທະເລ ອາຊຽນ-ຍີ່ປຸ່ນ ທີ່ຕາງໜ້າໃຫ້ລັດຖະບານຍີ່ປຸ່ນ ແລະ ທ່ານ ອິດສະຫຼະ ສຸວັນສິງ ຫົວໜ້າຄະນະຊາວໜຸ່ມລາວໂຄງການເດີນທະເລອາຊຽນ-ຍີ່ປຸ່ນ ປີ 2017 ພ້ອມດ້ວຍບັນດາຕາງໜ້າຄະນະຊາວໜຸ່ມໂຄງການເດີນທະເລອາຊຽນ-ຍີ່ປຸ່ນ ຈາກ 10 ປະເທດອາຊຽນ ແລະ ຍີ່ປຸ່ນ ທັງໝົດຈຳນວນ 16 ທ່ານ.

ໃນໂອກາດການມາຢ້ຽມຢາມຢູ່ ສປປ ລາວ ຂອງຄະນະຜູ້ແທນຊາວໜຸ່ມເດີນທະເລ ອາຊຽນ-ຍີ່ປຸ່ນໃນຄັງນີ້ ຍັງໄດ້ເຂົ້າຢ່ຽມຂໍ່ານັບ ການນຳສູນກາງ ຊປປລ ໂດຍການຕ້ອນຮັບ ຂອງທ່ານ ປອ ສອນທະນູ ທຳມະວົງ, ກຳມະການສູນກາງພັກ, ເລຂາຄະນະບໍລິຫານງານສູນກາງ ຊປປລ ແລະ ຈາກນັ້ນກໍ່ໄດ້ເຂົ້າຢ້ຽມຂັບນັບການນຳຂັ້ນສູງຂອງ ສປປ ລາວ ໂດຍການຕ້ອນຮັບຂອງພະນະທ່ານ ທອງລຸນ ສີສຸລິດ, ກຳມະການກົມການເມືອງສູນກາງພັກ  ນາຍົກລັດຖະມົນຕີ ແຫ່ງ ສປປ ລາວ, ເພື່ອລາຍງານສະພາບ ແລະ ຈຸປະສົງຂອງການເຄື່ອນໄຫວໃນຄັ້ງນີ້, ໃນພິທີຍັງໄດ້ມີການມອບຂອງຂວັນທີ່ລະນຶກ ແລະ ຮັບຄຳໂອ້ລົມຈາກການນຳ ຂອງ ສປປ ລາວ ຕໍ່ກັບໂຄງການຊາວໜຸ່ມເດີນທະເລອາຊຽນ-ຍີ່ປຸ່ນ, ເຊິ່ງໄດ້ຮັບການຕີລາຄາສູງຈາກ ລັດຖະບານຂອງ ສປປ ລາວ ກໍ່ຄືຕໍ່ກັບການຈັດຕັ້ງປະຕິບັດໂຄງການຕະຫຼອດໄລຍະ 44 ປີ ທີ່ຜ່ານມາ, ເປັນໂຄງການທີ່ໄດ້ຮັບການປະຕິບັດຮ່ວມກັນຢ່າງຫ້າວຫັນ ແລະ ມີປະສິດທິພາບສູງ ແລະ ໄດ້ຮັບການຮ່ວມມືຢ່າງກ້ວາງຂວາ, ເຊິ່ງໄດ້ມີການປະກອບສ່ວນເຂົ້າໃນຫຼາຍຂະ  ແໜງການໂດຍສະເພາະດ້ານການພົວພັນການຄ້າ-ການລົງທຶນ, ການພັດທະນາຊັບພະຍາກອນມະນຸດ, ການແລກປ່ຽນວັດທະນະທຳ-ສັງຄົມ ແລະ ດ້ານອື່ນໆ, ການແລກປ່ຽນຊາວໜຸ່ມກໍ່ເປັນໜຶ່ງໃນບັນດາໂຄງການທີ່ສຳຄັນ, ເຊິ່ງສາມາດສົ່ງເສີມການພົວພັນລະຫວ່າງປະຊາຊົນ ກັບປະຊາຊົນ ເພື່ອເຮັດໃຫ້ຊາວໜຸ່ມ ພາກພື້ນມີຄວາມເຂົ້າອົກ ເຂົ້າໃຈ ແລະ ຮຽນຮູ້ວັດທະນະທຳ-ສັງຄົມ ຂອງກັນ ແລະ ກັນໄດ້ດີຕະຫຼອດມາ. ພະນະທ່ານນາຍົກລັດຖະມົນຕີ ຍັງໄດ້ເນັ້ນເຖິງຄວາມສຳຄັນຂອງໂຄງການຊາວໜຸ່ມເດີນທະເລ ອາຊຽນ-ຍີ່ປຸ່ນ ແລະ ເຫັນດີໃຫ້ສືບຕໍ່ ແລະ ມອບໃຫ້ສູນກາງ ຊປປລ ເປັນຫຼັກໃນການຄຸ້ມຄອງ ເປັນເຈົ້າການປະຕິບັດ ແລະ ຄັດເລືອກເອົາຊາວໜຸ່ມລາວ ຈຳນວນ 28 ສະຫາຍ ແລະ ຫົວໜ້າອີກ 1 ສະຫາຍ ເພື່ອເຂົ້າຮ່ວມ ໂຄງການຊາວໜຸ່ມເດີນທະເລ ອາຊຽນ-ຍີ່ປຸ່ນ ໃນແຕ່ລະປີ ເພື່ອສົ່ງເສີມສາຍພົວພັນ, ເປັນຂົວຕໍ່ໃນການແລກປ່ຽນວັດທະນະທຳ ແລະ ການຮ່ວມມື ລະຫວ່າງອາຊຽນ-ຍີ່ປຸ່ນ ໃຫ້ມີຄວາມຍືນຍົງ.

ໃນຕອນຄໍ່າຂອງວັນດຽວກັນ ທາງສູນກາງ ຊປປລ ກໍ່ຍັງໄດ້ຈັດພິທີບາສີສູ່ຂວັນຕາມຮີດຄອງປະເພນີຂອງລາວທີ່ເຄີຍປະຕິບັດຕໍ່ແຂກທີ່ມາຢ້ຽມຢາມ ແລະ ເຮັດວຽກຢູ່ ສປປ ລາວ, ໂດຍຈັດຂື້ນທີ່ໂຮງແຮມລາວພຣາຊາ  ແລະ ຈັດງານລ້ຽງຕ້ອນຮັບຢ່າງສົມກຽດ ພ້ອມທັງມີການ ສະແດງສີລະປະແລກປ່ຽນວັດທະນະທຳ ນຳອີກ.

ໂດຍ: ສ.ສັນທະນາ

 

ງານສະແດງສິລະປະວັດທະນາທຳຂອງຄະນະຊາວໜຸ່ມລາວ

ງານສະແດງສິລະປະວັດທະນາທຳຂອງຄະນະຊາວໜຸ່ມລາວຂອງຄະນະຊາວໜຸ່ມລາວໂຄງການຊາວໜຸ່ມ ເດີນ ທະເລອາຊຽນ-ຍີ່ປຸ່ນ ຄັ້ງທີ 44 ປີ 2017 ໄດ້ຈັດຂຶ້ນທີ່ຫໍວັດທະນາທຳແຫ່ງຊາດ ໃນຕອນແລງຂອງວັນທີ 7 ຕຸລາ   2017ນີ້, ໃຫ້ກຽດເຂົ້າຮ່ວມ ແລະ ເປັນປະທານໂດຍທ່ານ ປອ ສອນທະນູ ທຳມະວົງ ກຳມະການສູນ ກາງພັກ ເລຂາຄະນະບໍລິຫານງານສູນກາງ ຊປປລ, ທ່ານ ພັນຕາ ກອງຜາລີ ຮອງກໍາມາ ທິການແຜນການ ການເງິນ ແລະ ການກວດສອບ, ທ່ານ ອຸ່ນທອງ ຂາວພັນ ຮອງລັດຖະມົນຕີກະຊວງຖະແຫຼງຂ່າວ, ວັດທະນາທຳ ແລະ ທ່ອງທ່ຽວ, ທ່ານ ສຸລິອຸດົງ ສູນດາລາ ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ບັນດາເອກອັກຄະ ລັດຖະທູດ, ຜູ້ຕາງໜ້າຈາກສະຖານທູດ, ຫົວໜ້າຫ້ອງການ, ຄະນະກົມຈາກແຕ່ລະກະຊວງ ແລະ ອົງການທຽບເທົົ່າ, ບັນດາເລຂາຄະນະບໍລິຫານງານຊາວໜຸ່ມຈາກທຸກພາກສ່ວນ, ບັນດາຜູ້ປົກຄອງ ແລະ ທ່ານຜູ້ຊົມເຂົ້າຮ່ວມຢ່າງຫລວງຫລາຍ.

ໂຄງການຊາວໜຸ່ມເດີນທະເລອາຊຽນຍີ່ປຸ່ນແມ່ນໂຄງການທີ່ໄດ້ຮັບການສະໜັບສະໜູນ ແລະ ໄດ້ຮັບການ ຊ່ວຍເຫຼືອຈາກລັດຖະບານປະເທດຍີ່ປຸ່ນໂດຍມີຈຸດປະສົງເພື່ອເຮັດໃຫ້ໂຄງການດັ່ງກ່າວເປັນເວທີໃຫ້ຊາວໜຸ່ມຈາກບັນດາປະເທດສະມາຊິກອາຊຽນ ແລະ ປະເທດຍີ່ປຸ່ນໄດ້ມີການເສີມສ້າງມິດຕະພາບ, ສາຍພົວພັນການຮ່ວມມື, ຄວາມເຂົ້າໃຈອັນດີເຊິ່ງກັນແລະກັນໂດຍຜ່ານເຮັດກິດຈະກຳແລກປ່ຽນທາງດ້ານວັດທະນາທຳແລະ ການສົນທະນາ ໃນຫົວ​ຂໍ້​ຕ່າງໆ. ໂຄງການດັ່ງກ່າວແມ່ນໄດ້ຮັບການຈັດຕັ້ງປະຕິບັດໃນປີ 1974, ສຳລັບປີນີ້ຄົົບຮອບ 44 ປີ.

ນອກຈາກນີ້,ຍັງເປັນໂຄງການທີ່ສົ່ງເສີມຄວາມສາມາດແລະບົດບາດຂອງຊາວໜຸ່ມລາວໃນເວທີ ສາກົນເຊິ່ງ ໃນປີ 2017 ນີ້,ເປັນປີແຫ່ງຄວາມພາກພູມໃຈຂອງຊາວໜຸ່ມລາວທຸກທົ່ວໜ້າທີ່ໄດ້ເປັນສ່ວນໜຶ່ງໃນການສະ ເຫຼີມສະ ຫຼອງວາລະອັນສຳຄັນນັ້ນກໍ່ຄື: ວັນສ້າງຕັ້ງອາຊຽນຄົບຮອບ 50 ປີ ແລະ ການເຂົ້າຮ່ວມໂຄງການ ຊາວ ໜຸ່ມເດີນທະເລອາຊຽນຍີ່ປຸ່ນຂອງ ສາທາລະນະລັດ ປະຊາທິປະໄຕ ປະຊາຊົນລາວ ຄັ້ງທີ 20 ນັບ​ຕັ້ງແຕ່ປີ 1998 ເປັນຕົ້ນມາ, ສະນັ້ນເພື່ອເປັນການສະເຫຼີມສະຫຼອງວັນສຳຄັນດັ່ງກ່າວ, ສູນກາງຊາວໜຸ່ມ ປະຊາຊົນ ປະຕິວັດລາວ ໄດ້ສອບເສັງຄັດເລືອກເອົາຊາວໜຸ່ມ 29 ສະຫາຍ ເພື່ອເປັນຕົວແທນເຂົ້າຮ່ວມໂຄງການດັ່ງກ່າວຕາມການເຊື້ອ ເຊີນ, ເຊິ່ງຈະໃຊ້ເວລາດຳເນີນໂຄງການເປັນເວລາ 52 ວັນ ຕາມແຜນໂຄງການປີ 2017 ນີ້, ແມ່ນຈະໄດ້ໄປຢ້ຽມ ຢາມ 6 ປະເທດຄື:​ ຍີ່ ປຸ່ນ, ກຳປູເຈຍ, ໄທ, ລາວ, ອິນໂດເນເຊຍ, ມາເລເຊຍ.

ການສະແດງສິລະປະແມ່ນເປັນກິດຈະກຳທີ່ຄະນະຊາວໜຸ່ມເຂົ້າຮ່ວມໂຄງການຊາວໜຸ່ມເດີນທະເລອາຊຽນຍີ່ ປຸ່ນຈະໄດ້ເຂົ້າຮ່ວມ, ເຊິ່ງກິດຈະກຳດັ່ງກ່າວແມ່ນເປັນການເປີດໂອກາດໃຫ້ຄະນະຊາວໜຸ່ມຂອງແຕ່ລະປະເທດໄດ້ນຳ ສະເໜີ ແລະ ເຜີຍແຜ່ສີລະປະ, ວັດທະນາທຳທີ່ເປັນເອກະລັກຂອງຊາດເຊິ່ງຈະໄດ້ຈັດຂຶ້ນຢູ່ເທິງເຮືອ ແລະ ສະແດງຢູ່ ແຕ່ລະປະເທດທີ່ຈະລົງຢ້ຽມຢາມ.

ເພື່ອເປັນການກຽມຄວາມພ້ອມໃຫ້ແກ່ຄະນະຊາວໜຸ່ມລາວທີ່ເປັນຕົວແທນໃນນາມທູດວັດທະນາທຳຈະໄດ້ ເອົາຄວາມຮູ້,ຄວາມສາມາດໄປແລກປ່ຽນ ແລະ ເຜີຍແຜ່ໃນເວທີສາກົນ ຄະນະຊາວໜຸ່ມລາວໂຄງການຊາວໜຸ່ມເດີນ  ທະເລອາຊຽນຍີ່ປຸ່ນ ຄັ້ງທີ 44 ປີ 2017 ໄດ້ມີການກະກຽມການສະແດງເປັນໄລຍະເວລາເກືອບ 3 ເດືອນ ເພື່ອນຳເອົາສີລະປະ,ວັດທະນາທຳອັນໂດດເດັ່ນທີ່ເປັນເອກະລັກຂອງປະເທດລາວເຮົາໄປເຜີຍແຜ່ໃນເວທີສາກົນໂດຍຜ່ານການສະ ແດງຂອງບັນດາຊາວໜຸ່ມທີ່ຖືກຄັດເລືອກເຂົ້າຮ່ວມໂຄງການທັງໝົດ 29 ສະຫາຍ, ໃນນັ້ນມີຍິງ 14 ສະຫາຍ ແລະ ຫົວໜ້າຄະນະນຳພາ 1 ສະຫາຍ.

ໂດຍ: ເຄນອ່ອນ ພອນວິໄລ